هــــه‌واڵ عــیراق
په‌رله‌مانتاريگ كورد ئه‌خوازێد كوتله‌گه‌ێ به‌شدارى حكومه‌ت عه‌بدولمهدى نه‌كا

په‌رله‌مانتاريگ كورد ئه‌خوازێد كوتله‌گه‌ێ به‌شدارى حكومه‌ت عه‌بدولمهدى نه‌كا


شه‌فه‌ق نيوز/ هۆشيار عه‌بدوڵڵا ئه‌ندام له‌بان بزووتنه‌وه‌ى گۆڕان، پيشنيار ئه‌وه‌ كرد بزووتنه‌وه‌گه‌ى به‌شدارى له‌ كابينه‌ى وه‌زارى نه‌كا ئه‌را داين ده‌رفه‌ت له‌وه‌رده‌م عادل عه‌بدولمهدى سه‌رۆك وه‌زيره‌يل راسپارياێ له‌وه‌ر هه‌ڵوژانن وه‌زيره‌يل تازه‌، ئه‌ويش وه‌گووره‌ى باوه‌ڕ خوه‌ى دوير له‌ به‌شبه‌شايه‌تى حزبى و تايفى و نه‌ته‌وه‌يى.

 

عه‌بدوڵڵا له‌ به‌ياننامه‌يگ وت: بارودوخ ئيسه‌ و ئاڵشتكاريه‌يل سياسى مه‌سه‌له‌ى ته‌كليفكردن عه‌بدولمهدى ئه‌را دامه‌زرانن حكومه‌ت تازه‌ حه‌تميه‌ت له‌بان بزووتنه‌وه‌گه‌ ئه‌كا ك پشتگيرى له‌لى بكا وه‌گشت قورساييگ حزبى و په‌رله‌مانى ئه‌را ئه‌وه‌گ سه‌بكه‌فێد له‌ ئه‌ركه‌گه‌ێ چ له‌دامه‌زرانن كابينه‌ وه‌زاريه‌گه‌ى له‌وه‌خت دياريكرياى ده‌ستوورى يا راسه‌وكردن ئه‌ركه‌يل حكومى و چاره‌سه‌ركردن كاره‌يل كه‌ڵه‌كه‌بوێ حكومه‌ت وه‌رين و دژايه‌تيكردن مه‌سه‌له‌ى گه‌ناته‌كارى ك وڵاته‌گه‌ ره‌سانه‌ ئى حاڵه‌ته‌.

 

جى باسه‌، عه‌بدوڵڵا هه‌ميش وت: له‌ى له‌حزه‌وه‌ پيشنيار ئه‌كه‌م ئه‌را بزووتنه‌وه‌ى گۆڕان به‌شدارى له‌ كابينه‌ى وه‌زارى تازه‌ نه‌كاو ده‌رفه‌ت ئه‌راى بيليمنه‌و ئه‌را كانديدكردن هه‌ر كه‌سايه‌تيه‌يليگ تر ك وه‌ گونجياگ ئه‌زانێده‌ى چ كورد يا عه‌ره‌ب يا له‌باقى پيكهاته‌يل تر ئه‌را وه‌رگرتن پۆسته‌يل وه‌زارى وه‌بى گرنگيداين  وه‌ ئنتماى نه‌ته‌وه‌يى و مه‌زه‌وى.