وتـار شـه‌فـه‌ق
فه‌يليه‌يل و ئه‌وه‌گ له‌ هه‌ڵوژاردنه‌يل ئه‌كه‌فێده‌و

فه‌يليه‌يل و ئه‌وه‌گ له‌ هه‌ڵوژاردنه‌يل ئه‌كه‌فێده‌و


شه‌فه‌ق نيوز/ دوياى سه‌رده‌مه‌يليگ له‌ جه‌نگ، بايه‌سه‌ له‌بان مه‌ردم كه‌مه‌ كه‌كه‌ ڕا بان له‌بان سه‌ردم ناجه‌نگى و ئاسايش، چوينكه‌ ده‌نگه‌يليگ ته‌پڵ ئه‌وه‌ كوتيان ته‌نانه‌ت خه‌و له‌ مردگه‌يليش حه‌رام ئه‌كه‌ن و گه‌ه‌وراترين زه‌ره‌د له‌ زينگه‌يليش دا.

 

بايه‌سه‌ له‌بانمان ئه‌ه‌و وشه‌يله‌ پاكه‌و بكه‌يم ك نيشانه‌ن ئه‌را شه‌ڕ و جه‌نگ، چوينكه‌ رووح ئه‌گريده‌وه‌و زووان خه‌فنێد و تارمايى ئه‌خاده‌ ديده‌ن. بايه‌سه‌ سووزدارى بخريه‌ێده‌ كنار و بپرسيم ئه‌راچه‌ ئاشنا نه‌ويم وه‌ل رووژگار و وه‌خته‌يل مردن نيشانه‌يل خوه‌شه‌ويستى له‌ ناونيمان؟ ئيمه‌ نائاگايم وه‌ئه‌وه‌گ وه‌رده‌واميم له‌ په‌ره‌سين خورافه‌ت ئه‌را ماوه‌ى ده‌يان ساڵه‌، ئه‌و خورافه‌ته‌ ك برايه‌تى ئه‌كوشێد و ئوميديگ ئه‌رامان نايلێده‌و له‌ وه‌ده‌سهاوردن موحيبه‌ت له‌ناونيمان، ئمجا ئايا مه‌سه‌له‌گه‌ هه‌وه‌جه‌ وه‌ زوڵميگ تر ئه‌كا تا له‌خه‌و هه‌ڵسيم؟!

 

باوه‌ته‌گه‌م له‌وه‌ر نوێنه‌رايه‌تى مه‌ينه‌تيه‌يل پڕ له‌ سته‌م رووشنهويرى و ئابوورى و سياسى و كۆمه‌ڵايه‌تى نيه‌، به‌ڵكووته‌نيا ئه‌وه‌ ئويشم ك ئاده‌ميزاد فه‌يلى خوه‌ى وه‌و هوير وباوه‌ڕه‌يله‌ په‌يوه‌س كردگه‌ ك نه‌ خوه‌ى و نه‌يش كه‌سه‌يل تر تواناى ته‌كان و ده‌ڵه‌كداينى ديرن وه‌ره‌و نوا.

 

گيرخواردگه‌ وه‌ده‌س زه‌خمه‌يليگ قابل ساڕێژكردنه‌وه‌ نين ك تواناى راوناين دوشمنه‌يلێ نه‌يرێد! وه‌ل ئه‌وه‌يشا له‌يوا وه‌پيمان هات تاونه‌ر دابنه‌يم له‌ كه‌سه‌يل تر جوور براده‌ريگ وه‌يه‌كه‌و چه‌سپياگ له‌ سه‌رده‌م فريه‌يگه‌و.

