هه‌ڵویستدان چه‌س ئه‌ى سه‌رۆك؟

شفق نيوز

 

له‌یرا ئى مه‌سه‌له‌ دوباره‌ ناكه‌یم، ك نه‌ته‌وه‌ى كوردمان وه‌ دریژایى رووژگار وه‌ یادگاریه‌یل پڕ ژان و ناخوه‌شیگ گوزه‌ر كرد، ك ئه‌را نموونه‌ یه‌یش له‌ دروسكردن ده‌س غه‌زه‌و سروشت نه‌وى، به‌ڵكوو له‌ دروسكردن ده‌س رژیمه‌یل شۆفێنى و سته‌مكار بوى. هه‌ر له‌وه‌ر ئه‌وه‌یش تویه‌نیم بویشیم ئه‌و رووژگاره‌یل پڕ یادگاریه‌یل و بوونه‌یل ناخوه‌شه‌ فریه‌ن و ئاساییه‌ چینه‌یل جیاواز له‌ كوومه‌ڵگاى عراقى ئه‌و ئه‌ركه‌ وه‌جى بارن و ئه‌یاكه‌یان خه‌مخوه‌ر ئه‌واكه‌یان بوود یا وه‌ سووزه‌و به‌شدارى خه‌مه‌یلى بكا. له‌لایگ تریشه‌و حكوومه‌ته‌یل و لایه‌نه‌یلیگ یاسایى هه‌ن ئه‌را ئه‌وه‌ سپاریانه‌ ئه‌و ئه‌ركه‌یله‌ جیوه‌جى بكه‌ن وه‌تایبه‌ت ئه‌گه‌ر پاشمه‌نده‌ى ئه‌و رژیمه‌یل وه‌رینه‌ بوود ك ئیچنه‌ كاره‌سات و تاوانه‌یلیگ دروس كرد.

مه‌سه‌له‌ى كووچ وه‌پیكردن سه‌دان هه‌زار له‌ كورده‌یل فه‌یلى له‌ سه‌ره‌تاى ساڵه‌یل هه‌یشتاى سه‌ده‌ى وه‌رین و ئه‌و كاره‌ساته‌یله‌ ك یه‌ك له‌شوون یه‌ك رویدا له‌ ئاكام ئه‌و بڕیار دڕندانه‌ جوور بیسه‌روشوونكردن هه‌زاران جایه‌ڵ جوان ك مه‌سه‌له‌یگ نیه‌ وه‌ گووره‌ى مه‌یل یادى بكه‌یم یا له‌ هویریه‌و بووه‌یم، به‌ڵكوو ئه‌ركیگ ئنسانى و یاسایى و كوومه‌ڵایه‌تیه‌ بیجگه‌ ئه‌وه‌ك له‌لایه‌ن حكوومه‌تیشه‌و مه‌سه‌له‌یگ فه‌رمى و ئمزاكریاگه‌ ك ته‌نانه‌ت ئه‌گه‌ر وه‌ شیوه‌ى دراوردن به‌یاننامه‌ یا حاشاكردن یا سازكردن ساڵیادیگیش بویه‌ وه‌ شیوه‌یگ ئه‌نجام بدریه‌ید ك بگونجیه‌ید وه‌ل ئاست قوربانیه‌یل ئه‌و كاره‌ساته‌.

تاوانه‌یل كووچ وه‌پیكردن زووره‌ملى كورده‌یل فه‌یلى فیشتر له‌ سێ ده‌یه‌ له‌بانى گوزه‌ر بویه‌و رمیان رژیم وه‌رینیش ك هووكار سه‌ره‌كى ئى تاوانه‌ بوى ده‌ ساڵ فیشتر له‌بانى گوزه‌ر بویه‌، وه‌لى له‌یرا پرسیاره‌یل فریه‌یگ هه‌ن له‌باوه‌ت ئه‌رك و كرده‌وه‌یل ئه‌را ئى ساڵیاد وه‌رده‌وامه‌ وه‌ل ده‌رفه‌تیگ ئه‌را پیشكه‌شكردن ئه‌وه‌گ رویداو جیوه‌جى كریا وه‌خاتر لاوردن ئه‌و زوڵم و زووره‌ له‌بان قوربانیده‌ره‌یل.

