عراق وه‌ئارامى به‌شه‌و كریا

شفق نيوز


گشتمان ئامراز به‌ش به‌شه‌و كردن عراق ئاماده‌كردیم ... له‌ شوون ڕمیان ڕژیم به‌عس ، جوبایدن جێگر ئیسه‌ێ سه‌روك ئه‌مریكا وه‌ ڕاشكاوى ووته‌ پیمان ، مه‌سه‌له‌ێ عراق یه‌كگرتگ بوێه‌ به‌شێگ له‌ گوزه‌یشته‌ و دی خوه‌دان شه‌كه‌ت مه‌كه‌ن و داد و هاوار نه‌كیشن له‌ بان وێرانه‌یل وڵاتێگ ك خوه‌دان وه‌ده‌س خوه‌دان كوت كوتى كردین... وه‌لێ ئیمه‌ هه‌مرای مكوڕیم له‌ بان قسه‌ێ خوه‌مان و وه‌ل دونیا ململانى كه‌یم و له‌ پێناو ئێ نیشتمان یه‌كگرتگه‌ ، لافاوێگ له‌ خوێن و ملیونان كوچبه‌ر و كوچ وه‌پێ كریاگ و یه‌تیم و بێوه‌ژن خستیمه‌سه‌ ڕێ ... ئایا ئێ نیشتمان یه‌كگرتگه‌ ئێ هه‌مگه‌ قوروانیه‌ ئه‌هه‌رزێ؟
بخوازیم و نه‌خوازیم كوردستان عراق ده‌وڵه‌تێگ سه‌روه‌خوه‌ێه‌ و كورد هه‌ق خوه‌ێه‌ ده‌وڵه‌ت سه‌روه‌خوه‌ێ داشتوگ ك ئه‌ڕا ڕه‌سین وه‌ێ ئامانجه‌ قوربانى فراوانێگ داس ... هه‌ر وه‌ێ خاتره‌ دوێنیم ئمڕو ئاسایش و سه‌قامگیرى به‌رقه‌رار كردیه‌ ... ئه‌ڕاچه‌ ئیمه‌ ئه‌ره‌وه‌یل عراق (سوننه‌ و شیعه‌) یاێ له‌ كورد نه‌گریم و هه‌وڵ بێه‌یم دو ده‌وڵه‌ت جور ده‌وڵه‌ت كوردستان دروس بكه‌یم ، تا روڵه‌یل ئیمه‌یش جور كورد له‌ ئاینده‌ ژیان ئارام و سه‌قامگیرێگ داشتون ، دوێر له‌ له‌یه‌كترى كوشتن له‌ بان ناسنامه‌ و ئاین و مه‌زه‌و.

له‌وه‌ر ئه‌وه‌گ كه‌ركوك و نه‌فته‌گه‌ێ ئه‌ڕا شیعه‌ گرنگ نییه‌ ، كورد باێه‌د هه‌رچى زویتر سه‌روه‌خوه‌یى خوه‌ێ ئعلان بكه‌ێگ ، تا دوێر بووگ له‌ نه‌ته‌وه‌ێ ئه‌ره‌و ك سه‌رقاڵ یه‌كترى كوشتنن ... چوێن ئه‌گه‌ر ئه‌ره‌وه‌یل وه‌ل یه‌كا ته‌با بوون و ئارام بگرن و شه‌كه‌تییان ده‌رچوگ ، سه‌رله‌نوو ڕوێ كه‌نه‌ كوردستان و ده‌س كه‌نه‌ ژه‌نین سازه‌ كوێه‌نه‌گه‌ی(له‌ زاخو تا فاو) هه‌رچه‌ن ئیمه‌ خاس زانیم ك زاخو نه‌گ ته‌نیا دوێره‌ له‌ ئاره‌زوه‌یل ئیمه‌ به‌لكم هاله‌ ده‌یشت ئاره‌زوه‌یل و دروشمه‌یل بێ ماناێ ئیمه‌ .. و ئه‌و وه‌خته‌ كه‌ركوك سه‌رله‌نوو بووگه‌ مه‌یدان جه‌نگ خانمانسوزێگ ك ته‌ڕو هشك وه‌یه‌كه‌وه‌ سوزنێگ.

ئه‌گه‌ر له‌ ناو ئه‌ره‌وه‌یل شیعه‌ێ عراق ئایم دانا و ئاقڵێگ بووگ باێه‌د پشتگیری دروس كردن ده‌وڵه‌ت سه‌روه‌خوه‌ێ كوردى بكه‌ێگ.. له‌وه‌ر ئه‌وه‌گ ده‌وڵه‌ت كوردی دارای په‌یوه‌ندى نزیك وه‌ل ئسرائیل (گه‌وراترین هاوپه‌یمان ئه‌مریكا له‌ خوه‌ر هه‌ڵات ناوراس) توێه‌نێ كومه‌ك شیعه‌یل عراق بكه‌ێگ ئه‌ڕا داشتن په‌یوه‌ندی دبلوماسی وه‌ل ئسرائیل و واز كردن لاپه‌ڕه‌ێ نوێگ وه‌ل ئه‌مریكا ك تائیسه‌ ئێران نواگیرى له‌ به‌رقه‌رارى ئه‌و په‌یوه‌ندیه‌ كردێه‌...  بێجگه‌ ئه‌وه‌یش دروس كردن ده‌وڵه‌تێگ ده‌وڵه‌مه‌ن و سه‌روه‌خوه‌ی و وه‌ هێز شیعه‌ توێه‌نێ نه‌خش ناوجیكه‌ر له‌ ناونی ئێران و ئه‌مریكا بازى بكه‌ێگ ئه‌ڕا چاره‌سه‌ر كردن فه‌ره‌ له‌ كیشه‌یل چاره‌سه‌ر نه‌كریاگ ناونی تاران و واشنتون .. وه‌لێ ئه‌و ده‌وڵه‌ت شیعه‌ نیاز وه‌سیاسه‌تمه‌داره‌یلێگ دێرێ ك بزانن چوێن گوچانه‌گه‌ له‌ ناوڕاسه‌وه‌ بگرن و فه‌ره‌ وه‌ره‌و ئێران یا ئه‌مریكا نزیكه‌و نه‌ون و وه‌ئارامی له‌ ژێر ده‌سه‌ڵات هه‌ردولایان ده‌رچن و هه‌ردولا وه‌ره‌و لای خوه‌یان بكیشن.

