دویه‌ته‌ شاعر كورد ( زه‌ینه‌ب خالد ) فه‌یلى

شفق نيوز

سه‌رده‌میگ هه‌وه‌جه‌ وه‌ ئه‌وه‌ دیرین ك بتویه‌نن گوزراش یا ته‌عبیر له‌ فكره‌و سووزه‌یل تایبه‌ت خوه‌یان بكه‌ن وه‌ شیوه‌ى جوانیگ  و جوانتر له‌وه‌ك له‌ قسه‌یل ئاسایى تیه‌ریه‌نه‌ كار . كورده‌یل (فه‌یلى)یش جویر هه‌ر ملله‌تیگ  تر شاعره‌یل خوه‌یان دیرن ك خاوه‌ن به‌هره‌و فكره‌یگ  وه‌رفراوانن له‌ مه‌یدان شعر  چ وه‌زوان كوردى چ وه‌عه‌ره‌بى. یه‌كیگ  له‌و شاعره‌یلیشه‌ (زه‌ینه‌ب خالد فه‌یلى)ه‌ له‌دیداریگ  وه‌ل ده‌زگاى (شه‌فه‌ق) باس كرد و ئویشیگ: یه‌كه‌مین كوومه‌ڵه‌ شعر خوه‌م له‌ ساڵ (2009) په‌خش كردم له‌ژیر ناونیشان (محاكمة‌ الهوى)و له‌و وه‌ختیشه‌ خوه‌ندكار بویم له‌ قوناغ چوارم له‌زانكۆ و ئه‌و شعره‌یله‌ بوینه‌ گام كارا یا فه‌عالیگ  له‌ژیانم و ئه‌وه‌ بوى شعه‌یلم ده‌نگ فره‌یگ دانه‌وه‌و زوورمیان له‌ڕووژنامه‌ى (الزمان)له‌ نوسخه‌ى عراقى و له‌نده‌نى و ڕووژنامه‌یل تر و گووڤاره‌یل په‌خش كریان ، ئتجا هه‌ر له‌وه‌ر ئه‌وه‌ك چوین تویه‌نستم هه‌ر باوه‌تیگ  په‌خش بكه‌م له‌ هه‌ر رووژنامه‌یگ دى ئه‌و ئاره‌زووه‌یلمه‌ هاته‌ دى ك تواسیمه‌ى ڕووژیگ له‌ڕووژان بایگه‌ دى ئه‌ڕام.

له‌باوه‌ت چالاكى ئه‌ده‌بى و رووشنهویرییش زه‌ینه‌ب خالد فه‌یلى ئویشیگ  : داوه‌ت كریام ئه‌را كۆنگره‌و ڤیستیڤاڵه‌یل جووراو جوور له‌وه‌ر خاتر ئه‌وه‌ك له‌ شعره‌یلم بخوه‌نمه‌وه‌ . وه‌ل ئه‌وه‌یشا دو جار خه‌ڵات یا دیارى وه‌رگرتمه‌ له‌لایه‌ن كوومه‌ڵه‌ى رووشنهویرى گشتى له‌ دو ڤیستیڤاڵى . بیجگه‌ له‌ په‌خشكردن شعر (مه‌ندائى) له‌یه‌كیگ  له‌ ڕووژنامه‌ى برایه‌یل مه‌ندائى . زه‌ینه‌ب ئویشیگ  : شعره‌یلم له‌لیان نیشتمانى و سووزدارى (عاتفى)و كوومه‌ڵایه‌تیه‌و هه‌میشه‌ هه‌وڵ ئه‌وه‌ ده‌م ده‌رد ومه‌ینه‌تى گشت ئاده‌میزاد بخه‌مه‌ ڕوى و هه‌ر له‌مه‌ینه‌تى دایگ  و باوگ و مناڵ و گه‌وراو پیر و په‌ككه‌فتگ  ك چوین كیشمه‌كیش وه‌ل وه‌زع و ژیانا كه‌ن له‌وه‌ر خاتر ئه‌وه‌ك بتویه‌نن بژیه‌ن ، ئه‌یه‌ بیجگه‌ له‌ كیشه‌ى كورده‌یل فه‌یلى ك خوه‌میش دویه‌ته‌ كورد فه‌یلییم .

