جه‌نگ عراق و كوشیان رووژنامه‌نویسه‌یل

شفق نيوز

 

وه‌لاى كه‌مه‌و 150 رووژنامه‌نویس و 54 كارمه‌ند پشتگیر ره‌سانن له‌ عراق كوشیا له‌وه‌خت جه‌نگ وه‌ سه‌ركردایه‌تى وڵاته‌یل یه‌كگرتگ ك له‌ئادار 2003 ده‌س وه‌پیكرد تا ئاشكراكردن كووتاییهاتن جه‌نگ له‌ كانوون یه‌كه‌م 2011 وه‌گووره‌ى ئه‌و توێژینه‌وه‌یله‌ ك له‌لایه‌ن لیژنه‌ى مقه‌یه‌تیكردن رووژنامه‌نویسه‌یله‌و ئاماده‌ كریا.

وه‌ل ئه‌وه‌یشا شماره‌ى فره‌یگ له‌ رووژنامه‌نویسه‌یل له‌وه‌خت جه‌نگه‌یل گیان له‌ده‌سدان، له‌ى باوه‌تیشه‌و لیژنه‌گه‌ ك له‌ساڵ 1981 دامه‌زریاگه‌، ئاشكراى توماركردن 58 رووژنامه‌نویس كردگه‌ له‌وه‌خت جه‌نگ ناوخوه‌یى جه‌زایرى له‌ساڵ 1993 تا ساڵ 1996و كوشیان 54 رووژنامه‌نویس له‌ كیشمه‌كیش مه‌ده‌نى نائاشكرا له‌ كۆڵۆمبیا ك له‌ساڵ 1986 ده‌س وه‌پیكردو كوشیان 36 رووژنامه‌نویس له‌ كیشمه‌یكش به‌لقان له‌ناونى ساڵه‌یل 1991و1995، له‌ى دویاخریشه‌ لیژنه‌ى مقه‌یه‌تیكردن رووژنامه‌نویسه‌یل ئاشكراى كوشیان 35 رووژنامه‌نویس كرد له‌ جه‌نگ ناوخوه‌یى له‌ سوریا، بیجگه‌ ئه‌وه‌یش ئاشكراى كوشیان رووژنامه‌نویسه‌یل تریش كرد له‌وڵاته‌یل تر.

ئنجا له‌بان ئاست عراق، كوشتن رووژنامه‌نویسه‌یل وه‌ خراوترین شیواز كوشتن له‌جه‌هان تاریف كرد تا رووژ ئمڕوو، وه‌ جووریگ ك ده‌سڵاته‌یل عراق وه‌هویچ شیوه‌یگ گرینگى وه‌ له‌وه‌رگرتن رى وشوون نه‌یانه‌ له‌باوه‌ت ئى تاوانه‌یله‌.

نزیكه‌ى 117 رووژنامه‌نویس عراقى له‌ناونى ئه‌و كوشیاگه‌یله‌ بوینه‌ له‌وه‌خت جه‌نگ عراق، ك یه‌یش 58% جه‌م گشتى رووژنامه‌نویسه‌یل كوشیاگ پیك تیه‌رید، ئه‌و كه‌سه‌یلیشه‌ ك كوشیان و یارمه‌تیده‌ر رووژنامه‌نویسه‌یل بوینه‌ له‌وه‌خت ئه‌رك رووژنامه‌نویسى و رویماڵكردن رویداگه‌یل شماره‌یان 54 كه‌س بویه‌و گشتیان عراقى بوینه‌ ته‌نیا یه‌كیگ له‌لیان عراقى نه‌وى.

بیگومان له‌ى رویداگه‌یل كوشتنه‌، هیزه‌یل یاخى وه‌گشت جوره‌یلیانه‌و وه‌رپرسن له‌بان كوشتن 110 رووژنامه‌نویس و 47 كارمه‌ند یارمه‌تیده‌ر ره‌سانن، یه‌یش له‌وه‌ختیگ ك 16 رووژنامه‌نویس و 6 كارمه‌ند تر یارمه‌تیده‌ر ره‌سانن وه‌ گوله‌ى هیزه‌یل ئه‌مریكى كوشیانه‌ له‌وه‌خت بوردمان ئاسمانى و له‌هه‌مان وه‌خت هیزه‌یل سوپاى عراقییش وه‌ سه‌ركردایه‌تى ئه‌وساى سه‌دام وه‌رپرسه‌ له‌بان كوشیان 3 رووژنامه‌نویس و هیزه‌یل عراقى له‌ قوناغ دویاى ئازادكردن عراق وه‌رپرسه‌ له‌بان كوشتن 2 رووژنامه‌نویس.

فرانك سمیس

ج . أ