شهفهق/ له سايه قهيرانهيلێگ مهردم عيراق وهگشتی وهليانا رويهوهروی بوينه، ئمجا كوردهيل فهيلی تويش
قهيرانهيل مهترسيدار كهلتوری و مهنن و نهمنيان كهفتنهسه وهر ههڕهشه.
كوردهيل فهيلی له دهههيل گوزهيشته وهمهمهر ناسنامهی فهرههنگی و سهر وه هويرێگ داشتن هن خوهيان، كهفتنه وهر چهپاڵهی ئازار و زامهتی فرهێگ ك ئمڕوويش ههم دوينيمن لهنوو ئهی چنه وهزێگ دووارهوه ئهدی.
دويای ١٠ ساڵ چێن له ڕميان رژيم بهعس، تا ئيسهيس كوردهيل فهيلی نهتويهنستنه جيگای راسگانی خوهيان لهی عيراق تازه وه خاسی پهيا بكهن يا تهنانهتيش تهمام مافهيل بنهرهتی خوهيان وهپێ بڕهسن و سوود لهلی وهربگرن، ئهوان تهنانهت له بوار سياسيهت پڕئاشوو وهيهكا رشيای عيراق ئيسهيش جێگ ئهرا خوهيان پهيا نهكردنه.
م له زووان و زاروهی كوردهيلی فهيلی، ميتۆدێگ ئهرا باس كردن و تهفسير ئهی قهيرانه پهيا كردم، قهيران زووان و زاراوه له تايبهتمهنديهيل ئاشكراو سادهوه هساو ئهيهن ك تويهنيم بێژيم وه وهسيلهی ئهوهو باوهتهيل گرنگ قهيران فهرههنگی و هوير كوردهيل فهيلی وهپێ تهفسير بكهيم.
دهسهبهنی و فريقهگرايی مهزهوی و سياسی ئهوهيش له ناوچهيل ك فێشتر نيشتهجيهيليان له عهرهو پێكهاتنه، ههڕهشهی فره مهترسيدارێگه ئهرا لهناوچێن زووان و فهرههنگ كوردهيل فهيلی وه ژمار ئهياد.
ئهو كاروبارهگ وهرجله يهيشه له بان بڕيگ له ئهی پێكهاتهی كورده كارگهری كرد و كهسهيهيل و بنهماڵهيل و هووزهيل فرهی له كوردهيل فهيلی وه لههويره بردن زووان و فهرههنگ وناسنامهی نهتهوهيی خوهی تويش كرد.
ههر وهيجووريشه مهسهلهی فهرههنگ سهردهس له ههرێم كوردستان، ژمارهی له كوردهيل فهيلی نگران ئهكاو ئهوان لهيه ترسيهن ك تايبهتمهنديهيل خوهيان له ناونی فهرههنگ سهردهس لهدهس بيهن.
تهمام كوردهيل بێجگه كوردهيل فهيلی تويهنستن له ناوچهيل خوهيان ژيان بكهن و ئهرا زاراوهيل كوردی خوهيان قاموس و وێژه دروس بكهن و مهدرهسهيلێ ئهرا پهروهردهی زووان كوردی وه ئهساس زاراوهيل خوهيان دامهزرنن.
راسی يهسه ك پايبهند بوين كوردهيل فهيلی وه فهرههنگ و زاراوهی خوهيان سڕ هێزوتوانای تايبهت وهخوهيانه ك بێ وێنهيشه، له بوارهيل سياسی و نيشمانی عيراق وهژمار ئهدهی.
كوردهيل فهيلی وه نيشتمان پهروهرهيلێ ك هانه شوون يهكپارچه بوين عيراق ئاڵشت بوينهو وهل تهمام پێكهاتهيل عيراق پهيوهندی خاسێگ سازدانه. وهله وهرچهو گرتن ئهی مهسهله، نادی لهكوردهيل فهيلی چنه چشتێگ داوا بكريهيد تا له تايبهتمهنديهيل و فهرههنگ فهيلی خوهيان دهس بكشين و وڵێ بكهن، چوين ك يه له مافهيل بنهڕهتیيان وههساو ئهياد.
وهسهر ئهوهگ قهيرانهيل ئمڕوو له عيرا ههن يا تهنانهت ههرێم كوردستانيش وهليا رويوهريه، كوردهيل فهيلی وه تهمامه ماف خوهيانه ك له هوير پاراستن زاراوه و مهزهو و فهرههنگ خوهيان بوون.
فواد عهلی ئهكبهر
| < پێشتر | دواتر > |
|---|
