تا كوه‌یت وه‌مالكى نه‌خه‌ڵتیه‌ێد

شفق نيوز

جیاواز بوى، ك گوایا جیاوازى نه‌یاشت وه‌ل كه‌سایه‌تى تر وه‌رین و له‌لیان بوى وه‌ئازاو سه‌ركرده‌و پاڵه‌وان تاریفى كردو له‌لیانیش بوى وه‌ دكتاتۆر تاریفى كه‌ن ك تواێد حوكم عراق وه‌ئاگروئاسن بكاو عراق بووه‌یده‌ دویاوه‌ ئه‌را سه‌رده‌م رژیم یه‌كحزبى و قائد زه‌رووره‌، ئه‌ویش وه‌گووره‌ى پاداگرتنى له‌بان هاوردنه‌وه‌ى ده‌سڵات مه‌ركه‌زى ئه‌را وڵات و گله‌وداینى له‌ژیر ده‌سڵات خوه‌ى و په‌سه‌ن نه‌كردن فكره‌ى دامه‌زرانن هه‌رێمه‌یل ك له‌ده‌ستوور ئشاره‌ت وه‌پى كریاگه‌ وه‌مه‌هانه‌ى به‌شبه‌شه‌وبوین عراق.

ئه‌یه‌ پیاویگه‌ ره‌خنه‌گر پله‌ یه‌ك، ئه‌وه‌ك خزمه‌ت خوه‌ى بكا له‌ده‌ستوور هه‌ڵوژنێد، هه‌رچى له‌به‌رژه‌وه‌ندى خوه‌ى له‌تى نه‌ود په‌سه‌نى ناكا، وه‌ل ئه‌وه‌یشا گشت كارێگ ئه‌كا له‌وه‌ر خاتر ئه‌وه‌ك بڕه‌سیده‌ ئه‌و چشته‌ ك خوه‌ى تواێده‌ى و ته‌نانه‌ت په‌شیمانیشه‌و بوود له‌قه‌وڵه‌یلى له‌وه‌ر خاتر ئه‌و ئامانجه‌ ك خوه‌ى ده‌سنیشانى كردگه‌.

له‌یرا په‌لامار ئه‌و پیاوه‌ نیه‌یم، وه‌لى بڕیگ له‌ وتاره‌یل سیاسى و قه‌وڵه‌یلى باس كه‌یم. ئه‌را نموونه‌: له‌ساڵ 2009سه‌ردان هه‌رێم كوردستان كردو له‌ساڵ 2010یش وه‌رجه‌ هه‌ڵوژاردنه‌یل ته‌شریعى له‌عراق جاریگ تر چیه‌ كوردستان و له‌شوون ئه‌وه‌یش جاریگ تر سه‌ردان هه‌رێم كردو ناوى نا"خاڵ وه‌رچه‌رخان"له‌په‌یوه‌ندى ناونى حكوومه‌ت مه‌ركه‌زى و حكوومه‌ت هه‌رێم، ئنجا قه‌وڵ چاره‌سه‌ركردن قه‌یرانه‌یل دا وه‌ل هه‌رێم و ڕازى بوى له‌بان مه‌رج فراكسیۆنه‌یل سیاسى له‌ریككه‌فتننامه‌ى"هه‌ولێر" له‌وه‌ر خاتر دوباره‌ مه‌ندنه‌وه‌ى له‌پۆست خوه‌ى جوور سه‌رۆك وه‌زیره‌یل، وه‌لى وه‌ختى هاته‌و ئه‌را به‌غداو لایه‌نگرى سیاسى فره‌یگ وه‌رگرت په‌شیمانه‌و بوى له‌قه‌وڵه‌یلى و حاشا له‌و رییكه‌فتنه‌ كرد جوور ئه‌وه‌ك هویچ نه‌ویه‌! مالكى له‌ى ڕویه‌و ئازاس، چوینكه‌ هه‌ر وه‌ختى حاڵى بایده‌ ته‌نگ په‌نا به‌یده‌ لاى كه‌سه‌یل تر و هه‌ر وه‌ختى پشتى قایم بوود كه‌س نیه‌ناسید، هه‌ر له‌وه‌ر ئه‌وه‌یش كه‌سیگ نه‌مه‌ند له‌هاوبه‌شه‌یل به‌رزه‌ سیاسیه‌گه‌ى وه‌لیا كیشمه‌كیش نه‌كردوید چ له‌ڕى به‌رزه‌وكردن داواى دادوه‌رى یا له‌ڕى وه‌كارهاوردن توومه‌ت گه‌ناته‌كارى و ترۆریستى دژیان، جوور ئه‌وه‌ك وه‌ل جیگر سه‌رۆك كومار تارق هاشمى ئه‌نجامیدا ك سێ ساڵ مقه‌یه‌تى له‌مه‌له‌فه‌ شه‌خسیه‌گه‌ى كرد تا وه‌ختیگ ئاشكراى كرد،هه‌ر هه‌مان كار وه‌ل رافع عیساوى سه‌ركرده‌ى باڵا له‌لیست عراقیه‌و بیجگه‌ ئه‌وه‌یش مه‌له‌ف ته‌واویگ دژ سه‌ركرده‌ى خه‌ت سه‌درى موقته‌دا سه‌در ئه‌ڵگرتیه‌ ك تایبه‌ته‌ وه‌مه‌سه‌له‌ى"مه‌جید خوئى"كوڕ سه‌رچه‌وه‌ى باڵاى شیعه‌ ئه‌بو قاسم خوئى ك له‌ساڵ 2003 شه‌هید كریاو توومه‌تى كریا سه‌در و كه‌س نازانێد كه‌ى جوور وه‌ره‌قه‌یگ فشار سیاسى تیه‌رێده‌ى كار له‌دژى.

له‌وه‌ختیگیش ك مشعان جبورى سه‌ركرده‌ى فراكسیۆن ئاشتى و ئازادى بوى، دژ رینمایه‌یلى وسیا، هه‌ر له‌وه‌ر ئه‌وه‌یش خسته‌ى خانه‌ى دوشمنه‌یلى و توومه‌ت گه‌ناته‌كارى دارایى و ترۆر خسته‌ پاڵى و 15 ساڵ حوكم ئه‌ڕاى بڕیه‌و، وه‌لى وه‌ختى تواست له‌بان وه‌سیه‌ت سوریا بایده‌و ئه‌را به‌غدا، خوه‌ى وه‌ بى گونا دانا له‌و گشت توومه‌ته‌یله‌ ك خریا پاڵ جبورى و گشت چشتیگ له‌بانى لاوریاو چمان ئه‌و رووژه‌ بوى له‌دایگ په‌یا بوى!

ئنجا ئایا دویاى ئه‌و هه‌مگه‌ ره‌فتاره‌ وه‌ل ئى خاوه‌ن ئه‌قڵیه‌ته‌، دى چ ریككه‌فتنیگ یا ئمزانامه‌یگ گه‌وراى ناوده‌وڵه‌تى بكریه‌ێد؟ یه‌یش ته‌نیا هوشیارییگه‌ ئه‌را سه‌ركرده‌یل كوه‌یتى وه‌بوونه‌ى ئه‌و سه‌ردان دویاخر مالكیه‌ ئه‌را كوه‌ین و ئمزا له‌بان سه‌فقه‌ى ستراتیجى وه‌لیانا!

 

محه‌مه‌د وانى

 

ج