كيشه‌ی عراق نه‌وين مسداقيه‌ته‌

شفق نيوز

وه‌ل ئه‌وه‌يشا ئويشيم ئايا ته‌قینه‌وه‌و كوشتن و كاره‌ساته‌یل رووژانه‌ ك وه‌رده‌وام ژیان له‌ مه‌ردم تیه‌ڵ كردگه‌، تواناى ئه‌وه‌ دیرید كاريگه‌ری خوه‌ی باريده‌ كار له‌بان چه‌رخانن سیاسه‌ت ته‌كڕه‌وی، یا مه‌حاڵه‌ عراقیگ بايده‌ وجوود ك ده‌سڵاتداره‌يلی له‌ ده‌روه‌چه‌ی دادگه‌ری و ئنسانيه‌و ته‌ماشای مه‌ردمه‌گه‌ی بكه‌ن؟

كیشه‌ى عراق نه‌وین پرووژه‌ى كار هاوبه‌ش و مسداقیه‌ته‌، وه‌ل ئه‌وه‌یشا كیشمه‌كیش ناونى لایه‌نه‌یل وه‌ وه‌رده‌وامی له‌ وجوود بويه‌و له‌ هه‌مان وه‌خت خواست و داواكاری مه‌ردميش هه‌ميشه‌ وه‌خاتر ئه‌وه‌ بويه‌ ژيان وه‌پی بگوزه‌ريد، وه‌لی پرووسه‌ى سیاسى تا هاتگه‌ له‌كه‌دار كرياگه‌و گشت حزب و لایه‌نه‌یل هه‌ر مينه‌ی به‌رژه‌وه‌ندی خوه‌يان كردنه‌ وه‌بی له‌وه‌رچه‌وه‌گرتن به‌رژه‌وه‌ندی گشتی تا ئه‌وه‌ بوی ك عاقبه‌تى ره‌ساننه‌ ئی جه‌نگ گشتلاگير و وه‌رفراوانه‌ ك ريكخرياگه‌يل ترۆريستی نه‌ف له‌ی كيشمه‌كيشه‌يل سياسيه‌ وه‌رگرت و ناوچه‌يل فراوانيگ له‌ باكوور و خوه‌رئاوای عراق داگير كرد.

هه‌ر وه‌و خاتريشه‌ تاریخ سیاسى له‌عراق و ئه‌و جه‌نگ و داگیركاریه‌یل ئه‌وساو ئیسه‌يشه‌‌ كاریگه‌رى فره‌یگ داشتنه‌ له‌ سروشت یه‌یگه‌رى و ملهوڕى سه‌خت ده‌سڵاتداره‌یلى و له‌ڕی ئه‌وانيشه‌و بوغز و كينه‌ت كه‌فتياده‌ ناونی مه‌رم پيكهاته‌يل تا ئه‌وه‌ بوی مه‌سه‌له‌ی تايفه‌گه‌ری رويداو كيشمه‌كيش بی كووتايگ له‌تی په‌يا بوی و بنبڕكردنيشی كار سه‌خت و زه‌حمه‌تيگه‌.

سه‌ردار ره‌شيد

ج . أ