قه‌وڵه‌یل قوناغ ده‌زویرانى و فه‌راموشكردنى له‌قوناغ ژنخوازین!!

شفق نيوز

له‌ ئشق و خه‌یاڵ نیمه‌ درووكانى، وه‌ جووریگ هه‌ر یه‌كیگ له‌لیان توایگ ئه‌واكه‌ى تر رازى بكا له‌بان دابینكردن ژیان پڕ له‌ خوه‌شگوزرانى و ئارامى و دڵنیایى، وه‌لى دوینید فره‌جار كاره‌گه‌ چه‌واشه‌سه‌و ئه‌و پیشبینیه‌یله‌ وه‌ مه‌یل و خواسته‌وه‌ نیه‌و ته‌نیا قسه‌یل خوه‌ش قوناغ ده‌زویرانیه‌و دویاى پرووسه‌ى هاوسه‌رگیرى گشت ئه‌و واده‌و قسه‌یله‌ له‌هویره‌و چووگ و هویچ شوونه‌واریگ له‌لى نیه‌كریه‌یگه‌ دى.

تویه‌نیم بویشیم ئى ره‌فتاره‌ له‌ فه‌ن وفیڵ كوڕه‌گه‌ یا مه‌كر دویه‌ته‌گه‌وه‌ سه‌رچه‌وه‌ گریگ ئه‌را ڕازیكردن یه‌كترى، هه‌ر له‌وه‌ر ئه‌وه‌یش دوینیم له‌شوون كووتاییهاتن وه‌ قوناغ ده‌زویرانى و چگنه‌ناو قوناغ هاوسه‌ریه‌وه‌، زوورم ژنه‌یل گله‌یى ئه‌وه‌ كه‌ن ك هاوسه‌ره‌یلیان نازیان نیه‌كیشن و ئه‌و قه‌وڵه‌یله‌ ك وه‌پیان دانه‌سه‌ى نیارنه‌ى جى.

پیاوه‌یل خاوه‌ن فه‌ن وفیڵ له‌وه‌خت ده‌زویرانى گه‌ردنه‌ شوون چ قسه‌یگ خوه‌ش و دڵگیره‌ تا وه‌پى بتویه‌نن رازى دویه‌ته‌گه‌ بكه‌ن و شوى وه‌پى بكا، وه‌لى وه‌ختى بویه‌ ژنى 180 نمره‌ له‌لى قه‌ڵبه‌و بووگ و زانیگ ژنه‌گه‌ ناچاره‌و بایه‌سه‌ وه‌هه‌ر شیوه‌یگ بووگ وه‌لیا بگونجیه‌یگ و ژیان بووه‌یگه‌ سه‌ر و هه‌ر ڕووژیگ مه‌هانه‌یگ ئه‌ڕاى دوینیگه‌وه‌و جار له‌یوایشه‌ هه‌س ژیان له‌لى ئه‌كاده‌ ژه‌هر مار. بیگومان ئى ره‌فتاریشه‌ وه‌ داخه‌وه‌ له‌ناو كومه‌ڵگا تا ئیسه‌یش هه‌ر وجوود دیریگ  و له‌سه‌ره‌تاوه‌ له‌وه‌خت ده‌زویرانى فه‌ن و فیڵبازى خوه‌ى نیشان دویه‌ته‌گه‌ ده‌یگ جویر ئه‌وه‌ك بخه‌ڵتنیگه‌ى و دویاخریش بووگه‌ ئاگر و خوه‌ى وه‌رده‌یگه‌ گیانى، هه‌ڵبه‌ته‌ گشت كه‌سیگیش له‌یوا نیه‌و فره‌كه‌س وه‌گووره‌ى وژدان و توانایى خوه‌ى قسه‌ ئه‌كاو زووان ڕاسى تیه‌ریگه‌ كار چ له‌وه‌خت ده‌زویرانى چ له‌ژیان هاوسه‌رى ك نیه‌توان ده‌رده‌سه‌رى ئه‌را خوه‌یان دروس بكه‌ن و ئه‌وه‌ك وه‌پیان بكریه‌یگ وه‌رجه‌ گشت چشتیگ ئاشكراى كه‌ن، ك بیگومان یه‌یش ره‌فتار په‌سه‌ن و جوانیگه‌. وه‌لى ئه‌وانه‌ك سه‌ره‌تا ئشاره‌ت وه‌پیان كردیم كار و كرده‌وه‌یان له‌ چوارچیوه‌ى فه‌ن وفیڵه‌و دوینید زوورمیان له‌ڕوى ژیان به‌خته‌وه‌ریه‌وه‌ شكه‌ست تیه‌رن و هه‌میشه‌ كیشه‌و ناكوكى دیرن وه‌ل هاوسه‌ره‌یلیاناو ئه‌را ته‌نیا ڕووژیگیش زه‌حمه‌ته‌ وه‌خوه‌شى بژیه‌ن. ئنجا له‌ى حاڵه‌ته‌ كوڕ بایه‌سه‌ هه‌ر له‌سه‌ره‌تاوه‌ له‌وه‌رجه‌ ژنخوازین و له‌قوناغ ده‌زویرانى راسگوو بووگ وه‌ل ئه‌و دویه‌تا ك بووگه‌ هاوسه‌رى له‌ ئاینده‌و ئه‌گه‌ر ئه‌ڕاى كریا نازى ئه‌ڵگریگ و ئه‌گه‌ریش وه‌پى نه‌كریا نه‌خه‌ڵه‌تنیگه‌ى وه‌قسه‌ى لویس و بى بنه‌ما. چوینكه‌ ژیان به‌خته‌وه‌رى له‌بان راسى بنیات نریه‌یگ  نه‌ك دروو ده‌له‌سه‌و خه‌ڵه‌تانن.

