وه‌ قه‌وڵ سه‌رۆك هه‌رێم بكه‌ن، ده‌رفه‌ت نه‌مه‌نيه‌

شفق نيوز

ره‌وه‌ند كورده‌يل خوه‌رئاوای كوردستان(سوريا) له‌ هه‌رێم كوردستان به‌سياو له‌ ئه‌ی كۆنگره‌يشه‌‌ ته‌مام شه‌خه‌سيه‌ته‌يل و ئۆپۆزيسيۆن كورد سوريا له‌تێ به‌شداری كردن. له‌ ئه‌ی كۆنگره‌ سه‌رۆك هه‌رێم قسيه‌ی فره‌خاسێگ كردو وت: بيلا له‌جی هوير ته‌سك و ته‌نگ حزبايه‌تی و به‌رژه‌وه‌ندی لايه‌نێگ، هويرێگ نه‌ته‌وه‌يی وه‌ ئه‌ساس مافه‌يل نه‌ته‌وه‌ی كورد بگرينه‌و وه‌ر، ئيمه‌يش پشتگيریدان كه‌يم ئه‌را ره‌سين وه‌ مافه‌يل ئه‌ی به‌شه‌ له‌ نه‌ته‌وه‌ی كورد، وه‌لی ئيمه‌ هويچ وه‌خت ده‌س نيه‌خه‌يمه‌ ناو كاروبار وڵات سوريا...تد.

 

وه‌ڵ حاسڵ ئه‌ی كۆنگره‌‌ وه‌ هه‌ر شێوه‌ێگ بوی وه‌پا كرياو ئه‌ده‌ی له‌يوا بويشيمن ك گامێگ خاسوی ئه‌را وه‌گ كورده‌يل سوريا وه‌ هه‌ر هويرو باوه‌ڕێگه‌و، له‌تێ به‌شداری بكه‌ن و وه‌ل ئه‌و دويای برايل كورديانا شان به‌ن‌ ‌له‌شان يه‌كه‌و يه‌كگرتێ بوون تا بتويه‌نن خه‌بات و ده‌سكه‌فتێگ خاسيش بخنه‌ ده‌س خوه‌يان، وه‌لی وه‌ داخه‌و، بڕێگ له‌ برايل كورد ئه‌ی به‌شه‌ له‌ كوردستان نه‌ته‌نيا له‌ئه‌ی كۆنگره‌‌ به‌شداری نه‌كردن ك هويچ، ره‌خنه‌يش له‌ سه‌ركردايه‌تی هه‌رێم كوردستان گرتن...تد.

ئيسه‌ ئه‌وه‌گ دياره‌ يه‌سه‌ ك ئه‌ی هه‌رێم كوردستانه‌ وه‌ سه‌ركردايه‌تی سياسیه‌و‌ ئه‌زموونێگ چه‌نها ده‌هه‌ی ك ديرێد، هه‌ له‌ سه‌ردم خه‌بات شاخ و كويه‌ تا ره‌سيه‌سه‌ ئه‌ی رووژه‌گ به‌شێگ له‌ كوردستان ئازاده‌، سه‌دان جوور سه‌ردی و گه‌رمی وه‌ خوه‌يان دينه‌و وه‌ قه‌وڵ كورديه‌گه‌ی خوه‌مان تا قڵا بقرنگنێ زانن چه‌ ‌خوازێ!.

