ڕه‌نگدانه‌وه‌ى ريككه‌فتنه‌ نه‌وه‌ويه‌گه‌ى تاران و5+1 له‌ ڕووژنامه‌یل به‌ریتانی‌

شفق نيوز

ڕوبرت فیسك له‌ ڕوژنامه‌ی ئندى پندنت ئێ پرسیاره‌ كردێه‌ ك ئایا ئێران توێه‌نێ بووگه‌ پۆلیس ئه‌مریكا له‌ ناوچه‌ى خه‌لیج؟ فیسك ئوێشێد: له‌وه‌ر ئه‌وه‌گ ئێران ڕازى بوێه‌ به‌رنامه‌ ئه‌تومیه‌گه‌ێ سنوردار بكه‌ێگ ، توێه‌نێ بووگه‌ هێزێگ گه‌ورا له‌ ناوچه‌ێ خه‌لیج و هه‌رچه‌ن سوپاى پاسداره‌ێل ئێران ته‌قالا كه‌یگ ته‌گه‌ره‌ له‌ ڕێ ڕێككه‌فتنه‌گه‌ دروس بكه‌ێگ یا ئسرائیل په‌لامار دام و ده‌زگا نه‌وه‌ویه‌گان ئێران بێه‌ێگ، وه‌لێ ئه‌و ڕێككه‌فتن سه‌ره‌تاییه‌ ئێران كه‌ێگه‌ هێزێگ گه‌ورا له‌ ناوچه‌گه‌ جور سه‌رده‌م ده‌سه‌ڵات شاه‌.

ئه‌و نویسه‌ره‌ زیاتر ئوێشێگ : ئه‌و دوسیه‌ ك له‌ ناونى واشنتون و تاران هاتێه‌سه‌ دی ، ده‌سه‌ڵات سعودیه‌ و زورم وڵاته‌یل خه‌لیج نگه‌ران كردێه‌ ، له‌وه‌ر ئه‌وه‌گ هانه‌ ئه‌و باوه‌ڕه‌ ئێ ڕێككه‌فتنه‌ هه‌ڕه‌شه‌ له‌ هاوپه‌یمانییان وه‌ل واشنتون كه‌ێگ.

ڕوبرت فیسك نویسه‌ر له‌ ڕوژنامه‌ێ ئندى پندنت له‌ كوتایى قسه‌گانێ ئویشێگ: ژێر پا خستن مافه‌یل مروڤ له‌ لاێه‌ن ده‌سه‌ڵات سعودیه‌ ، جور قه‌ێه‌خه‌ كردن سه‌یاره‌ ڕانین له‌ ژنه‌ێل و نوا گردن له‌ هه‌ر جوره‌ ئازادى ڕا ده‌ربڕینێگ ، ئه‌و وڵاته‌ كه‌ێگه‌ هاوپه‌یمانێگ ناسروشتى واشنتون.

نویسه‌ره‌گه‌ باس ئه‌وه‌یش كردێه‌ ك ئه‌گه‌ر ئێران پابه‌ند بمینێ وه‌ڕێككه‌فتنه‌گه‌وه‌ ، بێ متمانه‌ێی له‌ ناونى تاران و واشنتون نیه‌مینێ و ێه‌یش ئاڵشت و ئوڵشت گه‌وراێگه‌ له‌ خوه‌ر هه‌ڵات ناوڕاس و سه‌ره‌نجام ئێران بووگه‌ پولیس خه‌لیج جور سه‌رده‌م ده‌سه‌ڵات شاه‌ و نویسه‌ره‌گه‌ ئێ گوڕانكاریه‌ وه‌ زه‌ێو له‌رزه‌ێگ له‌ خوه‌ر هه‌ڵات ناوڕاس وه‌سف كه‌ێگ و ئمجا ئه‌مریكا سه‌رله‌ نوو په‌ێوه‌ندیه‌گانێ وه‌ل سعودێه‌ێ وه‌هابى له‌ێه‌كه‌و ده‌ێگ ، ك ئوسامه‌ بن لاده‌ن و 15 نه‌فه‌ر له‌و 19 نه‌فه‌ره‌ ك په‌لامار بورج بازرگانى نێویورك دانه‌ به‌رهه‌م هاوردێه‌.

