ناوه‌ راسكانیه‌گه‌ى زه‌رده‌شت چه‌ بوى؟

شفق نيوز

باسیگ وه‌ى جووره‌ كه‌فیگه‌ وه‌رچه‌و ك له‌تى ئه‌وه‌ ده‌رخه‌یگ و ئویشیگ: زه‌رده‌شت یه‌كه‌م په‌یامهاوه‌ر بویه‌ له‌بان ئى گووشه‌ى زه‌ویه‌ ك باوه‌ڕ وه‌ یه‌گانه‌یى خوداوه‌ند گه‌ورا داشتگه‌ ئه‌یه‌ له‌لایگه‌و‌. له‌لایگ تریشه‌و عماده‌دین ده‌وڵه‌تشاهى ناو زه‌رده‌شت وه‌ى جووره‌ له‌یه‌كه‌و داگه‌و ئویشیگ: زه‌ره‌ساوشه‌ته‌رئائى، "زه‌ره‌" وه‌ ماناى ته‌ڵاو شه‌وق ته‌ڵاگه‌و "ساو"یش وه‌ ماناى جریوه‌دار و " شه‌ته‌ر"یش وه‌ ماناى وارین و "ئائى"یش وه‌ماناى هاتن یا هاتنه‌وه‌س، ك گشت ئى وشه‌یله‌ وه‌یه‌كه‌و ماناى(وارین و جریوه‌داین شه‌وق ته‌ڵایى خوه‌ر) ده‌یگ.

"پیر شالیار"یش ك یه‌كیگه‌ له‌ پیره‌یل متمانه‌دار یارسانه‌یل، له‌ به‌رهه‌مه‌گه‌ى خوه‌ى وه‌ناو(ماریفه‌ت)، زه‌رده‌شت وه‌" سیمیار" تاریف كردگه‌، ك وه‌ شعره‌و‌ ئویشیگ: (گۆشت بڕوانه‌ پیر شالیار بۆ ..... هۆشت جه‌ كیاسته‌ى زاناى سیمیار بۆ)، یه‌یش وه‌و مانا، ك گووش بیه‌ قسه‌ى پیر شالیار و خوه‌د بیه‌ ده‌س نویساننه‌یل زاناى سیمیار، یه‌یش له‌ فه‌رهه‌نگ دێهخودا له‌وه‌رگ 13 كه‌فیگه‌ وه‌رچه‌و.

ئه‌گه‌ریش لاپه‌ڕه‌یل(ئه‌وێستا- نامه‌ى مینه‌وى زه‌رده‌شت) به‌یمنه‌ یه‌كا، وه‌ى جووره‌ باس له‌زه‌رده‌شت كریاگه‌و ئویشیگ: زه‌رده‌شت ناو پیاویگ  زاناى گه‌ورا بویه‌ له‌ ئێڵ (سپیته‌مان) و هه‌ر وه‌ك چوین وه‌ دینه‌یل تر ئویشن مه‌سیحى و بودایى و موسڵمان، وه‌ى دینیشه‌ ئویشن دین زه‌ره‌ده‌شتى و یه‌یش ده‌لیل ئه‌وه‌ نیه‌ ك ناو په‌یامبه‌ره‌گه‌ى زه‌رده‌شت بوود، ئنجا وه‌ قه‌وڵ و قه‌راره‌ ك له‌كتاو ئه‌وێستا كریه‌یگه‌ دى، ك مامۆستا پورداوودلى له‌یه‌كیه‌و داگه‌، له‌دین زه‌رده‌شت كه‌سه‌یل فره‌یگ پله‌و پایه‌ى گه‌ورا  داشتنه‌ ك له‌شوون په‌یامبه‌ر گه‌ورا ئه‌وانه‌ك له‌چوارچیوه‌ى جه‌هان بوینه‌سه‌ خه‌لیفه‌و جینشین ئه‌و، هه‌ر وه‌ زه‌رده‌شت ناویان بریاگه‌.

كتاو ئاڤێستا جویر ئه‌وه‌ك باس كریاگه‌، 21 نه‌سك(كتاو) بویه‌، وه‌لى هه‌ر ئه‌وه‌نه‌ له‌لى مه‌نده‌سه‌وه‌ ك ئیسه‌ له‌بانى قسه‌ كریه‌یگ، هه‌ڵبه‌ته‌ ئه‌گه‌ر ئه‌و به‌شه‌یلیشى بمه‌نداگ شایه‌ت زانیارى زیاتریگ بزانستایم له‌بان دانه‌ر و په‌یامبه‌ر و چوینیه‌تى هویروڕاى زیاتر، وه‌لى وه‌گووره‌ى ئه‌وه‌ك له‌لى مه‌نده‌سه‌وه‌ به‌شه‌ زانیارییگ وه‌رگیریاگه‌و ئه‌و باقى زانیاریه‌یلیش وه‌گووره‌ى په‌یڕه‌وكاره‌یل و جینشینه‌یلى كه‌فته‌سه‌ ده‌س، وه‌تایبه‌ت له‌ پیره‌یل و ناوداره‌یل هه‌مان ریڕه‌وه‌گه‌ى خوه‌ى.

هه‌ر له‌وه‌ر ئه‌وه‌یش دوینیم پیر شالیار ك یه‌كیگه‌ جویر پیر ته‌ریقه‌ت له‌لاى په‌یڕه‌وكاره‌یلى، ناو زه‌رده‌شت وه‌(سیمیار) بردگه‌و یه‌یش نزیكترین سه‌رچه‌وه‌یگه‌ له‌باوه‌ت زانیارى له‌بان دینه‌گه‌و خود زه‌رده‌شت.