نیم جه‌سه‌مان وه‌ زینگ مه‌نگه‌

شفق نيوز

ك ئیچنه‌ له‌ خاوه‌ن دڵه‌یل سیه‌ كردگه‌ خوه‌یان بته‌قننه‌وه‌و گیان مه‌ردم زه‌فت بكه‌ن له‌ناو بازاڕ و خوه‌ندنگاو ته‌نانه‌ت له‌ناو ماڵه‌یل خودایش تا شۆماره‌ى قوربانیه‌یل فیشتره‌و بوود.

 

 

ئایا تویه‌نم بویشم ئه‌و خوداوه‌نده‌ ك په‌ره‌سیمنه‌ى و ناسیمنه‌ى ره‌حمدارترین ره‌حمداره‌یله‌ له‌ى وڵات غه‌ريوه‌؟ چوینكه‌ كوشتن بیتاوان و كووچ وه‌پیكردن و نیشانداین خوسه‌و كینه‌ت مه‌سه‌له‌یگه‌ كه‌س له‌لى خوه‌ش نادێ، وه‌لى بویه‌سه‌ به‌شیگ جیانه‌كریاگ له‌ ژیان رووژانه‌مان.

 

ئیمه‌ى كورده‌یل فه‌یلى رووژگارمان ئیچنه‌ وه‌پیمان كرد به‌شبه‌شه‌و بویمن، نیمه‌مان خوه‌ى له‌ چوارچیوه‌ى نه‌ته‌وه‌یى دوینێد و ئه‌و نیمه‌گه‌یش پلكیاسه‌ باوه‌ڕ و مه‌زه‌و و له‌ژێر په‌رچه‌م ئسلام سیاسى. یه‌یش مه‌هانه‌س و چه‌ن مه‌هانه‌یگ تریش پیچیاسه‌ پیه‌و له‌ناونى زووان داڵگى و ناسنامه‌و گه‌ردین له‌شوون گوزه‌یشته‌ ك وه‌ ده‌رد ئمڕوو ناخواو كه‌فتیمنه‌سه‌ ناونى كرده‌وه‌یل دونیایى و سزاى ئاقبه‌ت.

 

هویچ چین و پێكهاته‌یگ نییه‌ له‌ى وڵاته‌ رووژانه‌ چ وه‌ئاشكرا چ ژێر وه‌ژیر ناچار كریاوید به‌یعه‌ت خوه‌ى تازه‌وه‌ بكاو قبڵه‌ى ده‌سنیشان بكا وه‌ل ئى لایه‌ن و ئه‌و لایه‌ن و ته‌نیا ئى كاره‌ له‌ پێكهاته‌گه‌ى ئیمه‌ روى ئه‌یاد، له‌ ده‌زگایه‌یل ناسنامه‌ ترس دیرن و ئى گرفته‌ هه‌ر له‌ زویه‌و وه‌لیانا وجوود داشت، وه‌ل ئه‌وه‌یشا كورده‌یل فه‌یلى مه‌یل به‌شداریكردن سیاسى نه‌یرن جوور مه‌ردمان تر، چوینكه‌ خوه‌یان وه‌ زه‌ردمه‌ن گه‌ورا دوینن و بیجگه‌ ئه‌وه‌یش متمانه‌ وه‌ شوون و ده‌ورانیش نه‌یرن و  نه‌ ماڵ سینن و نه‌یش پویل خه‌نه‌ بانكه‌یل چوینكه‌ گومان له‌ هاووڵاتیبوینیان ئه‌كریه‌ێد، هه‌رچه‌ن فه‌یلیه‌یل له‌ دید باقى پێكهاته‌یل تر خاوه‌ن دڵسووزى و پابه‌ندى و داهێنان و راسگوویى و سفه‌ته‌یل خاسیگن، وه‌لى رژیمه‌یل سیاسى وه‌ چه‌و خوسه‌و كینه‌ت نووڕنه‌ پێكهاته‌ى كورد فه‌یلى.

 

له‌ساى ئى تایبه‌تمه‌ندیه‌ باوه‌ڕم ئه‌وه‌سه‌ ك تویه‌نم وه‌ل نه‌نگم هویره‌و بكه‌م ك یه‌كیگه‌ له‌ گه‌وراساڵه‌یل كورد فه‌یلى و عومر فره‌یگ كردگه‌و له‌به‌غدا هاتگه‌سه‌ دونیاو نزیكه‌ى 100ساڵه‌ ها له‌ژیان و گووش نه‌یاسه‌ ئى دونیاو له‌ ئاخره‌تیش ناترسێ و هویچ زووانیگ تر بێجگه‌ زووان كوردى نازانێ، ئویشێده‌پیم: "ژنه‌فتن ده‌نگد خوه‌شاڵم ئه‌كا"، ئى خوه‌شاڵییشه‌ له‌وه‌ر ئه‌وه‌سه‌ ك وه‌ زووان داڵگى وه‌لیا قسه‌ كه‌م. ئمجا ئویشمه‌ ئه‌وانه‌ك گه‌ردنه‌ شوون پرۆژه‌یل نه‌ته‌وه‌یى: به‌ڵێ ئه‌وه‌ ژنێگ نه‌خوه‌نه‌واره‌، وه‌لى فیشتر له‌ بڕێگ له‌و رووشنهویره‌یل كورده‌ ك وه‌ زووان عه‌ره‌بى قسه‌ كه‌ن خزمه‌ت وه‌پرۆژه‌ى نه‌ته‌وه‌یى كردگه‌و گشت روڵه‌یلى وه‌ زووان داڵگى قسه‌ كه‌ن و له‌ خوه‌ندنگایه‌یل دینییش نه‌خوه‌ندگه‌، وه‌لى تواناى نزاو لاڵكیان دیرێد له‌ ناو مه‌زارگه‌ى ئیمامه‌یل پاك وه‌و زووانه‌ ك خوه‌ى زانێده‌ى.