 

له‌ى مه‌سه‌له‌ى ده‌زویرانیه‌ وجوود وه‌خت نه‌خش یا ده‌ور خاسیگ دیریگ ئه‌را تاقیه‌وكردن و راسى و دروسى قه‌وڵه‌یل و زیاتر یه‌كترناسین، چوینكه‌ وه‌خت له‌ى حاڵه‌ته‌ ده‌رفه‌ت ئه‌وه‌ وه‌پید ده‌یگ زیاتر وه‌رانوه‌ره‌گه‌د له‌ڕوى ره‌فتار و هه‌ڵسووكه‌فته‌وه‌ بناسید و شایه‌ت یارمه‌تى ده‌ر بووگ ئه‌را ئه‌وه‌ك دویاخر په‌نجه‌ى په‌شیمانى نه‌گه‌زید، ك بیگومان یه‌یش له‌شوون ماره‌بڕین هه‌قیگ شه‌رعیه‌ تاماوه‌یگ كه‌س وه‌رانوه‌رد له‌یه‌كه‌و به‌ید و نیازه‌یلى بخوه‌نیده‌وه‌ له‌وه‌رجه‌، وه‌ل ئه‌وه‌یشا سروشت یا ته‌بیعه‌ت نازگیگ دیریگ و فره‌جار دوینیم ناز خوه‌یان نیشانده‌ن، له‌ى حاڵه‌تیشه‌ پیاوه‌یل تویه‌نن ئه‌و نازه‌ وه‌خوه‌شه‌ویسیه‌وه‌ جواوه‌و بیه‌ن نه‌ك وه‌ تویڕه‌یى، وه‌لى هه‌وڵ ئه‌وه‌ ده‌ن خوه‌یان دویره‌و بخه‌ن له‌و داواكاریه‌یله‌ ك له‌لایه‌ن ژنه‌یلیانه‌وه‌ ئاراسته‌یان كریه‌یگ، ئنجا جویر ئه‌وه‌ك له‌سه‌ره‌تا باسى كردیم داین وه‌خت وه‌ یه‌كترى قانجاز فره‌یگ دیریگ ئه‌را هه‌ردوگیان له‌سه‌ره‌تاوه‌، چوینكه‌ ئه‌و ژن وپیاوه‌ ئه‌گه‌ر وه‌ختیگ فره‌تر داشتن وه‌ل یه‌كا بنیشن، ئه‌وه‌ بیگومان جوانتر شاره‌زاى یه‌كترى بوون و زیاتر ئاگادار یه‌كترى بوون و دى ئه‌و وه‌خته‌ پیاوه‌گه‌ زیاتر تویه‌نیگ قه‌وڵه‌یلى باریگه‌ جى و نیه‌تویه‌نیگ فه‌ن و فیڵ له‌لى بكاو بخه‌ڵه‌تنیگه‌ى.

 

نه‌سرین میرزا