خوه‌ر حاشاكردن

شفق نيوز

ئاشكراس ئه‌را گشتمان ئه‌و قه‌وڵه‌یله‌ ك یا ئه‌وه‌سه‌ جیوه‌جى كریه‌ن یا وه‌ چه‌واشه‌وه‌، ك رووژگارمان له‌تى كه‌فتگه‌سه‌ ناونى مه‌ندن و نه‌مه‌ندن، فه‌قیرى یا ده‌وڵه‌مه‌نى، خوه‌شبه‌ختى یا سته‌م و دویاخریش ئاڵشت بوود ئه‌را یادگارى خاسیگ  یا خراویگ  و ئاقبه‌تى دیار بوود و شایه‌تیده‌ر بویمن له‌بانى.

 

 

له‌یره‌ چه‌وه‌ڕێ كه‌یم مه‌رگ بڕیار حوكم خوه‌ى ئه‌ڕامان بیه‌ێد، دى گشت ناویگ كه‌فێده‌ محراو مه‌رگ دویاى ئه‌وه‌ك وه‌ نه‌وین ژیان گیان له‌ده‌سدا، هه‌ر له‌وه‌ر ئه‌وه‌یش دوینیم باس دانایه‌یل كریه‌ێد و كرده‌وه‌یلیان له‌ژیان خه‌نه‌ڕوى له‌و كاره‌یله‌ ك ئه‌نجامى دانه‌، ئى مه‌سه‌له‌یشه‌ په‌یڕه‌و بووده‌ بان باوگم دكتۆر كامل حه‌سه‌ن به‌سیر ك شوونه‌واریگ زووانگه‌رى و ره‌خنه‌گرى هیشته‌جى وه‌ هه‌ردوگ زووان عه‌ره‌بى و كوردى.

 

ئه‌وه‌ بوى له‌ناونى ئه‌وانه‌ك حورمه‌ت نان له‌ زانست و ئه‌ده‌به‌گه‌ى و له‌لیانیش خوه‌ندكارى بوین و حاشا له‌و پیاوه‌ كردن ك ئه‌وسا وه‌خته‌یل خوه‌ى ئه‌ڕایان ته‌رخان كرد و هه‌وڵدا هووكاره‌ى زانستیان بكا تا بڕه‌سنه‌ پۆسته‌یل ئدارى گه‌ورا جوور ته‌خت عه‌مید زانكۆیه‌یل و پۆسته‌یل ئه‌ده‌بى ك ئیسه‌ ده‌نگیان ژنه‌فیه‌ێد.

 

له‌هه‌مان وه‌خت دوینیم كه‌سه‌یل فره‌یگیش هه‌ن ئه‌را ئه‌وه‌ك هۆڵیگ وه‌ناو به‌سیر ناو بنریه‌ێد و ئى كاره‌ ئه‌نجام نیه‌ن و جوور مننه‌تیگ زاننه‌ێ!!، وه‌لى ئایا ئه‌وانه‌ ئه‌را كى قاپى به‌خشین واز كه‌ن و ئه‌را كى ته‌قلا كه‌ن، له‌وه‌ختیگ به‌سیر ها وه‌رچه‌ویان ك چوین بریا وه‌ره‌و ئاسایش گشتى ئه‌را پرس و پرسكارى ئه‌را ماوه‌ى 9 سه‌عات وه‌ردوام وه‌ بوونه‌ى راپۆرتیگ ك كابرایگ  كینه‌تدار له‌بانى نویسا له‌وه‌خت خوه‌ى و تویش ئه‌و ده‌رده‌سه‌رى و گرفت هات.

 

گشت ئى مه‌سه‌له‌یل پڕ له‌ ژانه‌ هیلیمنه‌و ئه‌را ئه‌وه‌ك وه‌پى به‌رزه‌و بویمن و نامه‌یگ ماسته‌ر له‌چاپ ده‌یم دویاى مكوڕبوین فره‌یگ له‌ لایه‌ن چه‌ن كه‌سایه‌تییگ ك چه‌ویان كه‌فێده‌ كتاو نویر و چه‌ن تیراژیگ له‌لى به‌خشیم و ته‌نیا چه‌وه‌ڕێ چه‌ن وشه‌یگ سوپاس و رێز و حورمه‌ت یا ره‌خنه‌یگ له‌لى كه‌یم. وه‌لى دیاره‌ قسه‌كردنیش وشكه‌و بوى و گوڵه‌یل به‌لاغه‌ت ڕزیاو مه‌سه‌له‌ى رێز و حورمه‌تیش ژێر پا خریا.

 

وه‌لى بوه‌خشه‌م.. چوینكه‌ تۆ كه‌سیگ بوید وه‌ ئه‌ده‌بد خه‌ێر ئه‌را مه‌ردمان تر داشتید و ئیسه‌ حاشا له‌لید كه‌ن. وه‌لى چاره‌ نییه‌ باوگه‌! رووژیگ تیه‌ێد وه‌ سه‌رشووڕى بوینیمنه‌یان، ئیمه‌ وه‌ سه‌ربه‌رزى و ئه‌وان وه‌ په‌شیمانى.

 

گیان كامل به‌سیر

ج. ا