فه‌يليه‌يل..كورد نه‌خوازرياگ و شيعه‌ی‌ خراو

شفق نيوز

بيبه‌شی گشتلايگ گرته‌سه‌و، چ كورد چ عه‌ره‌ب يا سنی يا شيعه‌، وه‌لی ريژه‌ی بيبه‌شی له‌لای كه‌مينه‌يل نه‌ته‌وايه‌تی و ئايينی فريه‌ فيشتره‌. ئمجا پيكهاته‌ی فه‌يليمان چوينكه‌ به‌شيگن‌ له‌ شيعه‌ دی هه‌ر بايه‌سه‌ رووڵه‌يلی باج و زه‌كاته‌يل تر بيه‌ن ك ها له‌ زمه‌تيان، ك يه‌يش فريه‌جار له‌ ته‌قينه‌وه‌يل ترۆريستی ده‌رئه‌كه‌فيدو به‌ش بيگومانيگ ديريم و سه‌دان شه‌هيد و هه‌زاران زه‌خمدارمانيش به‌ڵگه‌ی ئی راسيه‌نه‌.

وه‌لی له‌لايه‌ن نه‌ته‌وه‌ييه‌و، له‌ حاڵه‌ت هه‌ر گرژييگ له‌ پرووسه‌ی سياسی و خراوبوين په‌يوه‌نديه‌يل له‌ئاكام هه‌ر هه‌ڕه‌شه‌و وجووديگمان له‌ خه‌ته‌يل نوايين، دوينيد ك ئاقبه‌تی ئه‌ڕه‌سيده‌ كوشتن و راوناين و ئه‌را يه‌يش حاڵه‌تيليگ راسكانی هه‌ن.

له‌وه‌رانوه‌ر گشت ئه‌يانه‌يش پرسياريگ دوباره‌كرياگ هه‌س، ك ئه‌ويش ئه‌وه‌سه‌ برايه‌يلمان له‌ نه‌ته‌وه‌و مه‌زه‌و و رووڵه‌يل تر ئی ملله‌ت عراقه‌ چوين مامڵه‌ وه‌لمانا ئه‌كه‌ن؟ ئيمه‌ گشتمان له‌يوا مه‌سه‌له‌يگ ده‌يمنه‌ يه‌كاو چشت ئاشكرايگه‌ ك شيعه‌ موجامله‌ی فه‌يليه‌يل ئه‌كه‌ن، چوينگه‌ ئيمه‌ خزمه‌ت وه‌ شيعه‌ی عراق ئه‌كه‌يم له‌ڕوی زيايه‌ی ريژه‌يان له‌وه‌خت به‌راوردكردن وه‌ل مه‌زه‌وه‌يل تر و پابه‌نديم وه‌ درووشمه‌يل مه‌زه‌وايه‌تی، ك هويچ خه‌رجيگ ئه‌را ئه‌وان نه‌يريد و ئيمه‌ گرديمه‌سه‌ی خوه‌مان.

وه‌لی كورد توانای حاشاكردن ره‌سه‌نايه‌تی و قوربانی و پايه‌مان نه‌يرن له‌ جمشت ئازاديخواز كورد ك به‌شداريكردنمان له‌تی وه‌ مه‌يل و خوه‌يبه‌خشی خوه‌مان بويه‌، ك وه‌ بوونه‌ی قوربانيه‌يلمان له‌بان ئاست له‌ناوبردن وه‌جه‌م و گشت ئه‌و كاره‌ساته‌يله‌ ك هاته‌ تويشمان هيمان هه‌وه‌جه‌يش‌ وه‌ پشتگيری كيشه‌ی ره‌وای ملله‌ت كوردمان ديرن و ئمڕوويش هه‌ر چين و پيكهاته‌يگيش هوير و هساو خوه‌ی ديريد وه‌گووره‌ی پله‌وپايه‌و به‌شداريكردنی له‌ پرووسه‌ی سياسی، ك هه‌ر وه‌و خاتريشه‌ ئمڕوو نه‌وه‌يل فه‌يلی له‌ بوار سياسه‌ت له‌و ئاست مه‌ردمان تره‌ نيه‌و نه‌خش سه‌ركردايه‌تی نه‌يرن نه‌ له‌ناو حزبه‌يل شيعه‌ نه‌يش له‌ناو كورد.

وجوود پيكهاته‌يل جياجيای عراقی ئاشكراس له‌ بوار ئابووری و رووشنهويری و كوومه‌ڵگاو..هتد، وه‌ل ئه‌وه‌يشا ده‌رفه‌ت و توانايش ديرن وه‌ بوونه‌ی پشتگيری ماددی و گيانی له‌لايه‌ن خاوه‌ن بڕياره‌يله‌و، ك وه‌و خاتريشه‌ دوينيد ئاماده‌بوين و ده‌ركه‌فتن بڕيگ ناسناو له‌ هه‌ر برياريگ يا جمشتيگ زه‌مانه‌تكرياگ وجوود ديريگ، له‌ وه‌ارنوه‌ر ئه‌وه‌يش دوينيد مه‌گه‌ر وه‌ ده‌گمه‌ن كه‌سايه‌تييگ فه‌يلی له‌ناو ئه‌و به‌شكردن و گرووپه‌يله‌ بوينيد.

شيعه‌ له‌يوا ته‌ماشای كورده‌يل فه‌يلی ئه‌كه‌ن ك خاوه‌ن ئه‌و باوه‌ڕ خواسته‌نه‌و خوه‌يان گوم ناكه‌ن له‌ دروشمه‌يل مه‌زه‌وی، يه‌يش وه‌چه‌واشه‌ی سياسه‌ت و بواره‌يل تر، كورديش هان له‌و باوه‌ڕه‌ ك هه‌رچی بدێ كورد فه‌يلی حاشا له‌ نه‌ته‌وه‌ی خوه‌ی ناكاو له‌لی ناترازيه‌يد، ك يه‌يش بيجگه‌ ئه‌وه‌ك له‌ هويره‌و بريانه‌و دويره‌و خريانه‌ له‌ گشت بواره‌يليگ.

وه‌ل ئه‌وه‌يشا مه‌ردمان تريش هوير له‌و چشته‌ ئه‌كه‌ن ك باوه‌ڕ وه‌پی ديرن و ئيمه‌يش بايه‌سه‌ له‌ بانمان باوه‌ڕ وه‌ ئه‌وه‌ بكه‌يم ك نيشانه‌ی ئاشكرايگ هه‌س له‌لايه‌ن مه‌زه‌وی و لايه‌ن نه‌ته‌وه‌يی، ك ئه‌ويش ئه‌وه‌سه‌ هويچ يه‌كسانييگ نيه‌ له‌ڕوی قوربانيه‌يل و ته‌نانه‌ت ئه‌و ده‌سكه‌فته‌يليشه‌ ك هاتنه‌سه‌ ده‌س، ئمجا ئه‌گه‌ر بويشيم ئيمه‌ شيعه‌ی خراو و كورد نه‌خوازرياگيم ئه‌يه‌ هويچ چشتيگ له‌واقع ئالشت ناكا، چوينكه‌ راسيه‌گه‌ دياره‌و ها وه‌رچه‌ومان.

عه‌لی حسێن فه‌يلی

ج . أ