هه‌ڵبه‌ته‌ بووگ ئه‌و كاره‌ له‌ ڕوێ (ته‌قیه‌)وه‌ ئه‌نجام بگرێگ ، تا حكومه‌ت خوه‌ێ له‌ شه‌ڕ به‌عزێ پیاوه‌یل ئاینی لا بێه‌ێێگ ك وه‌بى ئاگایی شه‌و و ڕوژ دروشمه‌یل دژایه‌تى وه‌ل ئسرائیل و زایونیزم و شه‌یتان گه‌ورا به‌رزه‌و كه‌ن.
ئه‌و دروشمه‌یله‌ ك بێجگه‌ وه‌هه‌ده‌ر داین خوێن و دارایی له‌ ڕى عراق یه‌كگرتگ ئه‌ڕا شیعه‌ نه‌ێرێ ، له‌ لاێه‌ن وڵاته‌یل ده‌وروه‌ر (عه‌ره‌ب)ییش پێشوازى له‌ لێ نیه‌كرێه‌ێ ، ئمجا ئه‌ڕا چه‌ شیعه‌یل عراق دژایه‌تى ئسرائیل بكه‌ن؟ ئسرائیلى ك گشت وڵاته‌یل ئه‌ره‌و وه‌ ئاشكرا و نهێنى ده‌و ده‌وان كه‌ن ئه‌ڕا ئه‌وه‌گ په‌یوه‌ندی وه‌لیا داشتون و هه‌مان ئه‌ره‌وه‌یل ، شیعه‌یل عراق جور لكێگ شێرپه‌نجه‌یی له‌ له‌ش نه‌ته‌وه‌ێ ئه‌ره‌وی زانن ك بایه‌د بكه‌نرێه‌ى و بوڕێه‌ى.

وه‌ێ شێوه‌ ده‌وڵه‌ت شیعه‌ توێه‌نێگ په‌یوه‌ندى نایابێگ وه‌ل ئه‌مریكا و ئسرائیل و ده‌وڵه‌ت كوردستان له‌ گشت بواره‌یل داشتوگ و دوێرى بگرێگ له‌ ئه‌ره‌وه‌یل و كومه‌ڵگاى دوێا كه‌فتگیان.

وه‌لێ كیشه‌ێ سه‌ر ڕێ به‌ش به‌شه‌و كردن عراق یه‌كگرتگ (له‌ زاخو تا فاو) مه‌سه‌له‌ێ دروس كردن ده‌وڵه‌تێگ سونیه‌ له‌ ناوڕاس و خوه‌رئاواێ عراق ، له‌وه‌ر ئه‌وه‌گ ئه‌و ناوچه‌یله‌ ئیسه‌ بوێنه‌سه‌ زه‌ێو نه‌ختێگ ئه‌ڕا نشونماى داعش و سه‌ركردایه‌تى سیاسی به‌رجه‌سته‌ێگ نه‌ێرێن ك جێ ره‌زامه‌ندى گشت شه‌قام سونى بووگ و بتوێه‌نێ حكومه‌ت دروس بكه‌ێگ.

وه‌لێ سوودمه‌ند سه‌ره‌كى ئێ به‌شه‌و كردنه‌ ، كورد و شیعه‌س و باێه‌د په‌له‌ بكه‌ن له‌ دروس كردن ده‌وڵه‌ته‌یل خوه‌یان ، تا بتوێه‌نن سنووره‌یل وڵاته‌ تازه‌گان له‌ دخاڵه‌یل هه‌رێمى بپارێزن.

ئیمه‌ جور عراقی ... ئه‌گه‌ر هه‌زاران پارچه‌ هه‌ڵوه‌س بخوه‌نیم و سه‌دان گورانى ئه‌ڕا نیشتمان یه‌كگرتگ (له‌ زاخو تا فاو) بچڕیم ، گشت ئه‌وانه‌ خه‌و و خه‌یاڵن و هوێچ له‌ ڕاسیه‌گان ئاڵشت نیه‌كه‌ێگ ...   مه‌گه‌ر ڕوژێگ ك مه‌ردم به‌سره‌ وه‌بێ ترس له‌ سه‌ر بڕین بچنه‌ ئه‌ڕا ئه‌نبار و مه‌ردم سه‌لاحدین وه‌بێ ترس له‌وه‌گ تومه‌ت داعش بێه‌نه‌ لێان بچنه‌ ئه‌ڕا عماره‌ و هه‌ر عراقیێگ وه‌بێ ته‌حقیق و كه‌فیل بتوێه‌نێگ بچوگه‌ ئه‌ڕا هه‌ولیر.


خالد حه‌مزه‌ ئه‌لحه‌مدانی
ج ك