هــــه‌واڵ عــیراق
دو مه‌رجه‌ع ئايينى ره‌خنه‌ێ تون له‌ شيواز حوكم له‌ عراق گرتن

دو مه‌رجه‌ع ئايينى ره‌خنه‌ێ تون له‌ شيواز حوكم له‌ عراق گرتن


شه‌فه‌ق نيوز/ جه‌واد ئه‌لخاڵسى و فازڵ ئه‌لمالكى هه‌ردوگ مه‌رجه‌ع ئايينى وه‌ تونى ره‌خنه‌ له‌ى بارودوخه‌ گرتن ك وجوود ديرێد له‌ مه‌يدان سياسێ عراقى.

 

له‌ى باوه‌ته‌و نويسينگه‌ێ ئه‌لخاڵسى له‌ به‌ياننامه‌يگ ئاشكراێ ئه‌وه‌ كرد ك هه‌ردوگ مه‌رجه‌ع له‌ ديداريگ له‌ شار قوم ئيرانى ره‌خنه‌ێ تونيگ له‌ بار سياسى عراق گرتنه‌و باس له‌وه‌يش كرياگه‌ ك پشتبه‌سانن وه‌ بيگانه‌ نه‌بايه‌د له‌ هويچ وه‌ختيگ خزمه‌ت وه‌ عراق بڕه‌سنێد، به‌ڵكوو يه‌يش كيشه‌ێ عراق و جه‌هان ئسلاميه‌.

 

به‌ياننامه‌گه‌ وت: خاڵسى ئاماژه‌ وه‌يه‌يش كردگه‌ ك بڕيگ له‌ سياسيه‌يل شكه‌ست هاوردنه‌ وه‌ تايبه‌ت ئه‌وانه‌گ به‌شدارێ له‌ پرووسه‌ێ سياسى كردنه‌و ملله‌ت عراق باوه‌ڕيان وه‌پيان نه‌مه‌ندگه‌.

 

به‌ياننامه‌گه‌ له‌ زووان ئه‌لمالكييش وت: ئى بار گرژه‌ ك هاته‌سه‌ تويش ملله‌ت عراق له‌گشت بوراه‌يل ئابوورێ و كۆمه‌ڵايه‌تى وه‌ بوونه‌ێ بار خراو ئيسه‌ێ سياسى و قه‌يرانه‌يله‌ ك بايه‌سه‌ له‌بان سياسيه‌يل ئى وڵاته‌ دگان وه‌ێ قه‌يران و ئاكامه‌يلێ بنه‌ن و له‌ هه‌مان وه‌خت ره‌خنه‌يش له‌ بڕيگ له‌ليان گرت له‌ حوكمكردن و باسيش له‌ بڕيگ له‌ قه‌واره‌يل سياسى كرد ك بنيات له‌بان بنه‌ماێ تايفى نانه‌.