له‌باوه‌ت به‌شداریكردنى له‌پشتگیریكردن مه‌سه‌له‌ى كورده‌یل فه‌یلى ، زه‌ینه‌ب خالد ئویشیگ  : شعریگ  خوه‌ندمه‌وه‌ له‌هۆڵ (قاعه‌)ى میوانخانه‌ى مه‌نسوور له‌كۆنگره‌یگ  وه‌بوونه‌ى وه‌سه‌رچگن (29)ساڵ له‌بان كووچ وه‌پیكردن (ته‌سفیر) كورده‌یل فه‌یلى و شعره‌گه‌یش له‌ژیر ناونیشان (فه‌یلى) بوى ، ك گشت ئه‌و زوڵم و زوور و كووچ وه‌پیكردن و كوشتن و بڕین ده‌رهه‌ق وه‌ ڕوڵه‌یل كورد فه‌یلى و زندانى و قه‌وره‌یل وه‌جه‌م و به‌دبه‌ختیه‌یله‌ ك هاته‌ بانیان له‌تى خوه‌نستمه‌وه‌ ، بیجگه‌ ئه‌وه‌یش شعریگ  تر وه‌ناونیشان (رووشناییگ  له‌ واقعم) له‌ هۆڵ ده‌زگاى شه‌فه‌ق رووشنهویرى و ره‌سانن كورده‌یل فه‌یلى وه‌ بوونه‌ى وه‌سه‌رچگن (30) ساڵ له‌بان كووچ وه‌پیكردن كورده‌یل فه‌یلى خوه‌نستمه‌وه‌ ك واقع حاڵ خوه‌م بوى و باس له‌و به‌دبه‌ختى و مه‌ویسى و دڵته‌نگى خوه‌مانه‌ كردم و له‌تى باس له‌وه‌ كردم ك هویچ كه‌سیگ  نیه‌تویه‌نیگ  شوناسنامه‌ى كورده‌یل فه‌یلى له‌ناو بووه‌یگ  .

زه‌ینه‌ب ئویشیگ  : ئیه‌ من خه‌ریك په‌خشكردن كوومه‌ڵه‌ شعریگم دوباره‌و ئومیده‌وارم هه‌ر وه‌ختى كه‌فته‌ وه‌ر رووشنایى قه‌در له‌لى بگیریه‌یگ  . زه‌ینه‌ب خالد محه‌مه‌د فه‌یلى له‌ساڵ 1986 هاته‌سه‌ دونیاو كولیژ ئه‌ندازیارى به‌ش(البرمجیات) ته‌واو كردگه‌ له‌ساڵ 2008 – 2009. بیجگه‌ ئه‌وه‌یش له‌ خوه‌ندكاره‌یل یه‌كم كۆلیژه‌گه‌ بویه‌و جویر ده‌رسده‌ر كاندید یا ته‌رشیح كریاگه‌ له‌هه‌مان زانكۆ ، وه‌لى خوه‌ى تواسگه‌ له‌ یه‌كیگ  له‌ وزاره‌ته‌یل دامه‌زریه‌یگ  . ئاره‌زوو دویه‌ته‌ شاعر كورد فه‌یلى زه‌ینه‌ب خالد هه‌میشه‌ ره‌سم و خه‌تخوه‌شى و خوه‌ندنه‌وه‌ى كتاوه‌یل زانستیه‌ له‌ مه‌یدان حاسبات و كتاو زوان ئنگلیزى و فره‌نسى . ئومیده‌واریم زه‌ینه‌ب فه‌یلى نموونه‌ى زیاى بوود.