بايمه‌ سه‌ر يه‌، ئه‌گه‌ر باسێگ كورد له‌ سوريا نه‌ود ك به‌شێگ له‌ نه‌ته‌وه‌ی كورده‌و كورد له‌ هه‌رجی بوود هه‌ كورده‌و ته‌مام كوردستانيه‌يل وه‌ كورد بوين خوه‌يان شاقزی كه‌ن، خوو هه‌رێم كوردستانيش يه‌ وه‌ ئه‌رك خوه‌ی زانی تا ئه‌ی برايل كورديانه‌ له‌و به‌شه‌ له‌ كوردستان له‌ژێرناو كۆنگره‌ی له‌ده‌ور يه‌ك كۆوه‌و بكا تا هه‌ركاميان نه‌ن له‌ سازێگ و وه‌ جيا ئه‌را خوه‌يان نه‌ژه‌نن، وه‌ ئه‌گه‌ر سازێگ ئه‌را نه‌ته‌وه‌ی كورد ژه‌نن له‌و به‌شه‌، وه‌ل يه‌كا چوی هارمۆنی هاوده‌نگ و كۆك ئه‌ی داوايل خوه‌يانه‌ بارنه‌ زووان تا بتويه‌نن وه‌پێ بره‌سن.

سه‌دان ئه‌زموون له‌يوا له‌ هه‌رێم كوردستان له‌سه‌ردا هاتيه‌، هه‌ له‌ سه‌رده‌م رێكه‌فته‌نه‌يل خه‌بات شاخه‌و تا سه‌ركردايه‌تی وه‌ختی(قيادة موقت) و تا ره‌سين وه‌ يه‌گ حكومه‌ت هه‌رێم دامه‌زريا، ته‌مامێ وه‌ رێكه‌فتن پارته‌يل سياسی كوردستانی له‌ی به‌شه،‌ وه‌ ئه‌و‌جييه‌ ره‌سين ك ئمڕوو دوينمه‌ی و ناوێ هه‌رێم كوردستانه‌!.

وه‌خت له‌ سوريا ته‌نگه‌و كورديش له‌وره‌ حه‌ق خوريايه، ئه‌را يه‌ له‌ی قۆناغ فره‌ هه‌ستياره‌ ناده‌ی هه‌ر كه‌س سان خوه‌ی به‌ی له‌ سينه‌و خوه‌ی وه‌ گه‌ورا و خاوه‌ن هه‌رچێشتێگ نه‌ته‌وه‌ی كورد بزانێد، دی سه‌ره‌دم ئگۆيزم سياسی وه‌ل خه‌بات رێخسن ئه‌را داشتن جه‌ماوه‌ر ئيسه‌ نيه‌ تا پارتێگ ئه‌را خوه‌ی به‌ی له‌ ده‌هه‌ڵ و خوه‌ی وه‌ نۆينه‌ر كورد بزانێدو ئه‌ی دويای وه‌ ناوه‌يل تره‌ك ناو بارێد. ئه‌گه‌ر له‌ دروشم و به‌رنامه‌ی پارته‌يل كوردی ئه‌ی بشه‌ ته‌نانه‌ت به‌شه‌يل تره‌ك كوردستانيش خاس بنوڕيم گشتی باسێگ وه‌ ناو ماف نه‌ته‌وه‌ی كورد له‌ سايه‌ی ديموكراسی داوای كه‌ن و خوزانه‌ی. ئمجا ئه‌گه‌ر ئه‌وانه‌گ ره‌خنه‌ له‌ سه‌ران سياسی هه‌رێم كوردستان له‌باوه‌ت وه‌پا كردن كۆنگره‌ی ك ئامانج له‌لێ ته‌نيا كۆوه‌و كردن رێخسنه‌يل و پارته‌يل و كه‌سايه‌تيه‌يل كورد خوه‌رئاوای كوردستانه‌ ك تا ئيسه‌ وه‌ل ئه‌ی چنه‌ چشتێگا له‌ سوريا رويوه‌روی نه‌وينه تا بزان چه‌ بكه‌ن و چوين وه‌ل ئه‌ی چشتا ك هاتيه‌سه‌و نوايان ره‌فتار بكه‌ن. فره‌ دوير نيه‌كه‌فيم تا هه‌ هوويچ نه‌ود له‌ ئه‌زموونه‌يل هه‌رێم كوردستان چ سلبی و چ ئيجابی له‌ سه‌رده‌م رژيم به‌عس سوودێگ وه‌ربگرن. ئايا له‌ جی ده‌سخوه‌شی كردن و گووش ته‌كانن له‌ ئه‌ی برايل خوه‌يانه‌، ئه‌را بايه‌د وه‌ توندی ره‌خنه‌يان بكه‌ن و تاوانباريشيان بكه‌ن!؟.

