هــــه‌واڵ كــوردى
پێشمه‌رگه‌ وه‌ تونى جواو لێدوانه‌يل عبادى داره‌و

پێشمه‌رگه‌ وه‌ تونى جواو لێدوانه‌يل عبادى داره‌و


شه‌فه‌ق نيوز/ وزاره‌ت پێشمه‌گه‌ وه‌ تونى ره‌خنه‌ له‌و رخنه‌يل حه‌يده‌ر عبادى سه‌رۆك حكومه‌ت عراقيه‌ گرت له‌ بوونه‌يگ حزب ده‌عوه‌ى ئسلامى داره‌ى و خوه‌يشى سه‌ر وه‌و حزبه‌سه‌و له‌تى بڵاوكردنه‌وه‌ى هيزه‌يل عراقى له‌ ناوچه‌يل كيشه‌ له‌سه‌ر وه‌ل هه‌ولێر وه‌ "سه‌ركه‌فتن گه‌ورا" تاريف كرد.

 

وزاره‌ت پێشمه‌رگه‌ له‌ به‌ياننامه‌يگ ئه‌را(شه‌فه‌ق نيوز)وت: عبادى ئه‌و په‌لاماره‌يل و كاره‌يل داگيركاريه‌ ك هيزه‌يل عراقى ئه‌نجامى دان له‌ 16ى ئوكتۆبه‌ر گوزه‌يشت وه‌ سه‌ركه‌فتن گه‌ورا تاريف كرد وه‌ ئه‌وه‌گ كه‌متر نه‌ويه‌ له‌و سه‌ركه‌فتنه‌يله‌ ك له‌ئاكام له‌ناوبردن داعش وه‌ ده‌سهاتنه‌.

 

به‌ياننامه‌گه‌ وت: عبادى مه‌سه‌له‌ى داگيركارى سه‌ربازى و په‌لامارداين كوردستان و كوشتن و ئاواره‌كردن مه‌ردم كه‌ركوك و خورماتوو و ناوچه‌يل تر و ويانركردن و ته‌قاننه‌وه‌ى ماڵه‌يل و تاڵانكردن و بردن ماڵ و موڵك هاووڵاتيه‌يل كوردستان له‌لايه‌ن هيزه‌يل عراقيه‌و وه‌ سه‌ركه‌فتن گه‌ورا زانێد و ته‌شبيهى وه‌ سه‌ركه‌فتن له‌بان داعش ئه‌كا.

 

جى باسه‌، به‌ياننامه‌گه‌ هه‌ميش وت: ئه‌و سه‌ركه‌فتن گه‌ورا ك عبادى شانازى وه‌ پيه‌و ئه‌كا، وه‌ شايه‌تى گشت جه‌هان ئه‌گه‌ر پێشمه‌رگه‌ى كوردستان نه‌وياتاد هويچ وه‌ختيگ جيوه‌جى نه‌وێ و ئه‌گه‌ريش ئازايه‌تى و فيداكارى پێشمه‌رگه‌يل پاڵه‌وان و وه‌رگرى شه‌ره‌فمه‌ندانه‌يان نه‌وياتاد، هيزه‌يل عراقى ك عبادى سه‌رپه‌رشتييان كرد گشت كوردستان جوور خورماوو تويش به‌ڵا كرديان.