هــــه‌واڵ كــوردى
واشنتۆن مقه‌يه‌تيكردن كوردستان له‌ كووچبه‌ره‌يل به‌رز نرخان

واشنتۆن مقه‌يه‌تيكردن كوردستان له‌ كووچبه‌ره‌يل به‌رز نرخان


شه‌فه‌ق نيوز/ حكومه‌ت هه‌رێم كوردستان، جه‌خت له‌وه‌ كرد ك واشنتۆن مقه‌يه‌تيكردن كوردستان له‌ فريه‌يى ئايينى له‌ هه‌رێم و پشتگيرى كووچبه‌ره‌يل به‌رز نرخانگه‌و له‌نوو لايه‌نگرى له‌ گرينگى گفتگوو كردگه‌ له‌ ناونى به‌غدا و هه‌ولێر وه‌خاتر چاره‌سه‌ر كيشه‌يل ناونيان.

 

له‌ى باوه‌ته‌و، ماڵپه‌ڕ حكومه‌ت هه‌رێم له‌ به‌ياننامه‌يگ ئه‌را(شه‌فه‌ق نيوز)وت: فه‌لاح مسته‌فا وه‌زير په‌يوه‌نديه‌يل خارجى له‌ حكومه‌ت هه‌رێم كوردستان و به‌يان سامى عه‌بدولڕه‌حمان نوێنه‌ر حكومه‌ت هه‌رێم كوردستان له‌ وڵاته‌يل يه‌كگرتگ دانيشتن وه‌ل وه‌رپرسه‌يل ئداره‌ى ئه‌مريكى ساز كردنه‌ ئه‌را خستن رووشنايى له‌بان هه‌وه‌جه‌ێ فيشتر به‌شدارى ئه‌مريكى له‌ عراق.

 

به‌ياننامه‌گه‌ وت: فه‌لاح مسه‌فا و به‌يان عه‌بدولڕه‌حمان له‌ سه‌ردانيان ئه‌را وزاره‌ت وه‌رگرى ئه‌مريكى چه‌ويان كه‌فته‌سه‌ رۆبه‌رت كارم وه‌زير وه‌رگرى ئه‌را كاروبار ئاسايش ناوده‌وڵه‌تى و مه‌سته‌فا جه‌خت له‌بان داوه‌ت حكومه‌ت هه‌رێم كردگه‌ ئه‌را گفتگوو له‌بان بنه‌ماى ده‌ستوور عراقى و داواى دامه‌زرانن ميكانيزميگ ئاسايشى هاوبه‌ش كردگه‌ له‌ ناوچه‌يل كيشه‌ له‌سه‌ر تا وه‌ختيگ مادده‌ى 140 جيوه‌جى ئه‌كريه‌ێد وه‌ل زيايكردن به‌شدارى وڵاته‌يل يه‌كگرتگ ئه‌را زه‌مانه‌ت ئاگربه‌س و جيوه‌جيكردنى و چاره‌سه‌ر ناكووكيه‌يل له‌ڕێ گفتگوو.

 

جى باسه‌، به‌ياننامه‌گه‌ هه‌ميش وت: مسته‌فاو عه‌بدولڕه‌حمان سه‌ردان وزاره‌ت خارجيه‌ى ئه‌مريكييش كردنه‌ و چه‌ويان كه‌فته‌سه‌ مايكڵ كوزاك ده‌سميه‌تده‌ر ئه‌ميندار گشتى كاروبار ديموكراسى و مافه‌يل ئاده‌ميزاد و نوكس سامس راوێژكار تايبه‌ت ئازادى ئايينى و باس له‌ بارودوخ پيكهاته‌يل ره‌گه‌زى و ئايينى و حاڵه‌ته‌يل ئنسانى كردنه‌ له‌ عراق و كوردستان و له‌ى باوه‌تيشه‌و كوزاك ئه‌وه‌ ده‌رخستگه‌ ك حكومه‌ت ئه‌مريكى دگان وه‌ هه‌وڵ حكومه‌ت هه‌رێم ناگه‌ له‌ مه‌سه‌له‌ێ مقه‌يه‌تيكردن جه‌ماعه‌ته‌يل ئايينى و مقه‌يه‌تيكردن كووچبه‌ره‌يل.