هــــه‌واڵ عــیراق
"نه‌وه‌ى نوێ" ره‌خنه‌ له‌ عه‌بادى ئه‌گرێد و داواكاره‌ پاشگه‌زه‌و بدێ له‌ برياره‌يلێ

"نه‌وه‌ى نوێ" ره‌خنه‌ له‌ عه‌بادى ئه‌گرێد و داواكاره‌ پاشگه‌زه‌و بدێ له‌ برياره‌يلێ


شه‌فه‌ق نيوز/ شاسوار عه‌بولواحد ئه‌ميندار گشتى جووڵانه‌وه‌ى نه‌وه‌ێ نوێ له‌ هه‌رێم كوردستان، وه‌ تونى ره‌خنه‌ گرت له‌ بڕياره‌يل حه‌يده‌ر عه‌بادى سه‌رۆك ئه‌نجومه‌ن وه‌زيره‌يل ك ولايه‌تى ته‌مام بويه‌و داوايش له‌لى كرد پاشگه‌زه‌و بدێ له‌و برياره‌يله‌.

 

عه‌بدولواحد له‌ به‌ياننامه‌يگ ئه‌را شه‌فه‌ق نيوز وت: جى داخه‌ بڕياره‌يليگ وه‌په‌له‌و ناشيه‌وكرياێ ده‌رچيه‌ له‌لايه‌ن حه‌يده‌ر عه‌بادى سه‌رۆك حكومه‌ت وه‌ڕيخه‌ر و خراوترين ئه‌و بڕياره‌يليشه‌ لاوردن فالح فه‌يسه‌ڵ فه‌ياز سه‌رۆك ده‌سه‌ى حه‌شد شه‌عبى بوێ له‌وه‌ر هووكاره‌يل شه‌خسى ك له‌لاى گشت كه‌ش ئاشكراس.

 

عه‌بدولواحد وت: وه‌كارهاردن پۆست حكومى ئه‌را ده‌ركردن كه‌سه‌يل تر سياسى له‌چوارچيوه‌ى ركابه‌ريه‌يل ئه‌را وه‌رگرتن پۆسته‌يل سه‌رپيچييگ ئاشكراى ياسايى و ده‌ستووريه‌و ده‌خاڵه‌تكردن له‌ ده‌سه‌ى حه‌شد شه‌عبييش هه‌ڵه‌يگ جى وه‌خشين نيه‌و حه‌يفه‌ كرده‌وه‌يل عه‌بادى بويه‌ هووكار لاوردن سه‌رۆك ده‌سه‌ى حه‌شد.

 

جى باسه‌، عه‌بدولواحد هه‌ميش وت: كيشمه‌كيش كورسى له‌يوا له‌ عه‌بادى كرد ره‌سيم سياسه‌ت خارجيه‌ ئه‌را عراق دوباره‌وه‌ بكا وه‌گووره‌ى مه‌يل شه‌خسى خوه‌ى و موجامله‌ى ئداره‌ى ئه‌مريكا ئه‌كا له‌وه‌ر وه‌ده‌سهاوردن به‌زه‌يى ئه‌و ئداره‌و پشتگيريكردنى ئه‌را پۆست سه‌رۆك وه‌زيره‌يل له‌وه‌ختيگ وه‌بى شه‌رم لايه‌نگرى سزايه‌يل ئه‌مريكا كرد ئه‌را بان ئيران ك هه‌رچه‌نى هاوپه‌يمان ستراتيجى عراقيشه.‌