هه‌رچی بكاڵید، ئه‌وه‌ دره‌و كه‌ید !

شفق نيوز

  له‌ ساڵ 1920 سه‌ندیكای پزیشكه‌یل بریتانیا، ئاهه‌نگیگ ئه‌را ده‌رچگن بڕیگ له‌ پزیشكه‌یل تازه‌ ساز كرد، ئنجا سه‌رۆك وه‌زیره‌یل ئه‌وسای بریتانیا ئاماده‌ی ئه‌و ئاهه‌نگه‌ بوی و نه‌قیب پزیشكه‌یلیش له‌ ئاهه‌نگه‌گه‌ چه‌ن ئامووژگارییگ پیشكه‌ش كرده‌ پزیشكه‌یل تازه‌ و ئی وه‌سه‌رهاتیشه‌ ئه‌ڕایان باس كرد و وت:

له‌ نیمه‌ شه‌ویگ توفانی ك له‌وه‌ر تونی واو واران چه‌و چه‌و نه‌ی، كه‌یوانوویگ قاپی ماڵه‌گه‌م كوتاو وته‌پیم: دكتۆر بڕه‌سه‌پیم مناڵه‌گه‌م نه‌خوه‌شه‌و ها له‌حاڵ مه‌رگ، تكا له‌لی كه‌م زوی خوه‌د بڕه‌سن و كاریگ بكه‌ مناڵه‌گه‌م له‌مه‌رگ قورتار بكه‌.

ئنجا ئویشید: منیش وه‌بی ئه‌وه‌ك هویر له‌و زوقم و واو وارانه‌ نیمه‌ شه‌وه‌ بكه‌م، یه‌كسه‌ر كه‌فتمه‌ڕی وه‌ره‌و ماڵه‌گه‌ی له‌ شار له‌نده‌ن و له‌شوون ئه‌وه‌ك وه‌ سه‌ختی فریه‌یگه‌و خوه‌م ره‌سانمه‌ ماڵه‌گه‌ی، چه‌وم كه‌فت ماڵه‌گه‌ی خانگیگ بویچگه‌و مناڵه‌گه‌یشی له‌ گووشه‌ی خانگه‌گه‌ هه‌ر خه‌ریك گیرستن و ئاه و ناڵه‌س.

دریژه‌ ئه‌یاده‌ قسه‌یلی و ئویشید: له‌شوون ئه‌وه‌گ ئه‌رك خوه‌م وه‌جی هاوردم و تیمار مناڵه‌گه‌ كردم، داڵگه‌گه‌ كیسه‌ی بویچگیگ ئه‌ڕام هاورد ك قه‌یری پویل له‌تی بوی، منیش كیسه‌گه‌ له‌لی نه‌وردم و عوزر له‌لی خواستم و دی وه‌و حاڵه‌ تا چه‌ن رووژیگ وه‌رده‌وام بویم له‌ تیماركردن مناڵه‌گه‌ تا خودا شفای داو خاسه‌و بوی.

نه‌قیب سه‌ندیكای پزیشكه‌یل له‌ دریژه‌ی قسه‌یلی وت: پیشه‌ی پزیشكی یه‌كیگه‌ له‌ پیشه‌یل ئنسانی ك فریه‌ له‌ خوداوه‌ نزیكه‌. ئنجا وه‌ختای نه‌قیب سه‌ندیكاگه‌ قسه‌یلی ته‌واو كرد، سه‌رۆك وه‌زیره‌یل بریتانیه‌ زوی له‌بان كورسیه‌گه‌ی خوه‌ی ئه‌ڵسیاو چیه‌ پای مایكرۆفۆنه‌گه‌و وت: جه‌ناب نه‌قیب موڵه‌تم بیه‌ ده‌سه‌یلد ماچ بكه‌م!! چوینكه‌ من ماوه‌ی 20 ساڵه‌ له‌ شووند گه‌ردم! من ئه‌و مناڵه‌ بویم ك جه‌نابد باسی كردید. ئنجا بیله‌م رووح داڵگم شاد بكه‌م ك ته‌نیا وه‌سیه‌تی له‌ حاڵه‌ت مه‌رگ یه‌ بوی ك بكه‌فمه‌ مینه‌د و بوینمه‌ده‌وه‌و خه‌ڵاتد بكه‌م وه‌خاتر ئه‌وه‌گ له‌ مه‌وقه‌ی فه‌قیری و كه‌مده‌سی و نه‌خوه‌شی وه‌ دادمان ره‌سیده‌.

به‌ڵی ئه‌و مناڵ فه‌قیر و نه‌خوه‌شه‌ ك له‌ حاڵه‌ت مه‌رگ بوی و نه‌قیب سه‌ندیكا له‌ مه‌رگ قورتاری كرد"لوید جۆرج" بوی ك دویاخر بویه‌ سه‌رۆك وه‌زیره‌یل بریتانیه‌.

هه‌ر وه‌و خاتریشه‌ ئویشیم: ئاده‌میزاد هه‌رچی بكاڵید چ خه‌یر چ شه‌ڕ دویاخر به‌رهه‌مه‌گه‌ی دره‌و ئه‌كا، ك هه‌رچه‌نی وه‌خت فریه‌یگیش وه‌پی بچوود.

له‌ عه‌ره‌بیه‌و ئه‌را كوردی: جه‌واد مه‌ڵگشای

ج. أ