شهفهق/ بار سیاسى لهناوچهى خوهرههڵات ناوین رووژ وهڕووژ كهفێده وهر مهترسى
رویداگهیل سهختتر و لهدهسداین ئاسایش و سهقامگیرى وهتایبهت لهوڵاتهیل كیشهدار و ئهو دهوڵهتهیله ك مللهتهیلیان له دویاى رووژگارهیلیگ پڕ لهچهوسیان و مهینهتى خهریكن كهمه كهمه گهردنه شوون ههڵمژین ههواى ئازادى و دیموكراسى و ههر لهوهر ئهوهیش پهنا بهنه وهر خودنیشانداین و راپهڕینهیل جوراوجوور لهوهر خاتر كووتاییهاوردن وه رژیمهیل سهركوتكهر و ستهمكاریان ك ههق هاووڵاتیهیلیان وهتاڵان بردنه.
ئى وڵات عراقیشه یهكیگه لهو وڵاتهیله ك وهدریژایى چهن دهیهیگ لهژیر دهسڵات رژیمیگ دكتاتۆر و خوینمژ، مللهتهگهى ژیان كوڵهمهرگ بردیانه سهر، ك وهجووریگ ههق و دادگهرى لهتى وجوود نهیاشت و مهردم فهقیر و كهمدرامهت شهو دیانه دهم رووژهو ئهرا ئهوهك بتویهنن ژیان خیزان و مناڵیان دابین بكهن. وهلى وهل هاتن هیزهیل بیگانهو هیزهیل ئۆپۆزسیۆن عراقى له 2003 و ڕمانن رژیم دكتاتۆر و ئازادكردن عراق لهچنگ دڕهندهترین دهسڵاتدارهیلى، تهز خوهشى و سهرفرازییگ نیشته لهش گشت ئازادیخوازیگ لهى وڵاتهو هویر ئهوه كردنه دى كووتایى وهناههقى و ستهم و چهواشهكارى تیهێد، ههر لهوهر ئهوهیش مهردم عراق سهرهتا لهههڵوژاردنهیل یهكهم 2005 وه ئیرادهى خوهیان ڕوى كردنه سهندووقهیل دهنگداین و نوێنهرهیل خوهیان ههڵوژانن، دى لهشوون ئهوهیش چهوهڕى كریا ئاسوودهیى و بهختهوهرى بكهفێده وڵات و گشت كهسیگ ههق خوهى وهربگرێدو ئهوهك ها لهدهیشت وڵات بایدهوهو ئهوهك ماڵ و موڵكى زهفت كریاگه(جویر كوردهیل فهیلى)بدریهێده پیان و قهرهبوو ئهو ههمگه ساڵهیل ئاوارهیى و بهدبهختیه بكریهن و كهس وكار شههیدهیل قهرهبوو بكریهن و گشت زهخمهیل كویهنیگ ساڕیژ بكریهى، وهلى ناكووكى و كیشمهكیش ناونى لایهنهیل و دهس دهرهكى و هاتن ترۆر لهوڵاتهیل تر هاوساو پشتگیریكردنیان وه پویل و ئهنجامداین تاوان كوشتن و بڕین و دویاى ئهوهیش مهسهلهى چینایهتى و رویداگهیل تر لهیوا كرد ئومید عراقیهیل وهرهو كزى بچوودو دى رووژ وهڕووژ بار ئاسایش و سهقامگیرى وهرهو خراوتر ڕویكرد.
لهڕوى خزمهتگوزارییشهو تهنیا ههرێم كوردستان نهود، باقى شارهیل تر عراق هیمان ههر ناڵنن وهدهس نهوین خزمهتگوزارى و كارهباو ئاو و كهمى نهفت و ئاگردوى. ماناى ئیسهیش ئهوهسه مهسهلهى وهههرێمكردن پاریزگایهیل هاتسه وجوود و كهس نیهزانى بار سیاسى ئى وڵاته وهرهو كوورا گام نهێدو ئاقبهتى چوینه؟
ماناى ئهوهسه لهشوون 2003 تائیسه هویچ خهیریگ لهى وڵاته نهكهفتهو بیجگه دهردهسهرى زیاتر و ماڵویرانى و گهناتهكارى و سهختى بار ئابوورى و كوومهڵایهتى و ههر لهوهر ئهوهیش ئومید خاسهوبوین وهزعهگه مهحاڵه جیگیر بوود لهدهروین هاووڵاتیهیل ستهمدیدهى ئى وڵاته.
ج. عهلى میرى
| < پێشتر | دواتر > |
|---|
