ڕاپــۆرت تایبـه‌ت
مناڵه‌يل ئێزيدى و فرووشتن داڵگ و خوه‌يشگ و شووردن مه‌ژگه‌يليان

مناڵه‌يل ئێزيدى و فرووشتن داڵگ و خوه‌يشگ و شووردن مه‌ژگه‌يليان


شه‌فه‌ق نيوز/ ئه‌يه‌ حاڵ وسام ئدريس، ئه‌و مناڵ عه‌ره‌بى ئێزيدييه‌سه‌ ك نزيكه‌ى دوساڵ له‌ شار رقه‌ى سوورى وه‌ل داڵگى و ئه‌حمه‌د برا بويچگه‌ڵه‌ى وه‌سه‌ربازكرياێ بويه‌ وه‌رجه‌ ئه‌وه‌گ گله‌و بخوه‌ن وه‌ل خيزانه‌گه‌ێ ك هه‌ڵگر هويره‌يل كوشتن و سه‌ربڕين و ته‌كفير بوێ جوور ئه‌وه‌گ باوگى باس ئه‌كا.

 

باوگ ئدريس له‌يران باس له‌ وازێ ناودار مه‌رگ ئه‌كا ك له‌لايه‌ن داعشه‌و دانريا له‌باره‌ى قسه‌كردن له‌بان ڤيديۆيه‌يل تون وتيژى ك بڕيگ مناڵ ئێزيدى له‌وانه‌گ له‌ فيلمه‌گه‌ ده‌رئه‌كه‌فن به‌شدارى له‌تى كردنه‌و كرده‌وه‌يگ كوشتن و سه‌ربڕين راسكانى ئه‌نجام ئه‌يه‌ن و له‌تى په‌ياميگ ئاراسته‌ى جه‌هان ئه‌كريه‌ێد له‌بان توانايى داعش له‌ كاڵين هوير وڕاێ و چوينێتى ئاڵشتكردن مناڵه‌يل ئايند ئه‌را بكوش و هه‌ڵگرتن مناڵێتى له‌ليان و ئاڵشتكردنيان ئه‌را بۆمب ته‌وقيتكرياێ له‌ كۆمه‌ڵگايه‌يليان.

 

ئيسه‌ وسام و ئه‌حمه‌د براى له‌ ئه‌ڵمانيا ژيه‌ن له‌ژير چه‌ودێرى ريكخرياگه‌يل ناوده‌وڵه‌تى ئه‌را داماڵين ئه‌و هوير و ڕايه‌يل تونڕه‌ويانه‌ ك ريكخرياگ تيرۆريستى داعش له‌ مه‌ژگ مناڵه‌يل بويچگ كاڵيه‌سه‌ێ و هه‌ر وه‌و خاتريشه‌ باس له‌و سزايه‌يله‌ ئه‌كه‌ن ك له‌وه‌خت مه‌شق و شوونه‌واره‌يل ده‌ره‌وينى ده‌ركه‌فتنه‌ له‌ جيوه‌جيكردن كرده‌وه‌يل سه‌ربڕين و ته‌نانه‌ت ديده‌ن ئه‌و حاڵه‌ته‌يله‌ ك له‌تيان جيگير بويه‌.

 

قودره‌ت له‌يوا بوێ ئه‌و هه‌ردوگ مناڵه‌و مناڵه‌يل تريش قورتاريان بدێ، يه‌يش له‌وه‌ختيگ سه‌دان مناڵ تر وه‌سه‌ربازكرياێ كوشياان وه‌ده‌س داعش و سه‌دانيش مه‌شق ئه‌دريه‌ن و جه‌نگ ئه‌كه‌ن تائيسه‌يش له‌ رزه‌يل داعش له‌ ناوچه‌يليگ جياجيا له‌ سوريا، ك ئاينده‌يان دياره‌ رووشن نيه‌.