سه‌رۆك هه‌رێم ئشاره‌ وه‌ چێن سه‌رده‌م خه‌بات چه‌كداری له‌ ئه‌ی سه‌ده‌ ك هايمه‌تێ ئه‌كاو مكانيزم ره‌سين وه‌ ماف ره‌وايل نه‌ته‌وه‌ی كورد، له‌ به‌سين كۆنگره‌ی نه‌ته‌وه‌يی ئه‌را ته‌مام لايه‌نه‌يل سياسی كورد ئه‌زانێد ك گومان له‌يه‌يشه‌‌ نيه‌ ك ته‌مام پارته‌يل كوردستانی ك كوردايه‌تی كردنه‌و كه‌ن، وه‌ليا هاوڕان و ئه‌را يه‌يشه‌ پێشوازێگ گه‌رمگيش له‌ی‌ پێشنياره‌گه‌ی كرياس و وه‌ی زويه‌ ئه‌گه‌ر ئگۆئيزمه‌يل و مه‌ن مه‌ن كه‌ره‌يل بيلن و چكوڵ له‌تێ خڕ نيه‌ن و نه‌شێوننه‌ی، ئه‌ی كۆنگره‌ به‌سيه‌يد.

ئمجا له‌ باڵ تره‌كه‌و ئه‌ی سياسيه‌يله‌و ته‌نانه‌ت هه‌ر كه‌سايه‌تێگ سياسی كوردو پارته‌يل ته‌ره‌كيش يه‌ تيرنه‌ زووان(دوژمن پارچه‌ پارچه‌مان كرديه‌)، خوو ئايا ئيسه‌ ك ده‌رفه‌تێگ ئه‌را يكه‌وگرتنه،‌ دی ئه‌را خوه‌دان كێشينه‌، يه‌ پارادۆكسيگ وه‌ل قسيه‌يل خوه‌دانه‌ نيه ك داوا ئه‌را يه‌كڕيزی كه‌ين و هه‌ وانگ ئه‌رای ئه‌ڵاڵين‌!؟.

ئه‌گه‌ر باس له‌ ديموكراسی كه‌ن، يه‌ چ ديموكراسيگه‌ ك ئه‌گه‌ر خوه‌يان ئه‌ی كاره‌ نه‌كه‌ن و گشت لايه‌نێگ له‌ژێر ده‌س خوه‌يان نه‌ود، مه‌حكومه‌ وه‌ هه‌رچشتێگ خوه‌يان له‌لێ هويره‌ كه‌ن و ئه‌رای ده‌نه‌ ده‌ما!؟.

ئه‌ی لايه‌نه‌يل سياسی كورده‌ وه‌ هه‌ر مه‌مه‌رێگ له‌ی كۆنگره‌ به‌شداری نه‌كردن، بايه‌د بڕوننه‌ ئه‌ی وه‌هار عه‌روه‌يه‌ ك سه‌رتاپای ناوه‌چه‌گه‌ گرته‌وه‌ر، ده‌رسێگ له‌ لايه‌نه‌يل سياسی عه‌ره‌و ئه‌و وڵاته‌يله‌گ رژمه‌يليان ڕميا بگرن ك چوين ته‌نانه‌ت پاره‌ته‌يل ئسلامی راديكاڵێگ چوی ئه‌خوان و سه‌له‌فی و چه‌پ و راس وه‌ل ‌يه‌كا نيشتن و رێكه‌فتن!. ياهه‌ فره‌ دويره‌و نه‌كه‌فيمن له‌ سوريا ك ئيسه‌ هه‌ له‌ناو گاپاره‌ی ئاڵشت وڵشت بوين(ئه‌گه‌رخوه‌يان وه‌ به‌شێگ له‌لێ بزانن)، چوين ئوپۆزيسيون له‌وه‌رايوه‌ر رژيم به‌شار وه‌ هه‌ر باوه‌ڕێگه له‌ راس و له‌چه‌پ و ئسلامی‌ يه‌كه‌و گرتنه‌ تا بره‌سنه‌ ئه‌نجامێگ، خوو يانه‌ ئه‌را وه‌ل برايل كورد خوه‌يانا رێ نيه‌كه‌فن و لويته‌لايی كه‌ن!؟!.

