هــــه‌واڵ كــوردى
پێشمه‌رگه‌ 17 داعشى ده‌سگير كرد و له‌ ناونيانيش ژنيگ ئه‌ڵمانێ

پێشمه‌رگه‌ 17 داعشى ده‌سگير كرد و له‌ ناونيانيش ژنيگ ئه‌ڵمانێ


شه‌فه‌ق نيوز/ سه‌رپه‌رشياره‌يل له‌بان كه‌مپ پيشوازيكردن ئه‌و په‌نابه‌ره‌يله‌ ك له‌ شار ته‌لعه‌فه‌ر واينه‌، باس له‌وه‌ كردن ك هيزه‌يل پێشمه‌رگه‌ تويه‌نستگه‌ 17 ترۆريست داعشى ده‌سگير بكه‌ن و له‌ ناونيانيش ژنيگ وه‌ ره‌گه‌ز ئه‌ڵمانێ  وه‌ گووره‌ێ پلانيگ ك زويتر دانرياوێد وه‌ هاوكارى وه‌ل يه‌كيگ له‌و كه‌سه‌يله‌ ك كار له‌بان ده‌ركردن مه‌ده‌نيه‌يل كووچبه‌ر كردياد وه‌ پويل.

 

چۆمان سندێ سه‌رپه‌رش له‌بان پيشوازيكردن كووچبه‌ره‌يل له‌ مه‌رزه‌يل ناحيه‌ێ ئه‌لعه‌يازيه‌ له‌ ته‌لعه‌فه‌ر له‌ لێدوانيگ رووژنامه‌گه‌رێ وت: هاووڵاتييگ عه‌ره‌ب كار له‌ ته‌هريب ئه‌كاو تواسگه‌ 17 كه‌س ده‌ربكا له‌ ترۆريسته‌يل داعش وه‌ل 4 مناڵ ئه‌را توركيا له‌ڕێ مه‌رزه‌يل سه‌ر وه‌ هيزه‌يل پێشمه‌رگه‌ له‌ وه‌رانوه‌ر وه‌رگرتن پويل له‌ليان ك خود ئه‌و كه‌سه‌ خه‌دع ئه‌و ترۆريسته‌يله‌ كردگه‌ له‌ وه‌ختيگ ره‌ساننيان ئه‌را نزيك سه‌نگه‌ره‌يل پێشمه‌رگه‌و ته‌سليميان كرده‌سه‌ ئه‌وان و يه‌كسه‌ريش ته‌سليم وه‌ هيزه‌يل ئاسايش كريانه‌ وه‌خاتر له‌وه‌رگرتن ڕى و شوون ياسايى ده‌رهه‌قيان.

 

جى باسه‌، سندێ هه‌ميش وت: 15 له‌و ترۆريسته‌يله‌ پياو بوينه‌و دووانيانيش ژن بوينه‌و يه‌كيگ له‌ليان وه‌ڕه‌گه‌ز ئه‌ڵمانێ بويه‌ بيجگه‌ 4  مناڵ ك گشتيان توركمان بوينه‌و ئاشكراێ يه‌يش كرد ك ژنه‌ ئه‌ڵمانياگه‌ ريككه‌فتگه‌ وه‌ل كابراێ موهه‌ڕب ئه‌را ده‌ركردن ئه‌و جه‌ماعه‌ت ئه‌را توركيا له‌ڕێ ئه‌و ناوچه‌يله‌ ك هانه‌ ژير ده‌سڵات پێشمه‌رگه‌، وه‌لێ كابرا حيله‌ وه‌ليانا كردگه‌و گشتيان ته‌سليم وه‌ هيزه‌يل پێشمه‌رگه‌ كردگه‌.