 

"كه‌ناڵ ئه‌لئان" له‌ كويه‌ى شه‌نگاڵ و ئاوايه‌يل ده‌ورگردى له‌ پايين باكوور خوه‌رئاواى عراق، باس له‌و حاڵه‌ته‌يل رخه‌وبه‌ره‌ كرد ك هاته‌سه‌ تويش مناڵه‌يل ئێزيدى و له‌وانه‌گ كريانه‌ سه‌رباز له‌ سه‌ربازگه‌يل داعش و له‌ى دوياخره‌ له‌چنگ ئه‌و ريكخرياگه‌ قورتار كريان دواى گه‌ردين فره‌يگ ئه‌رايان و يه‌كيگ له‌وانه‌يش باوگ ئه‌مير ك چه‌وێ كه‌فته‌سه‌ ده‌يان مناڵ وه‌سه‌رباز كرياێ له‌وانه‌گ ك قورتار بوينه‌و گله‌وخواردنه‌و هه‌ر جاريگ و گووش له‌ باس و حكايه‌ته‌يليان ئه‌گرێد و نيگه‌رانى زياتريگ روێ له‌لى كردگه‌ هه‌ناى گووش له‌ فكره‌يل داعش گرتگه‌ ك چوين له‌ ئه‌قڵ ئه‌و مناڵه‌يله‌ كاڵياگه‌.

 

شاكر هه‌رزه‌كار ده‌مچه‌وێ وه‌ئاو سه‌رد شوورێد و گشت جاريگ يادوه‌ره‌يل سێ ساڵه‌ێ پڕ له‌ كينه‌ت و سزا له‌لاى داعش ئه‌كه‌فێده‌ هويرى، باسه‌گه‌ێ جوور باس سه‌دان له‌ مناڵه‌يل تر ئێزيدى عراقيه‌ ك له‌لايه‌ن داعشه‌و رفيان له‌وه‌خت داگيركردنن شه‌نگاڵ وده‌ورگردى و كريانه‌ بۆمبيگ ته‌وقيتكرياێ ئه‌را گرتنه‌ ئاماانج كه‌س وكار و رووڵه‌يل عراق نيشتمانيان.

 

شاكر و كله‌هات هاوڕيى ئوميد ئه‌وه‌ ديرن له‌نوو ژيان تازه‌يگ بوينن وه‌چه‌و و وه‌رده‌وامى بيه‌نه‌ خوه‌نين، ئه‌ويش دوياى چه‌ن ساڵيگ له‌ ژيان ئاسايى ك دوياى ماوه‌يگ هاتنه‌سه‌و ئه‌راى و خه‌و وه‌ ئاينده‌وه‌ دوينن دوياى سزاو تون وتيژى ك ئه‌نجام درياگه‌ وه‌رانوه‌ر داڵگ و خوه‌يشگه‌يليان ك كله‌هات وه‌چه‌و خوه‌ێ ديه‌ چوين داعش داڵگ و خوه‌يشگه‌گه‌ى له‌ناونى يه‌گترى فرووشتنه‌ وه‌رجه‌ ئه‌وه‌گ مه‌ژگ شوورێ ئه‌راێ بكريه‌ێد ئه‌را كاڵين فكره‌ى تونڕه‌وى و خستنى وه‌ناو سه‌ربازگه‌يل مه‌شقكارێ له‌وه‌ر يايگرتتن شيوازه‌يل كوشتن و سه‌ربڕين و ته‌قاننه‌وه‌ى شاڵ مينرێژكرياێ.

ئه‌مجه‌د و ئه‌سه‌د هه‌ردوگيان مناڵ خوه‌يكوش بوينه‌ له‌و مناڵه‌يله‌ ك مه‌شق درياوێن له‌بان ئه‌نجامداين كرده‌وه‌يل خوه‌يكوشى و هه‌ر له‌وه‌ر ئه‌وه‌يش كاره‌يل خوه‌يكوشى له‌ شار موسڵ ئه‌نجام دانه‌ و ريكخرياگ تيرۆريستى داعش دعايه‌يل تايبه‌تيگ ئه‌راى كرد وه‌شيوه‌ى وه‌رفراوانيگ ك چوين چه‌ك ناته‌قليدى و ته‌وقيتكرياێ وه‌كار ئه‌يه‌رن له‌ جه‌نگ دژ وه‌ عراق.

