هــــه‌واڵ عــیراق
په‌رله‌مان عراقى له‌نوو شكه‌ست هاورد له‌ سازكردن دانيشتنه‌گه‌ێ

په‌رله‌مان عراقى له‌نوو شكه‌ست هاورد له‌ سازكردن دانيشتنه‌گه‌ێ


شه‌فه‌ق نيوز/ په‌رله‌مان عراقى ك ماوه‌ى ولايه‌ته‌گه‌ى ته‌مام بويه‌ جاريگتر شكه‌ست هاورد له‌ دانيشتنه‌ نائاساييه‌گه‌ى ئه‌را تاوتوێكردن تومه‌ته‌يل له‌باره‌ى ساخته‌كردن هه‌ڵوژاردنه‌يل په‌رله‌مانى ك ئه‌نجام دريا له‌ 12ى ئى مانگه‌.

 

ئى دانيشتنه‌ ئمڕووه‌ ته‌واوكه‌ر دانيشتنه‌گه‌ى شه‌ممه‌ى گوزه‌يشت بوێ ك په‌رله‌مان له‌ سازكردنى سه‌رنه‌كه‌فت له‌ئاكام ئاماده‌بوين ته‌نيا 105 ئه‌ندام، له‌ وه‌ختيگ ك سازكردن دانيشتن بايه‌سه‌ وه‌ زوورم ده‌نگه‌يل بدێ وه‌ماناى(نيمه‌ + 1) ك ئه‌كاده‌ 165 ئه‌ندام له‌ جه‌م 328.

 

جى باسه‌، له‌ئاكام ئه‌وه‌يش سه‌ليم جبورى سه‌رۆك په‌رله‌مان عراقى ناچار بوێ دانيشتنه‌ بكاده‌ دانيشتنيگ ته‌شاورى و دوياخريش به‌ياننامه‌يگ له‌باره‌يه‌و ده‌ركرد و له‌تى داوا له‌ كومسيۆن باڵاى سه‌روه‌خوه‌ێ هه‌ڵوژاردنه‌يل كرد په‌يجوورى له‌ سكاڵايه‌يل هه‌ڵوژاردن بكا.