له‌ جياتی ناوناين نوايان بگرن.. !!

شفق نيوز

له‌وه‌ر ده‌سوه‌رداينه‌يل وڵاته‌يل هاوسا له‌ناو كاروبار ناوخوه‌يی و سياسه‌ت وڵات و كرده‌وه‌يل رێكخراوه‌يل تيرۆريستی ، له‌ڕوی ئاسايش يا ئه‌منه‌وه‌ بارودوخيگ ناساقامگير داشتگه‌و ئيسه‌يش وه‌بوونه‌ی نزيكه‌و بوين هه‌ڵوژاردنه‌يل په‌رله‌مانی شماره‌ی كرده‌وه‌يل تيرۆريستی وه‌ تايبه‌ت ته‌قينه‌وه‌يل خوه‌ی كوژی رووژوه‌رووژ وه‌ره‌و زيایبوين چوود و هه‌رجاريگ له‌ئاكام ئه‌ی ته‌قينه‌وه‌يله‌ ژماره‌ی فه‌ره‌يگ  له‌ هاوڵاتيه‌يل بيگوناهمان شه‌هيد و زه‌خمدار بوون؛ ئه‌يه‌ بيجگه‌ له‌و هه‌مگه‌ی زه‌ررو زيانه‌يله‌ ك له‌ بواره‌يل جياجيا وه‌تايبه‌ت له‌ڕوی ئابووریه‌وه‌‌ وه‌ی وه‌ڵاته‌ ره‌سيگ . وه‌لی ئه‌وه‌گ جی سه‌رسويڕمانه‌ ئه‌یه‌سه‌ ك ئايا ئه‌ڕا چه‌ لايه‌نه‌يل ئه‌منی و په‌يوه‌نديدار هه‌وڵيگ جددی ئه‌را وسيان له‌وه‌راوه‌ر تيرۆر نيه‌ن تا لای كه‌م ريگه‌چاره‌يگ ئه‌را نواگرتن  له‌ی زه‌نجيره‌ ته‌قينه‌وه‌يله‌ بويننه‌و ك بويه‌سه‌ مايه‌ی زه‌خميگ قويل له‌ جه‌سه‌ی گشت رووڵه‌يل و پێكهاته‌يل و چينه‌يل كۆمه‌ڵگای عێراقی. وه‌رده‌وام له‌ ره‌سانن يا اعلام عێراقی باس له‌وه‌ كريه‌يگ ك مانگانه‌ مه‌ليونها دولار ئه‌را چاره‌سه‌ركردن كێشه‌ی تيرۆر له‌بواره‌يل جياواز خه‌رج كريه‌يگ وه‌لی وه‌داخه‌وه‌ تائيسه‌ وه‌بی چاره‌سه‌ر ماگه‌سه‌و ‌و ساڵانه‌ شماره‌ی فه‌ره‌يگ بوونه‌ قوروانی تيرۆر له‌ عێراق و گيان خوه‌يان له‌ده‌س ده‌ن . باوه‌تيگ تر ك له‌لايه‌ن حكوومه‌ته‌وه‌ بايخ فه‌ره‌يگ وه‌پی دريه‌يگ و له‌دويای هه‌ر زه‌نجيره‌ ته‌قينه‌وه‌يگ ك له‌ عێراق وه‌گشتی وله‌ به‌غدا وه‌تايبه‌ت روی ده‌يگ ، مه‌سه‌له‌ی ناو ناين رووژه‌يل حه‌فته‌س وه‌گويره‌ی ته‌قينه‌وه‌يگ له‌ رووژه‌يل حه‌فته‌ .. جوور رووژ يه‌كشه‌ممه‌ی خوينين و چوارشه‌ممه‌ی خوينين و له‌ی جووره‌ ناوه‌يله‌..!!وه ‌ئی جاره‌ سێ شه‌ممه‌ی خوينين وه‌لی ئه‌و لايه‌نه‌يله‌ ك وه‌خت خوه‌يان ئه‌را ئه‌ی جوور كاره‌يليگ ته‌رخان كه‌ن و وه‌رده‌وام هويريان خسنه‌سه‌ لای هه‌ڵوژانن ناو ئه‌را ئی رووژه‌يله‌ بيلا له‌یه‌ زياتر خوه‌يان سه‌رقاڵ ئه‌ی باوه‌ته‌ نه‌كه‌ن و وه‌يه‌كجاری ناويگ هه‌ڵوژنن ك گشت رووژه‌يل حه‌فته‌ بگريگه‌و و موناسب ترين ناو ( حه‌فته‌ی خوينين)ه‌ ؛ له‌وه‌ر ئه‌وه‌گ وه‌ختيگ ئه‌ی جووره‌ ناوه‌يليگ ئه‌را رووژيگ تايبه‌ت هه‌ڵی وژنن ك رويداگيگ تايبه‌ت له‌رووژيگ له‌ رووژه‌يل حه‌فته‌ روی بيه‌يگ تا له‌ مێژوو يا تاريخ  بنويسيه‌يگ و له‌هويره‌وه‌ نه‌چوود ؛ نه‌ك ئيمه‌ ك هايمنه‌ناو وڵاتيگ ك نه ‌رووژيگ به‌ڵكه‌م ساتيگيش وه‌ده‌س تيرۆر و تيرۆريسته‌يله‌وه‌ ئاسايش نه‌يريم . ئه‌ی ئه‌و كه‌سه‌يله‌گ كاردان ناوهه‌ڵ وژاننه‌ ئه‌را رووژيل حه‌فته‌ ، ئه‌گه‌ر تواين وه‌ی جووره‌ زه‌خم مه‌ردم ساڕێژ بكه‌ين ، ئه‌ی زه‌خمه‌ فه‌ره‌ له‌وه‌ قويلتره‌ ك ئيوه‌ هويره‌و له‌لی كه‌ن و وه‌ی كاره‌يله‌ هه‌رگز ساڕێژ نيه‌ود..!؟ ئه‌گه‌ريش  تواين جووره‌ وه‌فادارييگ بوود ئه‌را خوين شه‌هيده‌يل و قوربانيه‌يل ئه‌و كاره‌ساته‌يله‌ ، وه‌فاداری خوه‌دان وه‌ شيوه‌يليگ تر نيشان بيه‌ن ، وه‌فاداری ئه‌وه‌سه‌ ك وه هانای كه‌سوكار  قوربانيه‌يل ئه‌و كاره‌ساته‌يله‌  بچين و چاره‌سه‌ريگ ئه‌ڕا ده‌واو ده‌رمان زه‌خمداره‌يل له‌وه‌ر چه‌و بگرين و قه‌ره‌بووی زه‌ره‌رمه‌نه‌يل بكه‌ينه‌و...! ئه‌گه‌ريش كاردان ته‌نيا دوروشم يا شوعارداينه‌ خو له‌جياتی شوعاردان و هه‌ڵوژانن ناو ئه‌را رووژه‌يل حه‌فته‌ نوای تيرۆر و تيرۆريسته‌يل بگرن ...!