 

ئايا هوير له‌وه‌ كردێده‌ رووژيگ له‌ رووژان مناڵه‌گه‌د بسينێد؟ يا پويل بيه‌ێده‌ ئه‌وه‌گ رفنێده‌ى و ئه‌يه‌رێده‌وه‌ێ ئه‌راد؟ دو بژارده‌ى سه‌خت له‌وه‌رده‌م ئاده‌ميزاد و سه‌ختريش له‌وه‌گ مناڵه‌گه‌د ناخوازێد باێده‌و ئه‌راد و گله‌وخواردن ره‌ته‌و ئه‌كاو رێ مردن وه‌پى خوه‌شتر ئه‌دێ تا هاتنه‌وه‌ى، ئه‌ويش له‌وه‌ر ئه‌وه‌گ له‌يوا مه‌ژگى شوورياگه‌ ك تن كافرێد.

 

قه‌ده‌ر له‌يوا بوێ چه‌كداره‌يل كورد له‌ نزيك يه‌كيگ له‌ ديواره‌يل جياكه‌ر ناونى خوه‌يان و داعش مناڵيگ ئێزيدى وه‌ناو ئه‌يهه‌م بويينه‌و، ئمجا ئه‌يهه‌م هه‌واڵ فريه‌يگ له‌ بان خيزانه‌گه‌ى نازانێد و نه‌يش زانيارى له‌بان ئه‌و شوونه‌يله‌ ديرێد ك داعش له‌تيان بويه‌ له‌وه‌ختيگ ديل بويه‌ له‌لايه‌ان له‌ساڵ 2014ه‌وه‌، ئه‌و مناڵه‌ هه‌وڵ ئه‌وه‌دا ئه‌و كه‌سه‌يله‌ بناسێد ك له‌ده‌ورگردى بوينه‌ له‌ وه‌ختيگه‌و ره‌سيه‌سه‌ مه‌رزه‌يل عراق.

 

راپۆرته‌يل باس له‌وه‌ ئه‌كه‌ن ك زياتر له‌ شه‌ش هه‌زار ژن و پياگ و مناڵ له‌لايه‌ن داعشه‌و رفيانه‌ له‌وه‌ختيگه‌و شه‌نگاڵ و ئاوايه‌يلێ داگير كرد، له‌و شماره‌يشه‌ نزيكه‌ى دو هه‌زار پياو كوشت له‌ قه‌ورسانه‌يل وه‌جه‌م و نزيكه‌ى 3 هه‌زار ژنيش هه‌تك كرد ك زوورميان چاره‌نويسيان نادياره‌و نزيكه‌ى هه‌زار مناڵيگ له‌ناونى ته‌مه‌نه‌يل هه‌فت تا پانزه‌ ساڵان كرده‌سه‌ سه‌رباز و زوورميانيش له‌ جه‌نگه‌يل كوشيانه‌ يا خوه‌يان ته‌قاننه‌سه‌و وه‌ سه‌ياره‌يل مينرێژكرياێ يا له‌ڕێ شاڵ مينڕيژكرياێ و سه‌دان له‌ليان مه‌ژگيان شووريا ئه‌را وه‌رگرتن فكره‌يل تونڕه‌وێ و كوشتن و بڕێن.

 

وه‌لێ وه‌ل ئه‌وه‌يشا ده‌يان مناڵيش قورتار بوين و تويه‌نستن بهه‌يوان يا خيزانه‌يليان تويه‌نستن له‌ڕى كه‌سه‌يل تر رزگاريان بكه‌ن و له‌ليانيش بوێ هيزه‌يل دژه‌ داعش وه‌ ريكه‌فت دوينسته‌يانه‌و له‌ناو خاكه‌يل سوورێ ك چه‌وه‌ڕێ خيزان و كه‌س وكاريان كرديان، وه‌لێ گشت چشتيگ له‌ هويريانه‌و چيه‌ له‌وه‌ر كاريگه‌رى هوير وڕاى تونڕه‌وێ، وه‌لێ له‌ هه‌مان وه‌خت ئوميد قورتاركردن باقى مناڵه‌يليش ئه‌كريه‌ێد وه‌ل هاوردنه‌وه‌يان ئه‌را باوه‌ش خيزانه‌يليان جوور ئه‌وه‌گ شاكر و كلهات و ئه‌يهه‌م هاتنه‌و.