ده‌رفه‌ت تازه‌یگ ئه‌را راسه‌وكردن ریڕه‌و

شفق نيوز

  وه‌ شیوه‌یگ گشتی ئمڕوو له‌ عراق و له‌ كوردستانیش وه‌ شیوه‌یگ تایبه‌ت، وه‌ل وه‌رده‌وامى بار پڕ قه‌یران و ده‌رخستن ناڕه‌زایى له‌بان كاره‌یل حكوومه‌ت و حزبه‌یل ده‌سڵاتدار، دوینیم ك چالاكوانه‌یل و كاركه‌ره‌یل مه‌یدان سیاسى جموجویل گه‌رمیگ كه‌ن وه‌ره‌و لاى ئى لایه‌ن و ئه‌و لایه‌نه‌یل سیاسى نه‌ك له‌وه‌ر خاسسازى یا ئاڵشتكرن، به‌ڵكوو گه‌ردنه‌ شوون به‌رژه‌وه‌ندى خودى و دامه‌زراننیان و ده‌سخستن ئمتیازه‌یلیان. ئنجا ئه‌و فه‌یلیه‌یلیشه‌ ك هاتنه‌ ناو ئى ركابه‌رى دویاكه‌فتگه‌ زوى كاریگه‌ر بوین وه‌ى ژینگه‌ بوین و هووكاره‌ى ئه‌زموون كه‌سه‌یل تر وه‌رجه‌ خوه‌یان بوین.

مایه‌ى وه‌هویرخستنه‌ ك ریكخریاگه‌یل و ته‌نانه‌ت حزبه‌یل سیاسى فه‌یلییش له‌وه‌ر تایبه‌تمه‌ندى ئاشكرامان، كه‌فتنه‌سه‌ وه‌ر ئه‌و دیده‌ ك گومان هه‌م له‌ عراقیه‌ت و هه‌میش له‌ كوردبوینیان بكریه‌ید، هووكار ئى مه‌سه‌له‌یشه‌ شایه‌ت ئه‌وه‌ بوود ك ئى ریكخریاگ و حزبه‌یله‌ به‌سیان وه‌خوه‌یانه‌و دینه‌و كه‌سه‌یلیگ غه‌یره‌ فه‌یلى له‌تیان نه‌ود، یه‌یش له‌وه‌ختیگ ئیمه‌ به‌شدارى كه‌سه‌یل تر كه‌یم له‌ حزب و رینمایه‌یلیان، وه‌لى لایه‌ن تر گرینگى وه‌ى به‌شداریه‌ نایه‌ن وه‌لمانا له‌ جموجویل سیاسى و كاره‌یل تر ، ئنجا ئیمه‌ ناسنامه‌و موڵك و ماڵمان وه‌ زه‌ره‌د نه‌یایم له‌ ئاكام سته‌م حكوومه‌ته‌یل، به‌ڵكوو ره‌فیق و خوه‌شه‌ویس و ره‌سیدمان له‌ده‌سدایم له‌لاى ئه‌و حز ب و ریكخریاگه‌یله‌و ته‌نانه‌ت جایه‌ڵ جوانه‌یلمانیش له‌ كورده‌یل فه‌یلى له‌ده‌سدایم دویاى ئه‌وه‌ك ناڕه‌حه‌تى دڵته‌نگى و بیبه‌شى كیشان وه‌ بوونه‌ى سیاسه‌ت و په‌یڕه‌وه‌یل ناواز و بى به‌رهه‌مدار.

ئه‌گه‌ر له‌لایگ تره‌و فیشتر وه‌ گه‌شبینیه‌و ته‌ماشاى باوه‌ته‌گه‌ بكه‌یم وه‌ل بار ئیسه‌ى ناسروشتى عراق، بڕیگ له‌ ریكخریاگ و قه‌واره‌یل سیاسى و كوومه‌ڵایه‌تى و رووشنهویرى و وه‌رزشى فه‌یلى ك هه‌رچه‌نى ئه‌و توانا و ئه‌و به‌رنامه‌یل نه‌یرن و له‌و ئاست به‌رزه‌ نین و تیكه‌ڵایى نه‌یرن وه‌ل لایه‌نه‌یل و بویه‌سه‌ مایه‌ى كزى كاریگه‌رى سیاسى، وه‌لى ئه‌و گرده‌وبوینه‌ جوور ده‌سكه‌فتیگگ تاریف كریه‌ید نه‌بایه‌د بشاریه‌یده‌و.

فه‌رامووشكردن و دویره‌وخستن ئى پیكهاته‌ى گرینگه‌ جوور كوردیل فه‌یلى له‌لایه‌ن حزبه‌یل سیاسى سه‌ره‌كى یه‌كیگ بوى له‌ گرینگترین ئه‌و هووكاره‌یله‌ ك بوینه‌ مایه‌ى دامه‌زرانن ئى ریكخریاگ و حزبه‌یله‌ سیاسى فه‌یلیه‌ و گشتینایش جه‌خت له‌بان مه‌زڵومیه‌ت ئى چینه‌ كردیان.

