مه‌ردم له‌ كرده‌وه‌يان بناس نه‌ك له‌ قه‌وڵه‌يليان

شفق نيوز

ژيان ئاده‌ميزاده‌يلمان تا ڕاده‌يگ جياواز و لێڵ مه‌ند، چوينكه‌ هه‌رچه‌نى تيكڵايى ديرێد وه‌ل پيكهاته‌يل جياجيا، وه‌لى له‌ هه‌مان وه‌خت ناتويه‌نێد وه‌ هه‌ق بناسێده‌يان يا ئاشناى هوير و هزريان بوێد، ناتويه‌نێد راسيه‌يليان بزانێد ك هه‌رچه‌نى په‌يوه‌ندى دووسايه‌تى و خيشايه‌تييش له‌ناونيدان بدێ، ته‌نانه‌ت خود خوه‌ديش فريه‌جار ناتويه‌نێد باوه‌ڕ وه‌ خوه‌د بارێد و چشته‌يل ده‌ورگرد خوه‌د شيه‌و بكه‌ێد! چوينكه‌ ئاده‌ميزاد جوور چه‌وچه‌يگه‌و كليله‌گه‌ى گومه‌و هه‌رچه‌نى هه‌وڵ بيه‌ێد بچێده‌ ناخيه‌و چشته‌يل فيشتر ئاشكرا ئه‌كه‌ێد و سه‌رگه‌ردان ئه‌دێد له‌ شيواز مامڵه‌كردن وه‌ليا، وه‌تايبه‌ت له‌ى رووژگارمانه‌ ك چه‌وپووشى له‌تى بويه‌سه‌ شيوه‌يگ ناديار له‌بان ريڕه‌ويگ ك زويتر نه‌ويه‌!.

به‌ڵى بارودوخ له‌يوا وه‌پى هات و بار ره‌فتار وه‌ى جووره‌ ره‌سى، وه‌ بوونه‌ى ئه‌و ئاده‌ميزاده‌ ك بويه‌سه‌ ديل خوه‌ى و واقع و كومه‌ڵگاگه‌ى و ئه‌و كاره‌يله‌ ئه‌نجام ئه‌ياد ك تواناى نه‌يرێد و ئه‌گه‌ردێده‌ شوون ئه‌و چشته‌يله‌ ك نيه‌ وه‌رچه‌وى، يه‌يش ته‌نيا له‌وه‌ر ئه‌وه‌گ وه‌خت وه‌ليا بووه‌ێده‌ سه‌ر، ك ئه‌ويش وه‌بى ئيراده‌و ئامانج و هويچ پلانيگيش ئه‌راى نه‌يرێد و له‌ليشى نافامێد!

دى وه‌و جووره‌ ژيان بويه‌ هه‌ڵويست جوراوجوور و ئه‌ياده‌ تويش ئاده‌ميزاد، هه‌ڵويستيگ به‌خته‌وه‌رى ئه‌كا، هه‌ڵويستيگ دڵته‌نگى ئه‌كا، هه‌ڵويستيگ ئه‌كاده‌ى گيرستن، هه‌ڵويستيگ هيلێده‌ى بيده‌نگ له‌وه‌رانوه‌ر هه‌ر رويداگيگ ك ئه‌ياده‌ تويشى.

هه‌ر له‌وه‌ر ئه‌وه‌يش هه‌ڵويسته‌يل دڵته‌زن فريه‌يگ ئه‌ياده‌ تويشيه‌و، يا خراوه‌يگ وه‌ ريكه‌فت ناچارى ئه‌كا جواو ئى هه‌ڵويسته‌ بيه‌ێد و جارجاريگيش له‌يوا وه‌پى ئه‌كا ده‌س بكاده‌ تاوتويكردن دوير و دريژيگ پڕ گرفت وه‌ليا وه‌بى هويچ مانايگ و ده‌رچگن له‌ ته‌ور ئه‌ده‌ب و حورمه‌ت، چوينكه‌ حاڵه‌ته‌گه‌ له‌يوا وه‌پى ئه‌كا ناڕه‌حه‌ت بدێ، وه‌لى وه‌ل ئه‌وه‌يشا ئويشيم ئاقڵ ئه‌وه‌سه‌ ك قه‌در ئه‌قڵ خوه‌ى بزانێد و حورمه‌تى بگرێد.

