هــــه‌واڵ عــیراق
حه‌داد داوا له‌ كوه‌يت ئه‌كا لاپه‌ڕه‌يل گوزه‌يشت بووه‌سێد

حه‌داد داوا له‌ كوه‌يت ئه‌كا لاپه‌ڕه‌يل گوزه‌يشت بووه‌سێد


شه‌فه‌ق نيوز/ به‌شير حه‌داد جيگر سه‌رۆك ئه‌نجومه‌ن وه‌زيره‌يل له‌ نويسينگه‌ى خوه‌ى له‌ به‌غدا پيشوازى له‌ شانديگ له‌ پياوه‌يل كار كوه‌يتى كرد وه‌ سه‌رۆكايه‌تى ئه‌لشه‌ريف بيلال ئال پاشا ئه‌لعه‌بده‌لى.

 

له‌و ديداره‌ باس له‌ ريه‌يل پته‌وكردن ئاسوو هاوكارى ئابورى و بازرگانى به‌رهه‌مدار كريا له‌ناونى هه‌ردگ وڵات هاوساو هانداين كۆمپانيايه‌يل كوه‌يتى ئه‌را هاوكارى وه‌ل كۆمپانيايه‌يل عراقى له‌ ئاوه‌دانكردنه‌وه‌و پرووژه‌يل ژيرخان ئابورى.

 

حه‌داد له‌ به‌ياننامه‌يگ ئه‌را شه‌فه‌ق نيوز ئاماژه‌ وه‌ گرنگى فراوامركدن په‌يوه‌نديه‌يل دولايه‌نه‌ كرد له‌ بواره‌يل جياجيا و كاراكردنه‌وه‌ى ميكانيزمه‌يل هه‌ماهه‌نگى و هاوكارى له‌ كه‌رت وه‌به‌رهاوردن و فراوانكردن ئاڵشتوئولشت بازرگانى له‌وه‌ر په‌ره‌داين ئابوورى و كۆمه‌ڵايه‌تى و دابينكردن ده‌رفه‌ته‌يل كار له‌ هه‌ردوگ وڵات و هه‌ميش وت: ئوميده‌واريم لاپه‌ڕه‌يل كويه‌ن بووه‌سێد له‌وه‌ر وجوود كاره‌يل فريه‌يگ هاوبه‌ش له‌ناونى هه‌ردوگ ملله‌ت.

 

لاى خوه‌ييشه‌و ئه‌لشه‌ريف بيلال ئال پاشا ئه‌لعه‌بده‌لى خوه‌شاڵى خوه‌ى ده‌رخست وه‌ ديدارى وه‌ل حه‌داد و تاووتوێكردن كاره‌يل گرنگ و هاوبه‌ش و ئاماژه‌يش وه‌ گرنگى دامه‌زرانن پيه‌ڵه‌يل په‌يوه‌ندى و هاوكارى ئابورى و وه‌به‌رهاوردن و پيشكه‌شكردن ئاسانكارى ئه‌را پياوه‌يل كار و وه‌به‌رهاوه‌ره‌يل كرد له‌ هه‌ردوگ وڵات له‌وه‌ر به‌شدارى له‌ بنياتنانه‌وه‌و په‌ره‌داين ئابورى.