"كورده‌يل فه‌یلى پارچه‌یگن له‌ جگرم"

شفق نيوز

وه‌خت خه‌بات و ده‌ردو خه‌مه‌یلى بخه‌یمنه‌ وه‌رچه‌و، دى ئه‌و وه‌خته‌ په‌ى وه‌هه‌ڵویست و جموجویلى بریه‌ێدو سه‌رچه‌وه‌ى ئاشكراو ڕووشنایگ كه‌فێده‌ وه‌رده‌س ئه‌را ده‌رخستن هه‌ق و زینگى ئه‌و نه‌ته‌وه‌و چین و ملله‌ته‌.

 

هویچ وه‌ختى "قه‌ڵه‌م هه‌ق" شه‌رمه‌زار نویسانن نه‌ویه‌، رووشنهویر كوردیش ئه‌و ئاده‌میزاده‌سه‌ ك بایه‌سه‌ له‌ڕوى وژدانه‌و ته‌ماشاى كیشه‌و گرفت پیكهاته‌یل ملله‌ته‌گه‌ى بكاو خه‌بات رووژگاره‌یل سه‌خت پڕ مه‌ینه‌تى هه‌ر چین و لایه‌نیگ وه‌ قه‌درو حورمه‌ته‌و بخوه‌نیدو بنویسیدو لایه‌ن ئنسانى له‌وه‌رچه‌و بگرێد ئه‌را ئه‌وه‌ك چه‌وپووشى له‌ جیاوازى و په‌سه‌ن نه‌كردن یه‌كترى بكریه‌ێد.

ملله‌ت كورد ساڵه‌یل دویر و دریژیگ له‌وه‌ر خاتر ژیان ئازادانه‌و سه‌روه‌خوه‌یى و خاك و نیشتمانه‌گه‌ى په‌نا برده‌ وه‌ر خه‌بات چه‌كدارى و چه‌نه‌ها شووڕش گه‌ورا به‌رپا كرد له‌وه‌ر ئه‌وه‌ك بتویه‌نێد جوور ملله‌ته‌یل تر دونیا دویر له‌ژیرده‌سه‌یى و زوڵم و داگیركارى خاكى بژیه‌ێد، هه‌ر له‌وه‌ر ئه‌وه‌یش كورد فه‌یلى جوور به‌شیگ نه‌وڕیاى له‌ى ملله‌ت زوڵملیكریاگه‌ وه‌ل گشت ژان و مه‌ینه‌تیه‌یلى مه‌رامیان ئه‌وه‌ بویه‌ تاریخیگ له‌خه‌بات توومار بكه‌ن و خوه‌یان له‌نه‌وه‌یل ئاینده‌ جیاوه‌ نه‌كه‌ن ك بیجگه‌ ئه‌وه‌ك تاریخیگ له‌ حوكمڕانى داشتنه‌و ناوچه‌یل فره‌یگ له‌ژیر ده‌سڵاتیان بویه‌، وه‌لى وه‌ل ئه‌وه‌یشا له‌سه‌ره‌تاى شووڕش بارزانى نه‌مر تائیسه‌یش پشتگیر و به‌شدار بوینه‌و هه‌گبه‌ى كوردایه‌تى و مه‌ردایه‌تیان پڕ بویه‌ له‌هه‌ڵویست و خه‌بات بى وچان ك وه‌ماڵ و گیان روڵه‌یلیان پشتگیرى له‌ چاره‌نویسه‌ سیاسیه‌گه‌ى ملله‌ت كورد كردنه‌و چینیگ بنه‌ڕه‌تى بوینه‌ له‌ مه‌سه‌له‌ى پشتگیرى ئابوورى كوردستان و سه‌ركه‌فتن كورد. ئنجا دیاره‌ ته‌نیا پرووسه‌یگ ك بتویه‌نێد ڕى خوه‌ش بكا ئه‌را وه‌دیهاوردن ئاره‌زووه‌یل كویه‌ن كورد(سه‌روه‌خوه‌یى)ئه‌ویش پرووسه‌ى یه‌كگرتگى و جیاوازى نه‌كردن و پشتگووش نه‌خستن گشت پیكهاته‌و چینه‌یل كورده‌ له‌ژیر سایه‌ى حكوومه‌ت و په‌رله‌مانیگ كوردى و كوردناس و كوردپه‌روه‌ر تا دریژه‌ بدریه‌ێده‌ خه‌بات هاوبه‌ش له‌وه‌ر خاتر ئاینده‌و ژیانیگ  دویر له‌ گرفت جوور ئه‌وه‌ك سه‌ركرده‌ى نه‌مر مه‌لا مسته‌فاى بارزانى وه‌ ئه‌قڵ حه‌كیمانه‌ى خوه‌ى نه‌خشه‌ى كیشاو له‌گشت چین و تایفه‌یگ  به‌شدارى شووڕشه‌یلى كردن له‌وه‌ر خاتر به‌رژه‌وه‌ندى كورد، هه‌ر له‌وه‌ر ئه‌وه‌یش له‌ گه‌وهه‌ره‌یل گرانقیمه‌تى وتگه‌"كورد فه‌یلى پارچه‌یگن له‌جگرم"و بیجگه‌ ئه‌وه‌یش وتگه‌"كورده‌یل فه‌یلى سپه‌ڕ كوردستانن ". ئى قسه‌یله‌ خوه‌ى له‌خوه‌ى تاریخیگه‌و شایه‌تییگه‌ له‌خه‌باتكردن كورده‌یل فه‌یلى ده‌رهه‌ق وه‌ كوردو كوردستان.

 

جه‌ماڵ ئه‌ركه‌وازى