ڕاپــۆرت تایبـه‌ت
ميرات داعش چوين وازێ وه‌ شاره‌يل عراق ئه‌كا؟

ميرات داعش چوين وازێ وه‌ شاره‌يل عراق ئه‌كا؟


شه‌فه‌ق نيوز/ رووژنامه‌ى "غارديان" رايۆرتيگ بيته‌ر بيمۆنت په‌يامنێرى له‌ فه‌لوجه‌ى عراقه‌و بڵاو كرد و له‌تى ئويشێد: خوه‌ندنگاى شه‌هيده‌يل ئه‌كه‌فێده‌ ناوچه‌يگ ك سه‌ختترين به‌ره‌يل تون و تيژى بوێ له‌ژير ده‌سڵات ريكخرياگ داعش.

 

بيمۆنت ئويشێد: بايه‌سه‌ له‌بان مناڵه‌يل وه‌ جاده‌يل خوه‌ڵين و ده‌وردرياێ وه‌ تۆپه‌يل ره‌نگكرياێ وه‌ ره‌نگ قرمز ڕێ بكه‌ن و لافيته‌يليگ له‌تيان هه‌ڵواسريايه‌و ره‌سم جمجمه‌ و سقانه‌يلێ ها له‌تى و وشدارييش درياش له‌ په‌ڕينه‌وه‌ى ئه‌و خه‌ته‌، وه‌ل ئه‌وه‌يشا مينڕيژى وجوود ديرێد و ريكخرياگه‌گه‌ ناسه‌يانه‌ چاڵ. ئاماژه‌ وه‌يه‌يش كرد سه‌دان ته‌قه‌مه‌نيه‌يليش ك ده‌سكردن له‌و شوونه‌ دانريانه‌ و له‌ناو ماڵه‌يليگ ك جه‌نگ ويرانيان كردگه‌ و له‌ناو جاده‌يل، ك يه‌يش ته‌لبه‌نيگ دروس كردگه‌ وه‌ دريژايى 15 كيلۆمه‌تر يا زياتر.

 

راپۆرته‌ ئاماژه‌ وه‌ ئه‌وه‌ كردگه‌، ژيان مه‌ردم له‌ ناوچه‌ى شوهه‌دا له‌ باشوور فه‌لوجه‌ بويه‌سه‌ گره‌و ده‌ورگرد مينه‌يل، چوينكه‌ مينه‌يل ئه‌رايان دياريى ئه‌كا له‌كاملا بژيه‌ن و له‌كام شوونيگه‌و رێ بكه‌ن و له‌ كوورا بكاڵن و له‌ چ شوونيگ رێ وه‌ مناڵه‌يليان بيه‌ن وازێ بكه‌ن. باس له‌وه‌يش كرد فه‌لوجه‌ ئه‌وسا يه‌كيگ بويه‌ له‌ يه‌كه‌مين شاره‌يل عراقى ك له‌ژير ده‌سڵات ئه‌و ريكخرياگه‌ هاورياوه‌و ته‌رك كريا تا بناڵێد وه‌ده‌س ميرات جه‌نگ كوشنده‌ى وه‌رده‌وام.

 

رووژنامه‌گه‌ وت: وه‌ل كووتاييهاتن ماوه‌ى خوه‌نين شه‌وه‌كيان، سه‌ياره‌يل بويچگ ئه‌يه‌ن و باوگه‌يل مناڵه‌يليان ئه‌وه‌نه‌و، باقى مناڵه‌يليگ وه‌ بڕه‌و رێ ئه‌كه‌ن و له‌و باريكه‌ ريه‌يله‌ رێ ئه‌كه‌ن ك ئه‌مان كرياگه‌ ئه‌رايان و نيشانه‌يل "هالو تراست" كۆمه‌ڵه‌ێ خێرخوازێ بريتانى ها وه‌پيانه‌و ك تايبه‌ته‌ ئه‌را كاره‌يل لاوردن مين.

