ئه‌گه‌ر گوزه‌يشته‌ بخه‌يمنه‌ كنار بنيات ئاينده‌ ئه‌نه‌يم

شفق نيوز

 

ئيمه‌ خوه‌مان دژايه‌تی يه‌كتری ئه‌كه‌يم و دی شه‌كه‌ت بويمنه‌ له‌لی و نازانيم چه‌ بويشيم و چه‌ بكه‌يم، يه‌يش له‌وه‌ختيگ ك زوورم كيشه‌يلمان ڕی چاره‌سه‌ر ديريد وه‌تايبه‌ت ئه‌و كيشه‌يله‌ ك ئيمه‌ له‌تی دريغيكه‌ر نه‌ويمنه‌، به‌ڵكوو ئيمه‌ قوربانيه‌يلی بويمنه‌.

ئيمه‌ قوربانی بار قه‌يراندار عراق و قوربانی كيشه‌يل چاره‌سه‌رنه‌كرياگ رووژگاره‌يلی بويمنه‌ وه‌تايبه‌ت كيشه‌ی تايفه‌گه‌ری و ره‌گه‌زی و نه‌خوه‌شه‌يل تر كوومه‌ڵايه‌تيه‌گه‌ی و بيجگه‌ كوده‌تاو جه‌نگه‌يله‌ خويناويه‌گه‌ی و رويداگه‌يل تر ك له‌هساو نايه‌يد.

گرينگ ئه‌وه‌سه‌ نه‌بايه‌د بويشيم ك گشت كيشه‌يل له‌ يه‌ك لايه‌نه‌و چاره‌سه‌ر ئه‌كريه‌ن مادام لايه‌نه‌يل تر په‌يوه‌نديدار وجوود له‌تی ديرن، وه‌لی ئيمه‌ ئه‌تويه‌نيم مه‌ڵهه‌ميگ دابين بكه‌يم ئه‌را ساڕيژكردن زيه‌مه‌يل كويه‌نمان و پيشنياره‌يلمان دوباره‌وه‌ بكه‌يم، چوينكه‌ هه‌ر بايه‌سه‌ ڕی تازه‌ هه‌ڵوژنيم و ئه‌وله‌وياتمان له‌تی دياری بكه‌يم تا خه‌وه‌يلمان جيوه‌جی بدێ و نه‌فه‌وتيه‌يد، چوينكه‌ له‌ی حاڵه‌ته‌ ئه‌زره‌ته‌يلمان وه‌ فه‌وتيان له‌دايگ ئه‌دێ و جوور مه‌رگيگ راسكانيه‌ ئه‌رامان، ك هه‌ر له‌وه‌ر ئه‌وه‌يش ته‌نانه‌ت ئه‌گه‌ر خه‌ياڵيشه‌ خواست ئه‌وه‌سه‌ خه‌وه‌يلمان له‌ ئه‌وله‌ويات بدێ و هه‌وڵ ئه‌وه‌ بيه‌يم باريمنه‌ی وجوود، ك ئی خه‌ياڵيشه‌ ته‌نانه‌ت ئه‌گه‌ر هويره‌وكردنيش بويه‌و له‌بان زه‌وی واقع و هويچ وجووديگيش نه‌ياشت گرينگ ئه‌وه‌سه‌ باوه‌ڕ داشتويم ك پشت وه‌خوه‌مان و توانامای خوه‌مان بووه‌سيم.

رووڵه‌يل پيكهاته‌گه‌مان بيجگه‌ مه‌ردمان تر ك باوه‌ڕ وه‌ كيشه‌ ره‌واگه‌مان ديرن بايه‌سه‌ ده‌نگ وژدانيان بژنه‌فن، چوينكه‌ گشتمان ئی ده‌نگه‌ ئه‌ژنه‌فتيم و ئی بانگه‌وازيشه‌ ك مه‌رامی له‌ ئيمه‌س ئه‌را ماوه‌يگه‌ ناژنه‌فيمنه‌ی، چوينكه‌ گووشمان له‌هه‌نای كپ كرديمنه‌، مانای ئه‌وه‌سه‌ با سه‌رله‌نوو ئی بانگه‌وازه‌ بژنه‌فيم تا بتويه‌نيم جواوی وه‌ربگريم له‌ دڵه‌و نه‌ك له‌ كه‌سه‌يل تر.

