هــــه‌واڵ عــیراق
چه‌كداره‌يل وه‌ وه‌رچه‌و مه‌ردمه‌و وه‌رپرسيگ عراقى كوشتن

چه‌كداره‌يل وه‌ وه‌رچه‌و مه‌ردمه‌و وه‌رپرسيگ عراقى كوشتن


شه‌فه‌ق نيوز/ چه‌كداره‌يليگ نه‌ناسرياێ، وه‌ڕيه‌وبه‌ر ده‌زگاى پاسه‌پۆرت سه‌ر وه‌ وه‌زاره‌ت ناوخوه‌يى عراق له‌ پاريزگاى بابل وه‌ وه‌رچه‌و مه‌ردمه‌و كوشتن.

 

سه‌رچه‌وه‌يگ ئه‌منى ك شه‌فه‌ق نيوز ئاگادارێ بوى، وت: چه‌كداره‌يليگ نه‌ناسرياێ وه‌ سه‌ياره‌يگه‌و له‌ڕێ ده‌مانچه‌ى بيده‌نگه‌و ته‌قه‌ له‌ عه‌قيد "سه‌فا حه‌سه‌ن" كردنه‌ له‌وه‌خت گله‌وخواردنى له‌ ده‌وام فه‌رمى و كوشتنه‌سه‌ى.

 

سه‌رچه‌وه‌گه‌ هه‌ميش وت: عه‌قيد حه‌سه‌ن يه‌كسه‌ر گيان له‌ده‌سداگه‌و چه‌كداره‌يليش چينه‌ وه‌ره‌و شوونيگ ناديار وه‌رجه‌ ره‌سين هيزه‌يل ئه‌منى ئه‌را شوون روێداگه‌گه‌ له‌ جاده‌ى 60 له‌ ناوڕاس شار حله‌ ناوه‌ند پاريزگاگه‌.