جه‌له‌ولا- خیزانه‌یل كورد سه‌رله‌نوو ئاواره‌ بوون

شفق نيوز

خێزانه‌یل كورد ناحیه‌ى جه‌له‌ولا هیشتنه‌ جى، و ئاماژه‌یش وه‌وه‌كردن ك ئى خێزانه‌یله‌ ڕوى كردنه‌سه‌ شار و شارۆچكه‌یل هه‌رێم كوردستان.

ئى كاریشه‌ دویاى ئه‌وه‌ هات ك دو سه‌یاره‌ى مینریژكریاى له‌ دو هه‌فته‌ى گوزه‌یشته‌ له‌ى شاره‌ ته‌قیانه‌وه‌ و بوینه‌ مایه‌ى كوشتن و زه‌خمداربوین شماره‌ى فره‌یگ مه‌ردم ناحیه‌گه‌، و له‌ وه‌خت خوه‌ى سه‌رچاوه‌یل پزیشكى ئه‌وه‌ ئاشكراكردن گشت قوربانیه‌گان كوردن.

ئه‌نوه‌ر میكائیل به‌ڕێوه‌به‌ر ناحیه‌ى جه‌له‌ولا ئه‌را ئاژانسه‌یل خه‌وه‌رى ئه‌وه‌ ئاشكراكرد ك :"ناسه‌قامگیرى و مه‌ترسیه‌یل ئاسایشى هووكاره‌یل كاریگه‌ریگن له‌ كووچكردن كورده‌یل له‌ى ناحیه‌"، زیاتریش وت :" دویاى خودكیشان هێزه‌یل ئاسایشى كوردى له‌ جه‌له‌ولا و حه‌وز حه‌مرین له‌ ئان ئۆپه‌راسیۆنه‌گان مژده‌ى خه‌یر (بشائر الخیر)، كورده‌یل دى هس وه‌ نائارامى كردن و له‌بان ژیان خوه‌یان ترسیان".

ئه‌نوه‌ر میكائیل زیاتریش وت:" سه‌ركردایه‌تى كورد غه‌ڵه‌ت تاریخییگ كرد ده‌رهه‌ق ناحیه‌ى جه‌له‌ولا و ناوچه‌یل كوردى له‌ حه‌وز حه‌مرین، وه‌ختى بریار دان له‌ى ناوچه‌ى گه‌ورا خوه‌یان بكیشنه‌وه‌، چوینكه‌ نه‌بایه‌د له‌یرا ده‌ربچیاتان".

به‌ڕێوه‌به‌ر ناحیه‌ى جه‌له‌ولا له‌بان ئه‌وه‌یشه‌ جه‌خت كرد ك :" كورده‌یل وه‌ خودكیشاننیان له‌ى ناوچه‌یله‌، واز له‌ هه‌قه‌یل سیاسى خوه‌یان هاوردن".

سه‌رچاوه‌یگ ئاسایشى له‌ ناحیه‌ى جه‌له‌ولا مه‌سه‌له‌ى وجوود هێزه‌یل ئاسایشى و سه‌ربازى و هێزه‌یل نائاسایى(ته‌وارى) ك له‌ عه‌ره‌به‌یل پیكهاتیه‌" بووده‌ مایه‌ى ناڕه‌زایه‌تى مه‌ردم كورد له‌ ناحیه‌گه‌ ك ڕووژانه‌ وه‌لیانا تویش گیر و گرفت تیه‌ن، ئه‌وه‌ بیجگه‌ هه‌ڕه‌شه‌ى تیرۆریسته‌یل".

به‌رێوه‌به‌ر ناحیه‌ى جه‌له‌ولا داوا له‌ سه‌ركردایه‌تى سیاسى كوردى كرد وه‌ هێزه‌و بانه‌و ئه‌را ناوچه‌یل جه‌له‌ولا و حه‌وز حه‌مرین و ئه‌رك پاراستن گیان كورده‌یل ئه‌و ناوچه‌یله‌ بخه‌نه‌ مل خوه‌یان".

ئارام مه‌حه‌مه‌د هاووڵاتییگه‌ خه‌ڵك جه‌له‌ولا ، له‌ ناحیه‌گه‌ سه‌ر خوه‌ى هه‌ڵگردیه‌، وت :" هاتن هێزه‌یل كوردى ئه‌را ناوچه‌گه‌ وره‌ یا مه‌عنه‌ویاتمان به‌رزه‌و كه‌ید و شعوور وه‌ ئارامى به‌خشیده‌ پیمان، و له‌ هه‌مان وه‌خت گیان وه‌یه‌كه‌وژیان بته‌وه‌و كه‌ید و تیه‌ریده‌وه‌ى ئه‌را بان ریگه‌ى خوه‌ى".

هه‌رچه‌نى ك هێزه‌یل هاوبه‌ش له‌ پۆلیس هه‌رێم كوردستان و له‌شكر عیراق هان له‌ خاڵ وشكانن شێخ باوه‌، له‌ ناوبه‌ین جه‌له‌ولا و قه‌زاى كه‌لار، وه‌لى كورده‌یل نیشته‌جاى ناوچه‌گه‌ داوا كه‌ن ك هێزه‌یل هاوبه‌ش كوردى و عه‌ره‌بى و ئه‌مریكى كاراوه‌ بكریه‌ن ئه‌را مقه‌یه‌تى كردنیان.

ئۆپه‌راسیۆن مژده‌ى خه‌یر له‌ یه‌ك ئاب ساڵ 2008 ده‌س كرده‌ پى و له‌هه‌مان ڕووژ سه‌ركردایه‌تى كوردى بڕیاردا هێزه‌یلى له‌ ناوچه‌ى حه‌وز حه‌مرین بكیشیده‌و.

شایان باسه‌ ك ناحیه‌ى جه‌له‌ولا كه‌فتیه‌سه‌ دویرى 30 كێلومه‌تر له‌ باشوور ڕووژئاواى قه‌زاى خانه‌قى(70 كلم له‌ باكوور باقووبه‌) ، و ڕویوه‌ره‌گه‌یشى 17500كم چوارگووشه‌یه‌ و شماره‌ى مه‌ردمه‌گه‌ى 80هه‌زار كه‌سه‌، و 36 ئاوایى دیرى و 27 عه‌ره‌بن و 9 ى كوردن.