چه‌كداركردن و سه‌ربازیكردن كوومه‌ڵگاى عراق

شفق نيوز

چه‌كداركردن و سه‌ربازیكردن كوومه‌ڵگاى عراقى، وه‌جووریگ ك جیاوازى نه‌یاشتوود له‌ناونى خوه‌ى و حكوومه‌ته‌یل یه‌ك له‌شوون یه‌ك وه‌رین له‌مه‌یدان تاوداین له‌شوون چه‌كداركردن.

 

هه‌ر له‌ى باوه‌ته‌و قه‌واره‌یل كوومه‌ڵایه‌تى و سیاسى نیگه‌رانى خوه‌یان نیشانده‌ن و ئاسووده‌ نین له‌وه‌رده‌وامى ئى رینماییه‌. حكوومه‌ت مالكى ته‌نیا له‌بان دامه‌زرانن ئه‌و سوپا نه‌وسیا ك زیاتره‌ له‌ دو ملیۆن سه‌رباز، به‌ڵكوو له‌گشت چه‌ك خسته‌ وه‌رده‌س گشت تاك و ماڵیگیش، ك وه‌ل ئه‌وه‌یشا گه‌ردێده‌ شوون چه‌ك ستراتیجى ئه‌را دژایه‌تى كورد وه‌رجه‌ مه‌ردمان تر، ك ئى چه‌كه‌یلیشه‌ ده‌بابه‌ى پیشكه‌فتگ و ته‌یاره‌یل جه‌نگییه‌ له‌شیواز ئێف16ى ئه‌مریكى ك بڕیاره‌ له‌ساڵ 2014 وه‌ریان بگرید. وه‌ل ئه‌وه‌یشا دویر نیه‌ كار له‌وه‌ر خاتر ده‌سكه‌فتن مه‌دفه‌ع نه‌مساوى یا موشه‌ك دویربڕ  وه‌ك موشه‌ك"ئه‌لحسێن"ك ئه‌وسا حكوومه‌ت سه‌دام حسێن بوردمان ته‌هران وه‌پى كردو هاورده‌ى كار له‌جه‌نگ كه‌نداو یه‌كه‌م و دویه‌م.

 

حكوومه‌ته‌یل یه‌ك له‌شوون عراق وه‌رین جوور حكوومه‌ت عه‌بدولكه‌ریم قاسم نه‌تویه‌نستن بچنه‌ وه‌ر جه‌نگ ته‌نیا له‌وه‌ختیگ چه‌ك تازه‌ى سۆڤێتى كه‌فتیاده‌ ده‌سیان وه‌ك ته‌یاره‌ى"مێك"و"سیخۆ"ى جه‌نگى، ك هه‌ر وه‌ختى ئه‌و چه‌كه‌یله‌ سه‌ندیان په‌لامار و داگیركارى وه‌پى ئه‌نجام دیان جوور ئه‌وه‌ك له‌ساڵ 1961 رویدا ك حكوومه‌ت قاسم ده‌س كرده‌ په‌لامارداین كورد له‌11/9/1961.

 

هه‌ر له‌بان كرده‌وه‌ى حكوومه‌ت قاسمیش ئه‌وه‌ بوى سه‌دام حسێنیش ئه‌و ریڕه‌وه‌ گرته‌وه‌ر و چه‌كه‌یل كاولكار فره‌یگ هاورد له‌یه‌كێتى سۆڤێت وه‌رین و له‌ده‌وڵه‌ته‌یل تر و شماره‌ى سوپاگه‌یشى زیاتره‌و كردو ئه‌وه‌ بوى له‌ساڵ 1980 په‌لامار ئیران داو له‌ساڵ 1990یش په‌لامار كوه‌یت دا.

 

تاریخ هه‌میشه‌ دوباره‌ى خوه‌یه‌و ئه‌كا له‌پلان و رینمایى سه‌ربازى ك ئیسه‌یش حكوومه‌ت مالكى وه‌هه‌مان شیوه‌ دوینیم دیه‌ها هه‌زار جایه‌ڵ جوان بیكار دیریم و گشت قاپییگ له‌ ڕوییان به‌سیاگه‌و ملیۆنه‌ها هاووڵاتى عراقى له‌ورسگى و كه‌مى خزمه‌تگوزارى ژیه‌ن، وه‌لى دوینیم حكوومه‌ت عراقى وه‌رجه‌ چه‌ن رووژیگ "4000"پۆلیس له‌پاریزگاى دیاله‌ دامه‌زران و له‌وه‌رجه‌ ئه‌وه‌یش هه‌زاران كه‌س له‌ پیاوه‌یل هووز یا عه‌شایر له‌(سه‌حوه‌)دامه‌زران، ك یه‌یش ماناى ئه‌وه‌سه‌ قاپى دامه‌زرانن و خه‌جكردن له‌بان چه‌ك و سه‌ربازگا هه‌میشه‌ وازه‌ له‌مه‌یدانه‌یل سه‌ربازى و پۆلیسى.

 

حكوومه‌ت مالكى له‌ى دویاخره‌ له‌وه‌ر خاتر ئه‌وه‌ك كوومه‌ڵگاى عراقى بكاده‌ سه‌ربازگا، بڕیار موڵه‌تدداین دا هه‌ر خیزانیگ پارچه‌ چه‌كیگ له‌ماڵ داشتوود، ك هه‌رچه‌نى ره‌خنه‌ى فره‌یگ هاته‌ بانى ئه‌را ئه‌و كاره‌، وه‌لى حكوومه‌ت گووش نه‌یا ئه‌و  ره‌خنه‌یله‌و مه‌سه‌له‌گه‌ ئاسایى بوى له‌لاى!

 

عه‌بدولغه‌نى عه‌لى یه‌حیا

ج