کۆشكه‌گه‌ ئاڵوزيه‌يل عيراق وه‌ره‌ كوو ئه‌واد؟

شفق نيوز

وه‌يه‌كا رشيانێگ له‌ ناو ته‌مومژ له‌ ناونى دو جه‌مسه‌ره‌ عيراقيه‌گه‌ برد.(تويه‌نيم بويشيم دو جه‌مه‌سه‌ره‌ هه‌رێميه‌گه‌ دروس بوى). دوياى زووران و مشتومڕ فره‌يگ، سه‌رئه‌نجام له‌ سه‌ر ده‌س سه‌ركرده‌يل كورد له‌ شار هه‌ولێر لايه‌‌نه‌يل ناكووك وه‌ل يه‌كا گرده‌و بوين و ڕه‌سينه‌ ئه‌نجامێگ ئه‌رێنى ك ئه‌ى حكوومه‌ته‌ له‌لێ كه‌فته‌و ك ئه‌و وه‌خته‌ چه‌ودێره‌يل وتن، ئه‌يه‌ دريژه‌ ناكێشێ. به‌ڵكو لايه‌ن وه‌رايوه‌ر ته‌نيا له‌ ماوه‌ىگ كوڵ ده‌س ئه‌كاده‌ شێوانن و ئه‌ى حكوومه‌ت ئمڕووه‌ هه‌ر جوورێ بوود، ئيچنه‌ ده‌رچى ك ئه‌نجامه‌گه‌ى ره‌سيه‌ ئمڕوو ك گشت ئاڵوزيه‌يل له‌ عيراق ره‌سينه‌سه‌ خاڵ توندو بێزاركه‌ر ك فره‌ كه‌س پێشبينى جه‌نگێگ ناوخوه‌يى له‌ليان ئه‌كه‌ن. وه‌لى ئه‌گه‌ر وه‌ هويرده‌و بنووڕيمه‌ گێچه‌ڵه‌يل، له‌ ئه‌و ئيوارانه‌و زقتره‌و بوى ك تارق هاشمى تۆمه‌تابار بوى وه‌ يه‌گ پشتێوانى له‌ ترۆر ئه‌كاو هات ئه‌را هه‌رێم كوردستان. دوياى وه‌يش، رووژ وه‌ رووژ شه‌ڕ قسيه‌ى تونده‌يش له‌ ناونى په‌رڵه‌ماتارانى كوردو راستريش ده‌وڵه‌ت ياسا دروس بوى. تا ره‌سيه‌ قسيه‌ى سه‌رۆك هه‌رێم ك له‌ نه‌ۆرووز دى وه‌ ئاشكرا نگرانيه‌يل خوه‌ى له‌ باوه‌ت سه‌رۆك وه‌زيريل عيراق(نورى مالكى) روى كرد. دوياتر له‌يره‌و له‌وريشه‌ چه‌ن ده‌نگ عه‌ره‌وى له‌ ناو عيراقيهو  ليسته‌يل تر هاوڕاو هاوپشتى خوه‌يان ئه‌را قسيه‌يل سه‌رۆك هه‌رێم هاوردنه‌ زووان. له‌يره‌ دى وه‌ رووشنى دو جه‌مسه‌ره‌گه‌ له‌ يه‌ك دويره‌و كه‌فتن، ديرێد كاره‌گه‌ وه‌ره‌و ئه‌ڵوژنن وه‌رجله‌ وه‌خت ئه‌چێ. وه‌لى ئه‌وه‌گ ئيسه‌ دوينيه‌يد يه‌سه‌ ك مام جه‌لال ها له‌ هه‌ولێرو ها له‌ ته‌قلاى نزيكه‌و كردن لايه‌نه‌يل ناكووك وه‌ل يه‌كاو ئه‌خوازێ له‌ كۆشكه‌ تازه‌گه‌ى حزبه‌گه‌يه‌و، ئاڵوزيه‌يل عيراق وه‌ره‌و سه‌قامگيرى سياسى و ئاسايش بوه‌يد. وه‌لى ئه‌وه‌گ جى هويرده‌و بوينه‌و جى هويره‌و كردن چه‌ودێره‌يله‌ ئه‌وه‌سه‌ ك ئاخر ئيجاره‌ تاڵه‌بانى له‌ كۆشك حزبه‌گه‌ى خوه‌يه‌و تويه‌نێد سه‌رجه‌م لايه‌نه‌يل ناكووك بره‌سنێده‌ يه‌گ وه‌ل يه‌كا تا رێ بكه‌فن و وه‌ ده‌س براى بخه‌نه‌ مل يه‌كو بچن ئه‌را به‌غدا پايه‌ته‌خت عيراق؟.

