تام ئشق له‌ كه‌مانچه‌ى خه‌م

شفق نيوز

 

دیاره‌ داستان ئشق هه‌ر وه‌رده‌وامه‌و قوناغ وه‌ قوناغ وه‌سه‌رهاته‌یل تر ده‌ركه‌فید، هه‌ر له‌وه‌ر ئه‌وه‌یش "بارام و نازه‌نین" دو ئاشق پاك و جوان، په‌یام ئشقه‌ راسكانیه‌گه‌ى دڵه‌یلیان ئاشناى یه‌كترى كردن و ئاره‌زوومه‌ند بوینه‌ تام ئه‌و ئشق و خوه‌شه‌ویسیه‌ پاك و بیگه‌رده‌ له‌ ژیان هاوسه‌رى بویننه‌و، وه‌لى وه‌ختى قه‌ده‌ر هات و ئه‌و ئشقه‌ له‌یه‌ك ترازان و مزگانى مه‌رگ هاورد بووده‌ داستان دڵته‌زن و دڵته‌نگیگ و شوونه‌وار پڕ له‌ خه‌میگ هیلیده‌ جى.

بارام جایه‌ڵ جوان و ڕوى خوه‌ش و كه‌مانچه‌ ژه‌ن و ه‌ل نازه‌نین خوین شرین و نازار، داستانیگ له‌ ئشق راسكانى دروس كردنه‌ له‌ ناوچه‌ى "ره‌حیماوا"ى كه‌ركووك، ئیسه‌ نازه‌نین قژ چه‌رمگى له‌ژیر له‌چگ شارده‌سه‌وه‌و نه‌خوه‌ش و خه‌مین له‌بان جى كه‌فتگه‌و كه‌مانچه‌گه‌ى بارام ها ده‌سیه‌و ك وه‌رجه‌ ئه‌وه‌ك بووده‌ پێشمه‌رگه‌و چه‌ك شه‌ره‌ف بكاده‌ شان له‌ ساڵه‌یل خه‌بات ئه‌راى وه‌ ئه‌مانه‌ت هیشته‌ى جى، چوینگه‌ حكوومه‌ت به‌عس فه‌رمان ده‌سگیركردنى دا له‌وه‌ر ئه‌وه‌ك له‌ ریخستنه‌یل ناوخوه‌یى بوى، ك ئیسه‌یش نازه‌نین گشت جاریگ وازى وه‌ ته‌له‌یل ئه‌و كه‌مانچه‌ ئه‌كاو مه‌ته‌ڵ ئه‌و ئشق و خوه‌شه‌ویسیه‌ باس ئه‌كاو ئویشید: له‌وه‌ختیگ خوه‌ندكار بویمه‌ له‌ قوناغ ئاماده‌یى، گشت وه‌ختیگ وه‌ناو بازاڕ ره‌حیماوا هاتیامه‌و ئه‌را ماڵ كه‌سیگ نه‌وى نه‌نوڕیده‌ جوانى باڵام چ دوكاندار چ مه‌ردم ریوار و ڕه‌وه‌ن، وه‌لى دڵم ته‌نیا كه‌فته‌ لاى بارام كه‌مانچه‌ ژه‌ن ك هه‌ر وه‌ختیگ وه‌ وه‌رده‌م دوكانه‌گه‌یا گوزه‌ر كردیام ئه‌و كه‌مانچه‌ ئه‌رام ژه‌نیادو منیش ئه‌وه‌نه‌ خوه‌شى تواسیام هه‌ر وتیایم بوود رووژیگ وه‌ یه‌ك بڕه‌سیم، وه‌ختیگیش له‌ترس گیانى روى له‌ جه‌وڵ كرد داوا له‌لى كردم بایده‌ خوازمه‌نییم تا منیش وه‌لیا بچم و بوومه‌ پێشمه‌رگه‌، وه‌لى ئه‌و رازى نه‌وى كه‌مانچه‌گه‌ى خسته‌لام ئه‌را ئه‌وه‌ك وه‌و كه‌مانچه‌ دڵخوه‌شى خوه‌م بیه‌م، بارام وته‌پیم نازه‌نین هه‌ر وه‌ختیگ بویده‌ هاوسه‌رم خوه‌شترین مۆسیقا ئه‌راد ژه‌نم وه‌ى كه‌مانچه‌و هه‌میشه‌ نامه‌ ئه‌رام كلكردیادو منیش چه‌وه‌ڕى هاتنه‌وه‌ى كردیام، وه‌لى دیاره‌ جارجاریگ ئه‌وه‌ك له‌لاى به‌نه‌ خه‌یاڵه‌ له‌لاى خودا به‌تاڵه‌.

نازه‌نین ئویشید: ئه‌وه‌ك مه‌یلم كیشا له‌ بارام ئه‌وه‌ بوى ك له‌ دویره‌و دیامه‌ى كه‌مانچه‌یگ وه‌پى بوى، وه‌ختیگیش نزیكى بویامه‌و له‌ شه‌رما كه‌مانچه‌گه‌ى شاردیاده‌و تا وه‌لایا ڕه‌ى بویام و ئنجا چیاده‌ ناو دوكانه‌گه‌و ده‌س كردیاده‌ ژه‌نین ئاوازه‌یل خوه‌ش، ك سه‌ره‌تا له‌ خوه‌ما له‌وه‌ر ئه‌وه‌ شاریده‌وه‌ى شایه‌ت نه‌زانید بژه‌نیده‌ى، وه‌لى دویاخر ئه‌و ئاوازه‌یله‌ ك بارام ژه‌نیاده‌ى بوینه‌ به‌شیگ له‌ روح و گیانم.

وه‌لى قه‌در هات و بارام له‌ پێشمه‌رگایه‌تى شه‌هید بوى و لاشه‌ جوانه‌گه‌ى پارچه‌ پارچه‌ بوى. ك ئیسه‌یش نازه‌نین هه‌میشه‌ كه‌مانچه‌گه‌ى بارام گریده‌ باوه‌ش و ئویشید: ئه‌ى كه‌مانچه‌ خوه‌شه‌ویسه‌گه‌ى ده‌س یارم تائیسه‌یش بوو بارام وه‌پیده‌و مه‌ندگه‌، ئه‌و ئشقه‌ له‌یوا سزنیده‌م مه‌گه‌ر ته‌نیا وه‌ نۆته‌یل ت بكوشیه‌مه‌و، ئه‌و ئاوازه‌یله‌ ك بارام ئه‌رام ژه‌نیاده‌یان هیمان هه‌ر له‌ گووشه‌یلم زرنگیه‌نه‌و.

جه‌مال ئه‌ركه‌وازى

سه‌رچه‌وه‌: داستان