حزبه‌یل سیاسى شیوه‌ عه‌ره‌بى دویر نین له‌ دید كیشه‌ى فه‌یلیه‌یل و ته‌نانه‌ت سه‌دام حسێن خاوه‌ن دوسیه‌ى له‌ناوبردن وه‌جه‌م هه‌وڵ ئه‌وه‌ دا كورد فه‌یلى له‌ وجوود نه‌یلید و بیجگه‌ ئه‌وه‌یش هه‌وڵ ئنكار عراقیه‌تمان داو ئنكار له‌وه‌یش نه‌كرد ك كوردیم، هه‌ر له‌وه‌ر ئه‌وه‌یش سزامان دا وه‌ل كورد و وه‌ل شیعه‌یش، دى وه‌و بوونه‌یشه‌و ئه‌ڵڵاجه‌وى نه‌وى ئه‌وانه‌ك ك ته‌سفیر كریان و ده‌ركریان شیوازیگ ئه‌را تیكه‌ڵبوین له‌ پرووسه‌ى سیاسى بویننه‌و وه‌شیوه‌یگ دروس و كاریگه‌ر.

ئیمه‌ له‌به‌غداو كه‌سه‌یل تر له‌ ده‌یشت و له‌ ئاواره‌یى له‌ناونى ماوه‌یگ و ماوه‌یگ تر ده‌س كه‌یمنه‌ چالاكى جوور خواست و ئه‌ركیگ ، وه‌لى پرسیار له‌یرا ئه‌وه‌سه‌ ئایا له‌ڕوى سیاسیه‌و كاریگه‌ره‌ و تا چه‌نیگ ره‌نگه‌و ئه‌یاد له‌بان مه‌یدان ئعلامى؟ وه‌راسى ئه‌گه‌ر له‌روى ئاماریشه‌و غه‌در له‌لیمان بكریه‌ید له‌ شاریگ جوور به‌غدا ك فیشتر له‌ هه‌فت ملیۆن كه‌س له‌تى نیشته‌جیه‌ له‌ وڵاتیگ ك مه‌ردمه‌گه‌ى فیشتر له‌ 30 ملیۆن كه‌سه‌، ئه‌وه‌ وه‌ وجوود سه‌دان هه‌زار له‌ كورده‌یل فه‌یلى تویه‌نستیایم ریڕه‌و پڕ متمانه‌ بگریمنه‌ وه‌ر وه‌ره‌و نوا ئه‌گه‌ر مه‌یل راسكانى بویاتاد له‌ ریڕه‌و سیاسه‌ راسى و نه‌رمى له‌ مامڵه‌كردن له‌جیاى یاخیبوین و به‌شدارى خراو.

من له‌شوون 2003 وه‌ل بڕیگ له‌ ره‌فیقه‌یلم كار ره‌سانن هه‌ڵوژانم له‌ چوارچیوه‌ى ریڕه‌و كیشه‌ى فه‌یلى و كار جددى كردیم وه‌بى داوڕیان، مه‌ردمان فریه‌یگیش وه‌لمانا كار كرد، وه‌لى جى داخه‌ ده‌ركه‌فت ك زوورمیان مینه‌ى كار جوور وه‌زیفه‌یگ كردیان و خاوه‌ن كیشه‌گه‌ نه‌وین، ئنجا دویاخریش هس وه‌ كه‌مى كارمه‌ند كارا كردیم و له‌وه‌رانوه‌ر ئه‌وه‌یش وه‌ل برایه‌یل دڵسووزمان كار كردیم له‌بان كیشه‌گه‌مان ك هه‌رچه‌نى ئه‌وان له‌ پیكهاته‌ى ئیمه‌یش نه‌وین.

ئیمه‌ په‌شیمان نییم له‌بان ئه‌وه‌ك پیشكه‌شى كردیم و هیمان نه‌ڕه‌سیمنه‌سه‌ ئه‌و قوناغه‌ ك چالاكیه‌یلمان و كاره‌یلمان گیر بیه‌یم، وه‌لى قوناغ ئاینده‌ى سیاسى و هه‌ڵوژاردنه‌یل ئه‌نجوومه‌ن نوێنه‌ره‌یل و مه‌سه‌له‌ى كۆتا یا وه‌بى كۆتا ئه‌گه‌ر ئاكام خاسیگ بوود ئه‌وه‌ مامڵه‌ى كه‌سه‌یل تر ئاڵشت بوود وه‌لمانا وه‌شیوه‌ى خاسیگ و گرفته‌یلمان چاره‌سه‌ر بوود وه‌ ئاسانى له‌وه‌ر خاتر هاوردنه‌وه‌ى هه‌قه‌یلمان و دوباره‌ نه‌كردنه‌وه‌ى ئه‌و زوڵمه‌ ك هاته‌ تویشمان.

هه‌ر له‌وه‌ر ئه‌وه‌یش هویركردن له‌ چه‌سپانن كاریگه‌ر پایه‌ى فه‌یلیه‌یل ك وه‌جووریگ شایسته‌یان بوود، ته‌نیا زه‌مانه‌تیگه‌ ئه‌را ئه‌وه‌ك هاوبه‌شیمان وه‌ل باقى مه‌ردمه‌یل تر شیواز خاسیگ وه‌خوه‌یه‌و بوینید.

عه‌لى حسێن فه‌یلى

ج . أ