ژان ملله‌ت... كورده‌یل فه‌یلى جویر نموونه‌یگ

شفق نيوز

ژیان تیه‌ڵیگ بردیانه‌ سه‌ر، نه‌ ده‌ستوور و نه‌ قانوون و نه‌یش وژدان پرس وه‌پى نه‌كریاو ده‌سڵات ته‌كڕه‌وى و تونڕه‌وى شوون ده‌سڵات ئازادى و دیموكراسى گرته‌وه‌، ساڵه‌یل فره‌یگ جه‌سه‌ى ڕوڵه‌یل ملله‌ت وه‌ قه‌مچى جه‌لاده‌یل موور قرمز كریاو گڵوڵه‌ى بان جى كریان، ڕووژگار بى شماریگ زایه‌ڵه‌ى زنگ ماڵویرانى و كاولكارى بوى و ساز به‌دبه‌ختى و نائومیدى ژه‌نیا، ئه‌ر بتویه‌نستایم ئه‌سر چه‌و داڵگه‌یل جه‌رگ سزیاى گرده‌و بكردیام بیجگه‌ئوقیانۆس ئارام و ئه‌تڵه‌س و هند و یه‌خبه‌ساى باكوور و باشوور، ئوقیانۆسیگ تر وه‌ناو (ئۆقیانۆس خه‌م) له‌لى دروس بویاگ.

له‌راسى ئى وڵاته‌ ئه‌وه‌ك وه‌پى ئویشن به‌خته‌وه‌رى و سه‌قامگیرى ئه‌را ماوه‌ى ته‌نیا ساڵیگیش له‌تى به‌رقه‌رار نه‌وى، هه‌ر وه‌رده‌وام كیشه‌و ناكووكى باڵ كیشاویگه‌ بان ئارامى و ئاسایشه‌وه‌، ئه‌وانه‌یش ك جڵه‌و ده‌سڵات له‌تى گرتنه‌ ده‌س ئه‌را ته‌نیا جاریگیش به‌رژه‌وه‌ندى ملله‌ت له‌وه‌رچه‌و نه‌گرتن، وه‌ى جووره‌ ساڵ وه‌ ساڵ خوه‌زگ وه‌ پار خوازیایم و ترویسكه‌یگ ڕووشنایى نه‌یمنه‌ چه‌و، هه‌ر له‌وه‌ر ئه‌وه‌یش خه‌بات و هه‌وڵداین له‌وه‌ر خاتر ئازادى وه‌خته‌یل دویرو دریژیگ كیشا تا قه‌ده‌ر له‌یوا كرد ره‌سانه‌مانه‌ كنار نیمچه‌ ئازادى و دیموكراسى وه‌و ئومیده‌ ك ده‌سوه‌ردارى نه‌ویم و بتویه‌نیم گه‌شه‌ وه‌پى به‌یم و مه‌رزى فراوانه‌و بكه‌یم، وه‌ل ئه‌وه‌یشا مه‌ردمانیگ  له‌ حاڵه‌تیگ  پرۆلیتارى ژیان، ك ماناى هاووڵاتى له‌نزمترین چین ده‌یگ ، یه‌یش له‌ڕوى شوناسنامه‌و هه‌قه‌یلیان جویر كورده‌یل فه‌یلى ك ڕووژگار فره‌یگ  له‌ژیانیان تویش دڕه‌نده‌ترین و پیسترین كاره‌سات و دوشمنایه‌تیكردن بوینه‌وه‌ له‌شوون كوده‌تا یائنقلابه‌ سیه‌گه‌ى ساڵ 1963 له‌وه‌ختیگ  به‌عسیه‌یل دوباره‌ هاتنه‌وه‌ بان ته‌خت ده‌سڵات و هه‌ڵویست نیشتمانپه‌روه‌رانه‌ى فه‌یلیه‌یل داخ له‌دڵیان داشت و سه‌ره‌تاى وه‌یله‌وه‌رى و به‌دبه‌ختى وه‌ل خوه‌یانا هاوردن جویر مزگانى دانه‌ى خوه‌رد ملله‌ت سته‌مدیده‌و له‌وانه‌یش كورده‌یل فه‌یلى ك له‌وساوه‌ تائیسه‌ تام ئوخه‌ى نه‌كردن.

وه‌ل ئه‌وه‌یشا دكتۆر مونزر فه‌زڵ له‌باوه‌ت نه‌خش یا ده‌ور كورده‌یل فه‌یلیه‌وه‌ ئویشیگ : له‌ جموجویل رزگاریخواز كوردى كورده‌یل فه‌یلى جویر خه‌ت یه‌كم بوینه‌ له‌ خه‌باتیان له‌وه‌ر خاتر ئازادى ملله‌ت كوردو ده‌سكه‌فتن هه‌قه‌یل ڕه‌وایان و له‌وانه‌یش هه‌ق بڕیار چاره‌نویس، هه‌ر له‌وه‌ر ئه‌وه‌یش ئه‌و تاوانه‌یله‌ ك دژ وه‌ى چینه‌ ئه‌نجام دریا له‌دڵ ئه‌نقه‌زه‌وه‌ بوى و له‌گشت چینه‌یل كوومه‌ڵگا زیاتر تویش كاره‌سات هاتن

ژان ملله‌ت و كورده‌یل فه‌یلى جویر نموونه‌یگ ، مانایه‌یلیگ سیاسى و ئنسانى له‌لى كه‌فته‌وه‌ جویر ئه‌وه‌ك ڕیزدار سه‌رۆك هه‌رێم كوردستان مه‌سعود بارزانى تاریفى كرد و وت: قه‌ڵه‌مم نیه‌تویه‌نیگ  تاریف ئازایه‌تى و قوربانى ئى چین قوربانیده‌ره‌ بكا. وه‌ل ئه‌وه‌یشا ئویشیگ : ئامانج سیه‌ى حكوومه‌ت به‌عس له‌ كووچ وه‌پیكردن ئى چینه‌ ئه‌وه‌ بوى شووڕش كوردى كزه‌و بكاو دویاخریش ده‌س بگریگه‌ بان ماڵ و موڵكه‌یلیان. وه‌ى جووره‌ كورده‌یل فه‌یلى هووكار نه‌ته‌وه‌یى و سیاسى و ئابوورى و دینى بویه‌ مایه‌ى له‌ناوبردن وه‌جه‌م و دویره‌و خستنیان له‌ خاك باوگ و باپیره‌یلیان.

 

جه‌ماڵ ئه‌ركه‌وازى