كویزه‌گه‌ نه‌شكیا

شفق نيوز

 

خه‌ریك بوى كویزه‌ى ئاینده‌ى هاوبه‌ش بشكیه‌ێد و  ئه‌را یه‌كجارى عراق بووده‌ دووزه‌خه‌گه‌ى جاران و ده‌وران حكوومه‌ته‌یل شۆفێنى و دى چشتیگ نه‌مینێد وه‌ ناو عراق تازه‌.

 

ئه‌گه‌ر په‌لامار سه‌ربازى روى بیاتاد، ئه‌وه‌ گرنگ نه‌وى ك گورز له‌لى دریاو زه‌ره‌د مه‌یدانى كه‌فته‌وه‌رى، چوینكه‌ بنه‌ڕه‌ت مه‌سه‌له‌گه‌ ئه‌وه‌سه‌ دڵ هه‌ردوگلا وه‌ تایبه‌ت دڵ كورد ئیچنه‌ شكیا مه‌گه‌ر ده‌ورانیگ تر چشتیگ بقه‌ومیه‌ێد دڵ شكیاگ خاسه‌و بكا.

 

نزیكه‌ى 10 ساڵه‌ كورد وه‌ل عراقیه‌یل دیمۆكراسیخواز ره‌نج فه‌رهاد ده‌ن و كوچگ     بیستوین تاشن و سه‌رمایه‌ ئه‌ڕاى كه‌ڵه‌كه‌ كه‌ن. ئى هه‌وڵ و ته‌قلا له‌ وه‌هار 2003 له‌ 9/3/2003 له‌وه‌خت ئازادكردن عراق ده‌س وه‌پیكردو له‌ وه‌هار ئاینده‌ بووده‌ 10 ساڵ ته‌واو له‌ ره‌نج و ته‌قلاكردن.

 

ئه‌وه‌ بوى 10 ساڵ وه‌ 10 رووژ دریا واوه‌و له‌یه‌یش بازنه‌گه‌ى مالكى زوورمینه‌ كه‌فێده‌ به‌شى، شایه‌د به‌شه‌گه‌ى كوردستان هه‌ر چه‌نه‌ (17%)ه‌گه‌ى بوود. ئایا چه‌ بكه‌یم ئه‌را خاسه‌وكردن بارودوخه‌گه‌و ئه‌را مقه‌یه‌تى له‌ مه‌سه‌له‌ى كورد و كوردستان؟

 

وه‌رجه‌ گشت چشتیگ بایه‌د كورد پایه‌یل خوه‌ى له‌ حكوومه‌ت عراق بته‌و بكاو نه‌فه‌وتنێده‌ى، چوینكه‌ نه‌یاره‌یل خوازیارن ئیمه‌ ئه‌و ده‌سكه‌فته‌یله‌ له‌ ده‌س بیه‌یم و له‌ كیشمه‌كیش سیاسى هویچ له‌وه‌رده‌س نه‌یاشتویم.

 

ئمجا بایه‌د وتار ئاشتیخواز سیاسى وه‌ل وتار هه‌قه‌یل ره‌وا هامیته‌ بكه‌یم، وه‌ جووریگ ك نه‌ له‌ترس هه‌ڕه‌شه‌یش هه‌قه‌یل ره‌وا بشاریمنه‌و و  نه‌ زووان داواكاریمانیش ئیچنه‌ زبر بوود دووسه‌یلمان بتاڕنێد و مه‌هانه‌ بیاده‌ ده‌س نه‌یاره‌یلمان تا مه‌ردمان خوه‌یان له‌ دژمان هان بیه‌ن، به‌ڵكوو بایه‌د وتار هه‌قه‌یلمان ئاشكراو زووانه‌گه‌یشى كه‌مانكیش بوود.

 

وه‌ل ئه‌وه‌یشا بایه‌د بزانیم ئى گرژیه‌ چه‌نیگ قویل بوود و چه‌نیگیش وه‌خت بواد هه‌ر ته‌واو بوود. گشت ته‌نگییگ كووتایه‌گه‌ى ده‌رفه‌ته‌ ئه‌را وه‌دیكردن كه‌لین و كه‌م و كوڕیه‌یل و داناین به‌رنامه‌ ئه‌را قوناغ ئاینده‌، ك یه‌یش به‌شه‌گه‌ى كورده‌، ئمجا به‌شه‌گه‌ى هاوبه‌شه‌یل عه‌ره‌بیش خوه‌یان زانن.

 

ئه‌وه‌ بوى ئى جاره‌ كویزه‌گه‌ نه‌شكیا، ك شایه‌د یه‌یش دویا ده‌رفه‌ت بوود( ك یه‌یش خودا خوه‌ى زانێد).

 

ستران عه‌بدوڵڵا

ج. ا  ‌