 

له‌و رووژه‌ ك سه‌ركردایه‌تى كوردستان و حكوومه‌ت هه‌رێم متمانه‌ داپیمان و پشتگیریمان كرد له‌ دامه‌زرانن ده‌زگاى شه‌فه‌ق، بانگه‌وازێگ و ده‌نگدانه‌وه‌یگ بوى له‌ دڵ دووسه‌یلمان و ئه‌وه‌ك ده‌نگمان ژنه‌فێد و راى و ئه‌ڕاى چوینه‌یلمان خوه‌نێده‌و، ك وه‌پیان ئویشیم ئیوه‌یش جوور هه‌ر مه‌ردمانیگ تر خاوه‌ن ناسنامه‌ین و مادام په‌یامه‌گه‌مان ئاشكراس دى ترس له‌ په‌یوه‌ندى نه‌یرێد وه‌گشت زووانه‌یل و له‌وانه‌یش زووان عه‌ره‌بى، وه‌لى جى داخه‌ كه‌سه‌یلیگ نه‌زان له‌ناو پێكهاته‌گه‌مان ده‌ركه‌فتن ك هه‌وڵ زه‌فتكردن پرۆژه‌ى نه‌ته‌وه‌یى دان و له‌پشته‌و قسه‌ وه‌پیمان كردن، وه‌لى ئیمه‌ له‌ شه‌فه‌ق باوه‌ڕمان ئه‌وه‌سه‌ ك خوداوه‌ند گه‌ورا خاس له‌ كوردى ئیمه‌ ره‌سێده‌و و وه‌ چه‌واشه‌ى ئه‌وه‌ك شۆفینیه‌یل باسى كه‌ن له‌باقى نه‌ته‌وه‌یل تر، له‌ رووژ حه‌شر هه‌وه‌جه‌ وه‌ هه‌ڵه‌وگه‌رد یا موته‌رجم نه‌یریم تا.

 

گوڤار فه‌یلى چییه‌ ناو نۆیه‌مین ساڵ و شۆماره‌یلى له‌ 120 كرده‌ بان، ك یه‌یش ده‌سكه‌فت گه‌ورایگه‌و شانازیه‌ ئه‌را ئه‌وانه‌ك له‌تى كار كه‌ن و پشتگیرى له‌لى كه‌ن، ئى كاریشه‌ هه‌وڵ و تواناو ئیراده‌ى خاسێگ خوازێد و ئیمه‌ى كورده‌یل باشوور(فه‌یلى)یش له‌ى هه‌رسێ لایه‌نه‌و فه‌قیریم.

 

120 شۆماره‌ له‌ گووڤار فه‌یلى چشت نموونه‌ییگ پێشكه‌ش كرد ئه‌را پابه‌ندى ئه‌خلاقى و پیشه‌یى جوور ده‌سدریژى نه‌كردن له‌بان كه‌سه‌یل تر و نه‌شیوانن مێژوو و راسیه‌یل، ك (فه‌یلى) رووشنایى دیارییگ بوى له‌ مێژوو و ئاینده‌ى ئى به‌شه‌ له‌ ملله‌ت كوردمان ك قه‌ده‌ر ئیچنه‌ له‌لى كرد له‌ ده‌یشت خاك كوردستان ئمڕوو بژیه‌ید.

 

ئیمه‌ خاوه‌ن پرۆژه‌یم و مه‌ردمان فره‌یگ دگان وه‌ ئه‌زموون یا به‌شێگ له‌ى ئه‌زموونه‌ نه‌ن له‌ ناو بار و ژینگه‌یگ له‌ناوچه‌یل فه‌یلى نشین ك زوورمیان له‌ نه‌ته‌وه‌یل تر وه‌پیمان رازى نین ته‌نیا مه‌گه‌ر له‌ژێر سایه‌ى ئه‌وان بویمن و به‌شدارى باوه‌ڕیان بكه‌یم، ئمجا ئایا ناونیشان(فه‌یلى) له‌ى جووره‌ بارێگ تویه‌نید مقه‌یه‌تیمان بكا له‌ مه‌ترسیه‌یل؟ ئایا شه‌فه‌ق تواناى ئه‌وه‌ دیرێد ئاڵشت بوود ئه‌را ئه‌زموونیگ ك زیاتر گشتگیر و ڕویه‌و په‌ره‌سه‌ندن بوودو تواناى باڵكیشانن داشتوود له‌بان گشت بواره‌یل و خواسته‌یل رووڵه‌یل پێكهاته‌گه‌مان له‌ڕوى خوه‌نریاگ و ژنه‌فیاگ و دوینریاگ؟ جوواو ئى پرسیاره‌ هه‌وه‌جه‌ وه‌ وه‌خت دیرێدو ئاینده‌یش ئاشكراى بڕێگ له‌ لایه‌نه‌یلى ئه‌كا.

گشت ساڵێگ و گووڤار(فه‌یلى)وه‌خه‌ێر

 

عه‌لى حوسێن فه‌یلى

ج. ا