له‌یرا ئه‌رك حكوومه‌ت عراقى ئه‌وه‌سه‌ یاد ئه‌و كاره‌ساته‌و حاشاكردن له‌و تاوانه‌ بكا جوور هه‌ر بوونه‌یل تر ، وه‌لى رووڵه‌یل پیكهاته‌گه‌مان پرسیار ئه‌وه‌ ئه‌كه‌ن: ك ئه‌رك حكوومه‌ت و سه‌ركردایه‌تیه‌یل نه‌ته‌وه‌ى كورد چه‌س له‌وه‌رانوه‌ر ئى یاده‌؟ له‌ ساڵه‌یل گوزه‌یشت وه‌ تایبه‌ت له‌ى ساڵه‌یل دویاخره‌ ته‌نانه‌ت به‌یاننامه‌گه‌یش ئه‌را حاشاكردن له‌و تاوانه‌یله‌ نه‌وى و هویچ كۆنگره‌یگیش له‌باوه‌ت ساڵیادیه‌و ساز نه‌كریاگه‌.

رووڵه‌یل پیكهاته‌گه‌مان پرسن: له‌وه‌رچه‌ سه‌ركرده‌یل نه‌ته‌وایه‌تیمان له‌ بوونه‌یل تر هاوشیوه‌ وه‌ ئاشكرا به‌شدارى ئه‌كه‌ن و به‌یاننامه‌ ده‌رئه‌كه‌ن؟ هه‌ر له‌وه‌ر ئه‌وه‌یش هویچ مه‌هانه‌یگ نیه‌ ئه‌را ده‌رنه‌كردن به‌یاننامه‌یگ یا حاشاكردن له‌ى كاره‌ساته‌ وه‌ى بوونه‌وه‌.

ئیمه‌ له‌ هویر ئه‌وه‌ نییم بگه‌ردیمنه‌ شوون مه‌هانه‌یگ ئه‌را ره‌سینه‌وه‌ له‌ كرده‌وه‌ى ئه‌و راویژكاره‌یل تازه‌ى سه‌ركردایه‌تیه‌یل كوردمانه‌، ئنجا له‌ حاڵه‌ته‌یل فریه‌یگ ئسپات ئه‌وه‌ ئه‌كه‌ن ك گویا رووژشماریگ دروس نه‌یرن و په‌یڕه‌و متمانه‌داریگ نیه‌ بخاده‌ى هویر سه‌ركرده‌یلمان له‌وه‌ر خاتر نیشانداین هه‌ڵویست و ده‌ركردن بڕیاره‌یل خواست له‌ گشت بوونه‌یلیگ .

وه‌ مانایگ تر ئه‌گه‌ر ئمساڵ به‌یاننامه‌یگ له‌باوه‌ت كووچ وه‌پیكردن كورده‌یل فه‌یله‌و ده‌ربكریاتاد، ئه‌وه‌ مه‌سه‌له‌گه‌ خواست و ئاسایى بوى، وه‌لى ئه‌گه‌ر ساڵیاده‌گه‌ جوور ساڵه‌یل وه‌رین گوزه‌ر بوود، ئه‌وه‌ له‌ى حاڵه‌ته‌ جى پرسیار رووڵه‌یل قوربانیده‌ره‌ له‌ى نه‌وه‌ ك چه‌وه‌ڕى جواون و باوه‌ڕیش ناكه‌یم هویچ مه‌هانه‌یگ قه‌بول بكه‌ن، ئه‌یه‌ بیجگه‌ ئه‌وه‌ك مه‌سه‌له‌گه‌ كیشه‌یگ ئنسانى و عراقیه‌ له‌ هه‌مان وه‌خت كیشه‌یگ كورده‌و ئیمه‌ى كورده‌ویل فه‌یلییش چه‌وه‌ڕى و پیشبینى هه‌ڵویست ئاشكرایگ ئه‌كه‌یم له‌ سه‌ركردایه‌تیه‌یل كوردستانیمان تا جواو گشت ئه‌وانه‌ بیه‌نه‌و ك گره‌و له‌بان ته‌فروتوینه‌و چویچیان ماڵ كورد ئه‌كه‌ن و ته‌نانه‌ت نه‌ف له‌ دڵتنگیمانیش وه‌رگرن ئه‌را كاولكردن باقى باوه‌ڕ و ئیراده‌یلمان له‌وه‌رانوه‌ر كیشه‌ى ملله‌ته‌گه‌مان ك فه‌رزتره‌ له‌ كیشه‌ى مه‌زه‌و یا سیاسه‌ت.

عه‌لى حسێن فه‌یلى

ج . أ