 

هه‌رچه‌نى هه‌ره‌م ده‌سه‌ڵات سياسى و حزبى و له‌بان بنه‌ماى يادگاريه‌يل گوزه‌يشته‌يان و ته‌ماحه‌يليان له‌وه‌ر قانجاز زيايكردن كورسيه‌يليان كۆتاى يه‌تيم له‌ ئه‌نجومه‌ن نوێنه‌ره‌يل عراقى وه‌پيمان دا، وه‌لێ چه‌بكه‌يم وه‌و فه‌قيرى فكريه‌ ك له‌رێ ئالشتكردن ريڕه‌و كيشه‌ى كوتا وه‌مێژوو هاتگ مافه‌يل فه‌يليه‌ ئه‌خوازێد قه‌ورسانيگ ئه‌را مردگه‌يلمان دروس بكا؟!

 

ئه‌را ماوه‌ى دوير ودريژيگه‌ ئيمه‌ له‌چه‌ن پرسياريگ وه‌خشيايمنه‌!! جوور ئه‌وه‌گ ئيمه‌ وه‌ زووان بيگانه‌يل قسه‌ له‌بان گشت كاره‌يلمان ئه‌كه‌يم! ئمجا نه‌وين زووان داڵگى ئحساس نه‌ته‌وه‌ييمان ئه‌كوشێد، مێژوويش رووشنهويريمان له‌گووڕ نه‌ێد له‌وه‌ر ئه‌وه‌گ شانازيه‌يل گوزه‌يشته‌مان و ره‌وشت به‌رز و بته‌و و سه‌بر باوگ و باپيره‌يلمان له‌هويرمانه‌و بووه‌ێده‌، ئمجا هه‌ناى ك زووان گفتگوو ئه‌دێده‌ بيگانه‌و ژيان رووژانه‌ به‌تاڵ ئه‌دێ له‌ تايبه‌تمه‌نديل ناوچه‌ييمان و هوير و باوه‌ڕ و ره‌وشته‌يلمان له‌ كويچه‌و شوونه‌يل ئه‌ڵڵاجه‌ويه‌و ئه‌دێ و ته‌نانه‌ت به‌هه‌يشتيش زووان داڵگه‌ له‌تى نيه‌، دى ئه‌و وه‌خته‌يله‌ ناسناوه‌گه‌ هه‌رچى بدێ ئه‌رامان هويچ فه‌رقيگ نه‌يرێد.

 

له‌ڕوێ ئى رووشنهويريه‌و له‌ناو ئى ته‌مه‌ڵى و نه‌وين همه‌ته‌، با دى چه‌وه‌ڕێ ئه‌وه‌ نه‌كه‌يم خوه‌ندنگاو نه‌خوه‌شخانه‌و ناوه‌نده‌يل كۆمه‌لايه‌تى وه‌ناو كورده‌يل فه‌يلييه‌و دامه‌زرنن، هه‌ر له‌وه‌ر ئه‌وه‌يش ته‌نيا هه‌ر ريكخرياگه‌يل و ئنتمايه‌يل سياسى و مه‌زه‌وى وه‌ناو فه‌يليه‌يل تۆمار ئه‌كريه‌ن نه‌ك چشته‌يل تر.

 

له‌ى هه‌ڵوژاردنه‌يليشه‌، دوينيم ك ميراته‌يل ويرانكه‌ر بنه‌ماى ئه‌خلاقلا و كۆمه‌ڵايه‌تى و فراوامرجن مه‌سافه‌و تاونه‌ر له‌ناونى باڵه‌يل سياسى كورده‌يل فه‌يلى ئاينده‌ى ئى پيكهاته‌ له‌ هه‌ردوگ سه‌ر مه‌زه‌وى و نه‌ته‌وه‌ييه‌و ئه‌كيشێد وه‌ره‌و چاره‌نويسيگ ناديار، هه‌ر وه‌و خاتريشه‌ با چه‌وه‌ڕى بكه‌يم تا بزانيم ئى بارودوخه‌ چه‌ له‌لى ئه‌رامان ئه‌كه‌فێده‌وه‌و چه‌يش له‌لێ په‌يا ئه‌دێ دوياى هه‌ڵوژاردنه‌يل!

عه‌لى حسێن فه‌يلى