رووشنهويركردن كومه‌ڵگا له‌باوه‌ت ماف ژنه‌يل

شفق نيوز

هيمان كومه‌ڵگا وه‌رانوه‌ر وه‌ مافه‌يل ژن ئاڵشتكاری خاسيگ وه‌ خويه‌و نه‌يه‌و تائيسه‌يش‌ كومه‌ڵگا گرفتاريشه‌ وه‌ده‌س چاره‌نويس شته‌يل فريه‌يگ و له‌وانه‌يش مه‌سه‌له‌ی ماف ژنه‌يل، ك هه‌ر وه‌و خاتريشه‌ ئه‌تويه‌نيم بويشيم كومه‌ڵگا له‌ ئاست ژنه‌يل هسيار نيه‌و هيمان بانگه‌واز مافه‌يل ژنه‌ نه‌كردگه‌و هه‌ر كويه‌نپه‌رستانه‌ مامڵه‌ ئه‌كا له‌ژير ناو مقه‌يتيكردن كه‌رامه‌ت و شه‌ره‌فپاريزی.

رووشنهويركردن وهسياركردن كومه‌ڵگاو پيشخستنی له‌باوه‌ت ماف ژنه‌يل و له‌وه‌رچه‌وگرتن ئی مه‌سه‌له‌ له‌ی تا راده‌ی فريه‌يگ ئه‌رك رووشنهويره‌يله‌ وه‌ به‌رزه‌وكردن ده‌نگ كاريگه‌ر و بنياتنه‌ر ئه‌را فراوانكردن مافه‌يل بنه‌ڕه‌تی، چوينكه‌ كلتوور كوومه‌ڵگا تا ئيسه‌يش دژ ئازادی ژنه‌يله‌ له‌ كرده‌وه‌يل فريه‌يگ و ڕی وه‌ هوير ورای ژنه‌يل نه‌ياگه‌ ئه‌را ئه‌نجامداين و ده‌رخستن هوير هاوبه‌ش.

هه‌ر له‌وه‌ر ئه‌وه‌يش ئويشيم خه‌بات و هه‌وڵداين ئه‌را يه‌كسانی مافه‌يل ناونی ژن و پياو له‌ گشت لايه‌نيگه‌و دابينكردنيگه‌ ئه‌را به‌شداری ئی چينه‌ له‌ كومه‌ڵگا له‌ژيان سياسی و مه‌يدان ئابووری و كاره‌يل پيشه‌يی تا ره‌سيده‌ ئازادی ئشق و ماف وه‌يه‌كه‌و ژيان و ماف جيايی...هتد.

وه‌ل ئه‌وه‌يشا ناژاركردن ده‌سڵاتيش ئه‌را داناين هه‌ر بڕياريگ له‌ به‌رژه‌وه‌ندی يه‌كسانی و كه‌مه‌وكردن سه‌ختی و مه‌ينه‌تيه‌يل ژن و ده‌سهه‌ڵگرتن پياو له‌ تون وتيژی و ئازارداين ژن جووره‌ پيشكه‌فتن گه‌ورايگه‌ ئه‌را كومه‌ڵگاو مه‌ردمه‌گه‌ی.

ئمجا مه‌ندن هه‌ر تون وتيژييگ لاشه‌يی و ده‌روينی و جياسازی وه‌رجه‌ ئه‌وه‌ك زه‌ره‌د وه‌و ژن و دويه‌ته‌يله‌ بڕه‌سنيد زه‌ره‌د ره‌سنيده‌ تاكه‌يل و خيزان و مه‌ردم كومه‌ڵگا، يه‌يش ئه‌دێده‌ مايه‌ی پيشنه‌كه‌فتن بوار رووشنهويری و له‌كه‌داركردن ره‌فتار و هه‌ڵسووكه‌فت ئاده‌ميزاد و هه‌ميشه‌ زوڵم وه‌رده‌وام پياوسالارييش له‌بان ژنه‌يل چاره‌سه‌ر ئه‌و خوين و مشتومڕ و تون وتيژيه‌ ناكا ك وه‌رده‌وام له‌ وڵاته‌يل پيشكه‌فتن هه‌وڵ له‌ناوبردنی دريه‌يد.

مه‌حموود ره‌مه‌زان

ج . أ