 

نويسه‌ره‌گه‌ ئاشكراى ئه‌كا ك وازكردن خوه‌ندنگايه‌يل مه‌سه‌له‌يگ ئه‌وله‌ويه‌ت بويه‌ وه‌ نسبه‌ت ئه‌را خيزانه‌يل ك گله‌وخواردنه‌ وه‌ كه‌مه‌ كه‌مه‌ ئه‌را شاره‌گه‌، له‌ى باوه‌تيشه‌و سامى حه‌مه‌د عه‌باس جيگر وه‌ڕيه‌وبه‌ر خوه‌ندنگاگه‌ وت: ئى چشته‌ زويتر مومكن نه‌وێ، هه‌ر له‌وه‌ر ئه‌وه‌يش ده‌رس مناڵه‌يل دريا له‌ناو كه‌ره‌ڤانه‌يل و بايه‌سه‌ هه‌فتانه‌يش بخريه‌ێده‌ هوير مناڵه‌يل ك ناوچه‌گه‌ مه‌ترسى فريه‌س له‌تى ك هيمان له‌ مين پاكه‌و نه‌كرياگه‌.

 

عه‌باس وت: گشت رووژه‌يل په‌نجشه‌ممه‌ خوه‌ندكاره‌يل گرده‌و ئه‌كه‌يم له‌ خوه‌ندنگاگه‌ باس له‌ مه‌ترسيه‌يل  مين ئه‌رايان ئه‌كه‌يم و ئاگاداريان ئه‌كه‌يم له‌و ڕيه‌يله‌ ك ئه‌مانه‌ گوزه‌ر بكه‌ن.

 

وه‌گووره‌ى راپۆرته‌گه‌، فه‌لوجه‌ نيشانه‌يگ له‌ كيشه‌ێ فراوانتر ديرێد، ئه‌و ته‌قه‌مه‌نيه‌يله‌ ك ريكخرياگ داعش هاوردياده‌ى به‌رهه‌م له‌ئاست نيمچه‌ سونعه‌تيگ ئه‌را بڵاوكردنه‌وه‌يان له‌ شوونه‌يل ميندار، بوياده‌ وه‌ربه‌س و ريگر، ك بڵاو كريانه‌ له‌ باكوور و خوه‌رئاواى عراق له‌ موسڵ تا ره‌سێده‌ قائم له‌ نزيك مه‌رز سورى.

 

رووژنامه‌گه‌ باس له‌وه‌ ئه‌كا، كيشه‌گه‌ تايبه‌ت وه‌ عراق نيه‌، مينه‌يل ده‌سكرد له‌ هه‌ر يه‌ك له‌ ئه‌فغانستان و سوريا و يه‌مه‌نيش دوينرياسه‌و، ك يه‌يش هه‌ڕه‌شه‌يگه‌و كاريگه‌رى كردگه‌ له‌بان هه‌وڵه‌يل جه‌هانى ئه‌را كه‌مه‌وكردن له‌ تويشهاتن وه‌ مين و هيشتنه‌وه‌ى له‌ حاڵه‌ت پاشگه‌زبوينه‌وه‌.

 

بيمۆنت زياتر وت: ئه‌گه‌ر چشتيگ هووكار به‌ختدارى ناوچه‌ى شوهه‌دا بدێ وه‌ هه‌ر شيوه‌يگ له‌ شيوه‌يل، ئه‌ويش ئه‌وه‌سه‌ ك يه‌كه‌مين ناوچه‌يگ عراقى بوێ ك له‌داعش قورتار كريا، ئه‌و ته‌قه‌مه‌نيه‌يليشه‌ وه‌ چه‌واشه‌ى مينه‌يل جه‌نگ سه‌ردن ك چالاكيه‌يلێ وه‌ل وه‌خته‌و كه‌مه‌و ئه‌دێ.

 

راپۆرته‌گه‌ ئاماژه‌ وه‌يه‌يش ئه‌كا ك ناوچه‌گه‌ هه‌وڵه‌يل فريه‌يگ ديه‌  ئه‌را پاكه‌وكردنى له‌ مين، له‌وانه‌يش ريكخرياگ (هالو تراست) بريتانى ك له‌ ماوه‌ى وه‌رز تاوسان له‌ورا ده‌سكرده‌ كاركردن.

 

غارديان راپۆرته‌گه‌ێ وه‌و ئاماژه‌ كووتايى وه‌پى هاوردگه‌ ك نيشانه‌ له‌بان ئه‌و مه‌ترسيه‌يله‌ ك ئه‌و مه‌ردمه‌ له‌تى ژيه‌ن ئاشكراس، ئه‌ويش هه‌ناى په‌لامار ده‌س وه‌پيكرد وه‌ گوله‌ له‌ ئاواييگ له‌ باكوور فه‌لوجه‌، ك ئه‌ويش بويه‌ هووكار كوشيان ميشان خه‌ليك ك سه‌ركردايه‌تى تيم ئامار سه‌ر وه‌ كۆمه‌ڵه‌ى هالو تراست كرد.