سه‌باره‌ت وه‌ وڵات مسریش ، نویسه‌ره‌گه‌ ئویشیگ: قاهره‌ نیاز وه‌ كومه‌كه‌یل ئه‌مریكا دێرێ ، و سه‌روك عه‌بدولفه‌تاح ئه‌لسیسى خاس زانێگ ك باێه‌د په‌یڕه‌وى بكه‌ێگ له‌ راهنماێیه‌یل ئه‌مریكا و هه‌ر وه‌ێ خاتره‌ په‌یوه‌ندێه‌گانێ وه‌ل حه‌ماس بڕى ئه‌ڕا ئه‌وه‌گ دوژمنه‌یل ئسرائیل له‌یه‌ك جیاوه‌ بكه‌ێگ ، وه‌لێ قه‌ته‌ر و ئمارات ره‌زامه‌ندى له‌ بان هه‌ر ڕێككه‌فتنێگ نیشان ده‌ن و سوریه‌ و عراقیش خۆێان هاوپه‌یمان ئێرانن. نویسه‌ره‌گه‌ باس سورێه‌یش كردێه‌ و ئویشێگ : ڕێككه‌فتنه‌گه‌ مزگانى خاسێگه‌ ئه‌را به‌شار ئه‌سه‌د و فه‌ره‌ له‌ عه‌ره‌به‌یل هانه‌ ئه‌و باوه‌ڕه‌ ك ئیسه‌ به‌شار ئه‌سه‌د دڵنیا بوێه‌سه‌و ك جور باوگێ ئه‌ڕا ماوه‌ێ دوێر و درێژێگ له‌ ده‌سه‌ڵات مینێ.

ڕوژنامه‌ى فایننشال تایمزیش له‌ سه‌ر ووتار خۆه‌ێ نویساس : ڕێككه‌فتنه‌گه‌ێ ناونی ئێران و 5+1 له‌ شوون ته‌قالا و شه‌كه‌تى دبلوماسى ناونی تاران و واشنتون ڕه‌سیه‌سه‌ ئه‌نجام. رووژنامه‌گه‌ زیاتر نویساس : شاێه‌د ڕێككه‌فتنه‌گه‌ پاساوێگ بووگ ئه‌ڕا خه‌ڵات نۆبل ك ئوباما له‌ سه‌ره‌تای سه‌روكایه‌تیه‌گه‌ێ وه‌ده‌سێ هاورد. وه‌ێه‌یش ئشاره‌ كردێه‌ ك ڕێككه‌فتنه‌گه‌ له‌ بان بنه‌واێ بته‌ویگ دانریاس و ێه‌ ێه‌كمین جاره‌ ك ئێران مه‌رجه‌ێلێگ قه‌بول كه‌ێگ ك جاران قه‌بولێ نه‌كردیاد.

ڕێككه‌فتنه‌گه‌ تواناێى ئێران له‌ پیتاندن ێورانیوم سنوداره‌و كه‌ێگ و له‌ هه‌مان وه‌ختیش ئه‌مباره‌گان یورانیوم پیتا كریاگ سنورداره‌و كه‌ێگ و چاودێرى ناوده‌ڵه‌تى له‌ بان دامه‌زراوه‌ نه‌وه‌ویه‌گان و قوناغه‌یل وه‌ده‌س هاوردن مه‌واده‌ێل وه‌شێوه‌ى بێ سابقه‌ێگ ئه‌نجام گرێگ. بنه‌واێ رێككه‌فتنه‌گه‌ له‌یوا دانریاس ك هه‌ر ته‌قالاێگ ئێران ئه‌ڕا وه‌ده‌س هاوردن چه‌ك نه‌وه‌وى ئاشكراوه‌ كه‌ێگ. فایننشال تایمز باس ئه‌وه‌ێش كردێه‌ ك ڕێككه‌فتنه‌گه‌ تا وه‌رجله‌ مانگ حوزه‌یران"جوئن" ئمزا نیه‌كرێه‌ێ و ێه‌یش ده‌رفه‌ت ده‌ێگه‌ ناڕازێه‌یل تا بشێوننه‌ێ. ڕوژنامه‌گه‌ ئویشێگ: ئه‌وانه‌گ دژایه‌تى ڕێككه‌فتنه‌گه‌ كه‌ن ، كونگرس ئه‌مریكاس ك ئیسه‌ زورم ئه‌ندامه‌ێلى جمهوریخوازه‌یلن و هه‌میش ئسرائیل و سوپاێ پاسداره‌ێل ئێران.

فایننشال تایمز باس خوه‌شاڵى و شادمانى ملله‌ت ئێران وه‌تایبه‌ت جوانه‌ێل كه‌ێگ له‌ وه‌راوه‌ر ڕێككه‌فتنه‌گه‌ ونویساس: بڕیار كوتایی هاده‌س رابه‌ر كومار ئسلامی عه‌لى خامنه‌یی ك ئه‌وێش زانێگ جوانه‌ێل بێزار بوێنه‌ و گه‌مارو ئابووریه‌گانیش زه‌ره‌ده‌ێل فه‌ره‌ گه‌وراێگ وه‌ ئێران ڕه‌سانێه‌.

ج . ك

سه‌رچه‌وه‌/ رووژنامه‌يل بريتانی