خوو هه‌رچێ نه‌ود سه‌رۆك هه‌ريم كورده‌و له‌ روی دڵسوزيه‌و ئه‌ی قسيه‌يله‌ وت ك خوه‌ی له‌ ده‌وره‌ی دامه‌زريان هه‌رێم تا ڕميان رژيم به‌عس، يه‌ك وه‌ يه‌ك وه‌ چه‌و ديه‌سان و ژان و ده‌ره‌دو زامه‌ت ناكووكيه‌يليش چه‌شيه‌. سه‌رۆك وه‌زيره‌يل توركيا(ئه‌ردۆغان) ئه‌را باوه‌ڕ و هوير ئسلامی خوه‌ی، ده‌سميه‌ت ئوپۆزيسيون سوريا له‌وه‌رايوه‌ر رژيم به‌شار ئه‌ده‌ی(هه‌ر چه‌ن ئامانج تره‌كيش له‌ پشتيه‌و ديرێد ك سه‌ره‌كی ترينيان ترس له‌ دروس بوين هه‌رێم تره‌ك كورديه‌).

ئمجا وه‌ی هاڵه‌و، ئايا نه‌كريا له‌جی ئه‌و وه‌خه‌ته‌يله‌گ قاڵ ليدان گه‌رمه‌و ئه‌ده‌ی و له‌ سه‌ركردايه‌تی هه‌رێم كوردستان تواين كارێگ ئه‌رادان بكا، ئيجاره‌ ئه‌را يكه‌وگرتنێ ك وه‌رده‌وام ده‌م له‌لێ ده‌ين ئه‌وه‌يش له‌ی ده‌رفه‌ته‌ ك رژيم به‌شار هاله‌ سرالێژی، باتاين ئه‌و هه‌مه‌گه‌ كه‌سايه‌ت و رووشنهويرو سياسه‌تمه‌دار كورده‌ بياتاين و يه‌ بزانين ك هه‌ر ئويه‌ كوردايه‌تی نيه‌كه‌ين، هوير ئه‌وانيش وه‌ خاڵ ره‌سين وه‌ مافه‌يل كورد ته‌مام بوودو ئه‌رايش سخان شكاننه‌، له‌ی‌ قاڵ گه‌رميشه‌ وه‌ل يه‌كا گام ئه‌ڵگرتاين!؟.

ئه‌ی جووره‌ كردارێ بێجگه‌ له‌وه‌گ بێ رێزيه وه‌ داوه‌تێگ هه‌رێم كوردستان له‌ هه‌ررويه‌و ك هساو بكه‌يد چ ديپلۆماسيانه‌و چ سياسی و چ ئه‌خلاقی و  چ فه‌رهه‌نگ و ره‌سم كوردی. ئمجا له‌ باڵ تريشه‌و وه‌ل دروشم ديموكراسيا ك ها سه‌ر زووانيان فره‌ جياوازه‌و، له‌ پراكتيكا يه‌ دوينيه‌يد ك ئه‌گه‌ر رووژێگ له‌ رووژان بوونه‌ ده‌سڵات خوو له‌ به‌شار ، فره‌ تۆتاليتر تره‌ك ره‌فتار كه‌ين و نيه‌يلين ده‌نگ كه‌س تره‌ك بايه‌ده‌و بان.

