هــــه‌واڵ كــوردى
خانه‌قين وه‌ جيوازكردن كارمه‌نده‌يلێ ئه‌را باقووبه‌ تويش سزاى وه‌جه‌م هات

خانه‌قين وه‌ جيوازكردن كارمه‌نده‌يلێ ئه‌را باقووبه‌ تويش سزاى وه‌جه‌م هات


شه‌فه‌ق نيوز/ ئه‌نداميگ له‌ ئه‌نجومه‌ن پاريزگاى دياله‌، ئاشكراى جيوازكردن زياتر له‌ 60 كارمه‌ند له‌ خانه‌قين كرد ئه‌را مه‌لاك پاريزگاگه‌.

 

له‌ى باوه‌ته‌و، زاهد خه‌ليل ئه‌ندام ئه‌نجومه‌ن پاريزگاى دياله‌ له‌بان فراكسيۆن يه‌كێتى نيشتمانى كوردستان، له‌ باسيگ ئه‌را(شه‌فه‌ق نيوز)وت: 61 كارمه‌ند له‌ نه‌فتخانه‌ى خانه‌قينه‌و ئه‌را ماوه‌ى چه‌ن مانگيگ هه‌ڕه‌شه‌ێ جيوازكردن له‌ليان كريا ئه‌را ناوه‌ند قه‌زاى باقووبه‌ و هه‌رچى هه‌وڵه‌ ئه‌را وسانن ئه‌و بڕيار جيوازكردنيانه‌ شكه‌ست هاورد و گشت ئه‌و كارمه‌نده‌يليشه‌ خه‌ڵك خانه‌قينن و يه‌يش جوور سزايگ وه‌جه‌مه‌ دژ مه‌ردم خانه‌قين.

 

جى باسه‌، له‌ئاكام راپرسى هه‌رێم كوردستان، هيزه‌يل عراقى له‌ ده‌ورگرد قه‌زاى خانه‌قين و شاره‌يل تر كيشه‌ له‌سه‌ر بڵاوه‌و بوينه‌، له‌ وه‌ختيگ ك ئى قه‌زا مه‌ردمه‌گه‌ى فيشتر لايه‌نگر راپرسى بوين و گه‌وراترين ريژه‌ى به‌شداركردن تۆمار كردن.