ژيان هه‌رچه‌نى هاته‌ تويشد يا بوێده‌ تويشيه‌و، هه‌ر بايه‌سه‌ له‌تى كه‌سه‌يليگ جوراوجوور بوينێد و زه‌حمه‌ته‌ ده‌روينيان بخوه‌نێده‌وه‌و سه‌ختيشه‌ كاردانه‌وه‌يان بزانێد له‌باوه‌ت هه‌ڵويسته‌يل جوراوجووريان.

هه‌ر وه‌و خاتريشه‌ ئاده‌ميزاده‌يلمان هه‌وڵ ئه‌وه‌ ئه‌يه‌ن جه‌هانيگ بى وێنه‌ دروس بكه‌ن، جه‌هانيگ گشت چشتيگ له‌تى بدێ. ئاده‌ميزاديگ ك كه‌نه‌كارى و مه‌كر و دروو و ئاشوگه‌رى راده‌يگ ك نه‌زانێد ئايا ئاده‌ميزاد خاسيگه‌ يا خراو، ئه‌ويش له‌وه‌ر ئه‌وه‌گ ئه‌قڵ هوير له‌ چشتيگ ئه‌كاو دڵ وه‌ چشتيگ تر.

ئاده‌ميزاديگ ك مكوڕه‌ له‌بان وه‌جيهشتن گشت چشتيگ له‌ ژيان، ئاده‌ميزاديگ ك خه‌تكوشنه‌وه‌يگ ها ده‌سيه‌وه‌و هه‌وڵ كوشاننه‌وه‌ى ك گشت چشته‌يل جوانيگ ئه‌ياد له‌وه‌ر ئه‌و خراوه‌كاريه‌ ك ديرێده‌ى، ئاده‌ميزاديگ ك ئه‌يشێد هه‌ر من و به‌س، ئاده‌ميزاديگ ك خوازياره‌ ژيان دويره‌و بخا له‌وه‌ر دونيايگ ك ك تاسه‌ر نيه‌، ئاده‌ميزاديگ وه‌بى ته‌كلفه‌ت هه‌وه‌جه‌يل دروس ئه‌كا له‌ ده‌روين خوه‌ى و له‌لاى مه‌ردم، ئاده‌ميزاديگ ك به‌شداره‌ له‌ى جه‌هانه‌و بويه‌سه‌ ديل ده‌روين خوه‌ى، ئاده‌ميزاديگ ك فريه‌جار مه‌يل ئه‌را مه‌شقكردن هه‌ڵه‌ ديرێد ك هه‌رچه‌نى خوه‌يشى خاس زانێد ئه‌و چشته‌ هه‌ڵه‌س! ئاده‌ميزاديگ ك هه‌وڵ ياخيبوين بيه‌ێد، ئاده‌ميزاديگ ك سه‌رگه‌ردانيم له‌ تاريف كرده‌وه‌يل ئه‌ڵڵاجه‌وى و هويره‌يلى!

هه‌ر وه‌و خاتريشه‌ بايه‌سه‌ هوشيار بوێد له‌ى دونيا، چوينكه‌ ئاده‌ميزاد ئمڕوو جوور ئاده‌ميزاد دويه‌كه‌ نيه‌و جوور ئاده‌ميزاد سوويش نادێ، هه‌وڵ ئه‌وه‌ ئه‌ياد وه‌گشت شيوه‌يگ پاڵ كه‌سه‌يل تر بيه‌ێد و بخاده‌يانه‌ هه‌ڵه‌كردن و گووش وه‌ به‌رژه‌وه‌ندى كه‌س تر نايه‌ێد و ته‌نيا به‌رژه‌وه‌ندى خوه‌ى زانێد، ئمجا ئه‌ى ئاده‌ميزاد چوين خاس ئه‌دێد و هه‌ڵه‌ى خوه‌د راسه‌و ئه‌كه‌ێد ده‌رهه‌ق كه‌سه‌يل تر؟!

وه‌ل ئه‌وه‌يشا بايه‌سه‌ هه‌ميشه‌ ته‌ماشاى كرده‌وه‌ى ئاده‌ميزاد بكه‌ێد نه‌ك قه‌وڵه‌يلى ك هه‌ر ته‌نيا پشت له‌لێد كرد گشت چشتيگ له‌ هويريه‌و بچێد وه‌ ئه‌وه‌گ تواناى جيوه‌جيكردن قه‌وڵه‌يلى نه‌ياشتوود.

سوها بترس قوجا