خاڵ يه‌كم ديموكراسی يانی رێزنان له‌يه‌كتره‌كی، خوو له‌ی وه‌خته‌ ئه‌ی سازجيا ژه‌نينه‌ ك ده‌نگ ناهامارگيش ديرێد، وه‌ره‌وكو ئه‌ی به‌شه‌ له‌ نه‌ته‌وه‌ی كورد له‌ كوردستان به‌يد ئه‌گه‌ر راسی وه‌ ته‌مامی يانه‌ نۆينه‌ر ئه‌ی به‌شه‌ له‌ نه‌ته‌وه‌ی كورد بواياتان ئمجا چاره‌ چه‌وی!؟.

داوه‌ت وه‌ يه‌كڕيزی و وه‌ل يه‌كابوين له‌ی وه‌خته‌ فره‌ گرنگه بايه‌د قه‌بوڵ بكريادو قسيه‌يل سه‌رۆك هه‌رێميش بوياتاگه‌ باسێگ خاس ئه‌را وه‌ره‌ونوا چێن و په‌ڕه‌ی‌ تازه‌ واز كردن و دويره‌ كه‌فتن له‌ هه‌ر كينه‌ی. بايه‌د وه‌ دويره‌و كه‌فتن له‌دۆگمايل و هه‌ر هوير تره‌ك كار نه‌ته‌وه‌يی له‌ به‌ر‌ژه‌وه‌نديه‌يل شه‌خسی و حزبی بخريه‌يده‌و نواوتره‌ك، كه‌ی كوينه‌ نه‌كريه‌يده‌ وايا و سياسه‌ت يا خوه‌م يا هويچ كه‌س دی په‌يڕه‌وی نه‌كريه‌يد.

ئمجا له‌يره‌ ئه‌ی پرسه‌ له‌لای هه‌ركه‌سێگ دروس ئه‌ده‌ی ك: وه‌ی جووره‌ به‌شداری نه‌كردنێگ، له‌ هاڵێگ باس كۆنگره‌ی نه‌ته‌وه‌يی كورد وه‌ گشتێ هاله‌رێ، چوين يانه‌ توان له‌تێ به‌شداری بكه‌ن و هاوگام وه‌ل ته‌مام هێزه‌يل و لايه‌نه‌يل تره‌ك كوردا بوون تا وه‌ مافه‌يل ره‌وای ملله‌ته‌گمان بره‌سن!؟.

له‌ ناو ئيمه‌ مه‌سه‌ڵيگ هه‌س ك ئويشێ: تو له‌ بان ئام، يا ئام له‌ بان تو. خوو ناده‌ی ئه‌گه‌ر هێز يه‌كميش له‌ ناو كورده‌يل خوه‌ر‌ئاوا(سوريا) بويد، وه‌ كه‌سا دگان دانه‌نه‌يدو هه‌ ئه‌سب خوه‌د بتگنێ. ئه‌گه‌ر له‌ وه‌رايوه‌ر نه‌ته‌وه‌ی كورد هه‌ست وه‌ وه‌پرسياری كه‌ين، بايه‌د له‌ هوير و باوه‌ڕ يۆنيتر ده‌س بكێشين و بزانين ك سياسه‌ت كردن له‌ سوريا ئه‌را كورد چوی وه‌ نيه‌ ك كورد له‌ توركيا ئه‌كاو يانه‌ له‌ يه‌ك جيايه‌و بكه‌ين تا ئه‌ی ده‌رفه‌ت ئاخره‌ له‌ی سه‌ده‌ ك ئه‌گه‌ر وه‌ مافه‌يل ره‌وای خوه‌مان ره‌سيم خاس و ئه‌گه‌ريش نه‌ره‌سيم دی ده‌رفه‌تگ تره‌ك نيه‌منێدو له‌ده‌سمان چوود، بگرينه‌ی وه‌رچه‌وه‌دان و بزانن دی ده‌رفه‌ت تره‌كيش ئه‌رامان نيه‌.

شوڕش شاواز