ئمجا با كه‌ميگ دوير بگريم له‌ی ژان و غه‌ڵه‌ته‌يله‌، چوينكه‌ ئه‌را ماوه‌يگه‌ ئيمه‌ له‌ناو بازنه‌ی غه‌ڵه‌ته‌يل پيچ خوارديمه‌، هه‌ر له‌وه‌ر ئه‌وه‌يش له‌جيای ئه‌وه‌ك پايه‌يلمان بخستايمنه‌ ده‌يشت بازنه‌گه‌، وتيايم ده‌رفته‌يلمان ته‌مام بوی و ئه‌وه‌ك رويدا تازه‌ رويدا و دی ئه‌راچه‌ خوه‌مان بخنكنيم له‌ كه‌ش وهه‌وايگ ك فيشتر له‌ جاران له‌ بانمان چه‌سپيا له‌جيای وه‌رده‌وامی له‌ی باره‌ ك له‌تی ژيه‌يم، چوينكه‌ ژيان ته‌نيا قانجاز و زه‌ره‌د نيه‌و ئيمه‌ی فه‌يليه‌يليش له‌ی ئاست ئيسه‌يشه‌ توانای سه‌ركه‌فتن ديريم، ئمجا جارجاريگ دوينيد سه‌ركه‌فتگ يه‌كه‌م مه‌رج نيه‌ ده‌ربكه‌فيد، به‌ڵكوو سه‌ركه‌فتن وه‌رده‌وام يا وسياگ ئه‌را ئيمه‌ خواست وه‌ ئه‌وه‌ ئه‌كا توانای فيشتر باريمنه‌ كار ئه‌را وه‌رده‌وامی و وه‌رگه‌گرتن جوور ئاده‌ميزاديگ كه‌مئه‌ندام ك وه‌ردوامه‌ له‌ ژيان و به‌خشينی و خوه‌ی نايه‌ده‌ ده‌س جه‌ور رووژگار و سه‌ركه‌فتنه‌يليگ ئه‌يه‌ريده‌ ده‌س كه‌سه‌يل ساق نايه‌رنه‌ی، چوينكه‌ باوه‌ڕ وه‌ ئه‌وه‌ ديريد ك سروشت چوار وه‌رزه‌و ژيان له‌تی زه‌ره‌د و قانجازه‌.

دی هه‌ر له‌وه‌ر ئه‌وه‌يش هه‌ر فه‌يلييگ له‌ هه‌ر شوونيگ و هه‌ر باريگ ئه‌رای هه‌س ئاره‌زوومه‌ند بدێ و ئه‌ركيشی ئه‌وه‌سه‌ جيوه‌جی ئه‌و ئاره‌زووه‌يله‌ بكا، چوينكه‌ وه‌ده‌سهاوردن ماف به‌شيگه‌ له‌ جيوه‌جيكردن ئه‌رك، وه‌ل ئه‌وه‌يشا يه‌يش له‌ هوير ناوه‌يم ك گشت عراقيه‌يل گيرهاتنه‌ وه‌ده‌س جه‌نگيگه‌و ك بريگ له‌ليان هان وه‌ل هه‌ق و ئه‌و بڕيگيش ناهه‌ق و شوونيگيش نيه‌ ئه‌را وسيان وه‌بی لايه‌نی، ك هه‌ر وه‌و خاتريشه‌ ئه‌گه‌ر گوزه‌يشته‌ نه‌خه‌يمنه‌ كنار هويچ ئاينده‌يگ نه‌يريم.

عه‌لی حسێن فه‌يلی

ج . أ