خوه‌شنويس و شيوه‌كاريگ له‌ گه‌رمه‌سير

شفق نيوز

يه‌كيگ له‌و ده‌سڕه‌نگين و به‌هره‌مه‌نه‌يله‌ ك وه‌ خوه‌شنويسی و هونه‌ره‌ شيوه‌كاره‌گه‌ی خزمه‌ت جوانيگ وه‌ شار و ملله‌ته‌گه‌ی كردگه‌و ده‌س باڵايگ ديريد له‌ بوار داهێنان شيوه‌كاری، ئه‌ويش مامۆستا" جه‌مال عه‌بدولڕه‌حمان مه‌حمود" ناسرياگ وه‌" جه‌مال خوه‌شنويس "ه‌.

مامۆستا جه‌مال خوه‌شنويس دياره‌ هه‌ر له‌ سه‌ره‌تای مناڵيه‌و خوليای خوه‌شنويسی و شيوه‌كاری بويه‌و له‌و خوه‌ندنگايشه‌ ك له‌تی خوه‌ندكار بوی وه‌تايبه‌ت له‌ قوناغه‌يل ناوه‌ندی و ئاماده‌يی شوون په‌نجه‌ی ديار بويه‌ له‌ بوار به‌شداريكردن له‌ نمايشگاو خوه‌شنويسی.

جه‌ماڵ خوه‌شنويس"خطاط" له‌ساڵ ١٩٦٧ هاته‌سه‌ دونياو كۆليژ په‌روه‌رده‌ له‌ زانكۆی به‌غدا ته‌مام كردگه‌و ئه‌ندام كارای ريكخرياگ هونه‌رمه‌نده‌يل كوردستانه‌و سه‌رۆك و دامه‌زرنه‌ر گرووپ شيوه‌كاره‌يل گه‌رميانه‌.

ئی به‌هره‌مه‌ن شيوه‌كاره‌ دامه‌زرنه‌ر و وه‌ڕيه‌وبه‌ر په‌يمانگای هونه‌ره‌ جوانه‌گان كفری بويه‌ له‌ ٢٠٠١ تا ٢٠٠٧. وه‌ل ئه‌وه‌يشا خاوه‌ن چه‌نه‌ها تابلۆی هونه‌ری و پۆسته‌ره‌يل ره‌نگينه‌و له‌ بوونه‌يل جياجيايش چه‌نه‌ها دياری وخه‌ڵات ريزله‌ليگرتن و داهێنان له‌ بوار هونه‌ری وه‌پی به‌خشياگه‌و تائيسه‌يش چه‌نه‌ها نمايشگای تايبه‌ت واز كردگه‌و له‌وانه‌يش:

- نمايشگای هاوبه‌ش هونه‌رمه‌نده‌يل كه‌لار له‌ساڵ ١٩٨٦/‌ كه‌لار.

- نمايشگای هاوبه‌ش تايبه‌ت وه‌ ياد ئه‌نفال ١٩٩٢/ كه‌لار.

- نمايشگای هاوبه‌ش هونه‌رمه‌نده‌يل كه‌لار ١٩٩٥/ كه‌لار.

- نمايشگای هاوبه‌ش ياد ئه‌نفال ١٩٩٦/ كه‌لار.

- په‌نجه‌مين فيستيڤاڵ هونه‌رمه‌نده‌يل كه‌ركووك ١٩٩٦/كه‌لار.

- شه‌شه‌مين فيستيڤاڵ هونه‌رمه‌نده‌يل كه‌ركووك ١٩٩٨/ ده‌ربه‌نديخان.

- نمايشگای هاوبه‌ش هونه‌رمه‌نده‌يل شيوه‌كار١٩٩٨/ كه‌لار.

- نمايشگای هاوبه‌ش مامۆستايه‌يل هونه‌رمه‌ند ١٩٩٩/ سلێمانی.

- فيستيڤاڵ شيوه‌كار جوانه‌يل ١٩٩٩/ سلێمانی.

- فيستيڤاڵ چالاكی خوه‌ندنگايه‌يل ١٩٩٩.

- نمايشگای هاوبه‌ش كه‌لار ٢٠٠٠.

- پۆسته‌ر ياد ئايار كه‌لار/ كفری/ رزگاری ٢٠٠٠.

- نمايشگای هاوبه‌ش ئه‌نفال ٢٠٠٠.

- هه‌يشته‌مين فيستيڤاڵ هونه‌ری كه‌ركووك ٢٠٠٠.

- نۆيه‌مين فيستيڤاڵ هونه‌ری كه‌ركووك ٢٠٠١/ كه‌لار.

- ده‌يه‌مين فيستيڤاڵ هونه‌ری كه‌ركووك ٢٠٠٣/ چه‌مچه‌ماڵ.

- شانزه‌يه‌مين فيستيڤاڵ ئه‌نفال ٢٠٠٤/ كه‌لار/ سلێمانی.

- يه‌كه‌مين فيستيڤاڵ هونه‌ری گه‌رمه‌سير ٢٠٠٤/ خانه‌قين.

- نمايشگای شيوه‌كاری هاوبه‌ش هونه‌رمه‌نده‌يل گه‌رمه‌سير ٢٠٠٧.

- فيستيڤاڵ شيوه‌كاره‌يل عراق ٢٠١٣/ كفری.

ئه‌يانه‌و بيجگه‌ نمايشگايه‌يل تر ك مامۆستا جه‌ماڵ وه‌ تابلۆی شيوه‌كارانه‌و شاكارانه‌ی خوه‌ی له‌تيان به‌شدار بويه‌و هويچ وه‌ختيگ له‌ خزمه‌تكردن وه‌ هونه‌ر كوردی وچان وه‌ خوه‌ی نه‌ياگه‌و كاره‌يليشی جی سه‌رسامی هونه‌ر دووسه‌يل و مه‌ردم گه‌رمه‌سير و كوردستان بويه‌.

جه‌ماڵ ئه‌ركه‌وازی