 

يه‌يشه‌ له‌ وه‌ختێگه‌ ك خود سه‌رۆكايه‌تى هه‌رێم و كورديش له‌ى ئاڵوزييه‌، داواى هه‌قه‌يل هويرده‌ترو كردارى ئه‌كه‌ن و ئه‌وه‌يشه‌ ئه‌ى جاره‌ بێده‌نگ نيه‌. هه‌ر ئيچنه‌يشه‌ يه‌ بێجگه‌ له‌وه‌سه‌ هناى ك پشتێوانه‌يل ‌ئقليمى ليسته‌يل گه‌ورا بێده‌نگ نامێنن، به‌ڵكو ئه‌وانه‌يش خوه‌يان جه‌مه‌سه‌ر تر كێشانه‌.

له‌يره‌ ئه‌گه‌ر هاتو رێكه‌فتنێ وه‌رجله‌ يه‌گ له‌ هه‌ولێر چالاك كرياو چه‌ن پۆستێگ چالاكه‌و بوى دريا وه‌ خود ليست عيراقيه‌، نه‌ جوى وه‌گ وه‌رجله‌ يه‌ بوى، ئايا يه‌ ئه‌دێ وه‌ مه‌مه‌ر ئارامى؟. بێگومان ئه‌و ئه‌گه‌ره‌ به‌ش بكريه‌يدو ماوه‌ى ئه ‌به‌شه‌و كردنيشه‌ فره‌ كوڵه‌.

چون ك خود كێشه‌يل بڕێگ ده‌س كه‌فت گه‌وراتر ئه‌دێ وه‌ مه‌مه‌ر كێشه‌يل ك ئه‌ى ده‌س كه‌فته‌يله‌، هه‌ڕه‌شه‌ى ماڵكى له‌قه‌و بكا، فره‌ زامه‌ته‌ تا وه‌ چالاك كرياى بريه‌نه‌ ده‌س كورد يا عيراقيه‌يش. ئه‌را يه‌ له‌ى ئه‌گه‌ره‌ هويچ ئومێدێگ نيه‌ ئه‌را ئارامى ئه‌ى وه‌زه‌، له‌ ئه‌گه‌ر تر، ئه‌گه‌ر باس له‌ ئاڵشته‌و كردن مالكى بكريه‌يد، هه‌ر له‌ ناو ليسته‌گه‌ى خوه‌يان كه‌س تر ديارى بكريه‌يد، يه‌يشه‌ وه‌ هويچ شێوه‌ى ليست عيراقيه‌ ئارامه‌و ناكاو كێشه‌يل چوى خوه‌يان مێنن و  بگريش ئاڵوزتره‌كه‌و بوون. له‌ وه‌ر ئه‌وه‌گ هه‌ له‌ ئيرنگه‌و فره‌ له‌ ئه‌و كه‌سانه‌يل‌ گرنگه‌ ها له‌ ژێر ئينتماى مالكى و وه‌ ئاسانى تويه‌نێد بجويلنێدان. رۆڵ كۆوه‌وبوينه‌يل و كۆوه‌وكردنه‌يل جار تر له‌ لايه‌ن كۆشك حزبه‌گه‌ى سه‌رۆك كۆمار، ئيجاريشه‌ تويه‌نێد، لايه‌نه‌يل ناكووك كۆوه‌و بكاو بره‌سنێدان لوى ئارامى. چوين ك خود تاڵبانى له‌ى ناونيه‌ ناوجيكه‌ره‌و خوه‌يشێ له‌ چاره‌ كردن كێشه‌يل ئه‌ى 9 ساڵه‌ گوزه‌يشته‌ ده‌ور خاسێ داشتيه‌ ك يه‌يشه‌ فه‌كته‌ر سه‌ره‌كى ئه‌را چاره‌سه‌ر كردنه‌، وه‌ل راسيه‌گه‌يشێ يه‌سه‌ ك خود كێشه‌يل ئمڕوو عيراق و كۆوه‌و كردن زوورم له‌ جه‌م‌سه‌ره‌يل له‌ ده‌س ته‌ك لايگ وه‌ ته‌نيا ئه‌را ماوه‌ى چاره‌سه‌رى نيه‌، به‌ڵكو پرۆسه‌گه‌ هه‌وه‌جه‌ى وه‌ له‌ باربردن ئه‌ى مه‌رجه‌سه‌ ك يه‌يشه‌ وه‌ كاركردن ئه‌را دموكراسى و ئه‌ڵوژاننێ پاك و بێگه‌رده‌ ك ره‌زامه‌ندى ته‌مام لايه‌نه‌يل وه‌ ده‌س بارێد./ش

زانا حه‌سه‌ن