هــــه‌واڵ عــیراق
شانديگ بانكى عراقى له‌ ئه‌مريكا ده‌رفه‌ت هاوكارى تاوتوێ كرد

شانديگ بانكى عراقى له‌ ئه‌مريكا ده‌رفه‌ت هاوكارى تاوتوێ كرد


شه‌فه‌ق نيوز/ شانديگ بانكى عراقى وه‌ل شماره‌يل يه‌ بانكه‌يل و ده‌زگايه‌يل دارايى له‌ وڵاته‌يل يه‌كگرتگ ئه‌مريكى باس له‌ ده‌رفه‌ته‌يل هاوكارى ناونى هه‌ردوگلا كرد.

 

له‌ى باوه‌ته‌و، رابته‌ێ بانكه‌يل تايبه‌ت عراقى له‌ به‌ياننامه‌يگ ئه‌را(شه‌فه‌ق نيوز)وت: شانديگ له‌ 17 بانك تايبه‌ت و هه‌ردوگ بانك رافده‌ين و پيشه‌سازى و عه‌لى تاريق وه‌ڕيه‌وبه‌ر جيوه‌جيكار رابته‌ى بانكه‌يل تايبه‌ت و شماره‌يگ له‌ راوێژكاره‌يل رابته‌گه‌ دانيشتنيگ له‌ ناوه‌ند دراسات ستراتجى ئه‌مريكى له‌ شار واشنتۆن وه‌ل شانديگ ئه‌مريكى ئه‌نجام دانه‌ ك پيكهاتگه‌ له‌ خه‌زانه‌ى ئه‌مريكى و بانكه‌يل ئه‌مريكى و ده‌زگاى ئۆپيك و ده‌زگايه‌يل دارايى ئه‌مريكى و شماره‌يگ له‌ كارمه‌نده‌يل له‌ باڵوێزخانه‌ێ ئه‌مريكى و له‌و ديداره‌ باس له‌ ئابوورى عراق و روێ وه‌ڕوێ بوينه‌وه‌ى قه‌يرانه‌يل كردنه‌.

 

جى باسه‌، به‌ياننامه‌گه‌ باس له‌وه‌يش كرد ك له‌و دانيشتنه‌ باس له‌ په‌ره‌سه‌ندن كه‌رت بانكى عراقييش كرياگه‌ وه‌ تايبه‌ت له‌ى په‌نج ساڵ دوياخره‌ وه‌ل بته‌وكردن هاوكارى وه‌ل بانكه‌يل عه‌ره‌بى و بيگانه‌ بيجگه‌ پلانه‌يل له‌نوو ئاوه‌دانكردنه‌وه‌ى ناوچه‌يل ئازادكرياێ و په‌ره‌داين وه‌ كه‌رت نه‌فتى.