شهفهق/ وه گوورهى ماددهى 119 لهدهستوور ههمیشهیى عراق، ههر پاریزگایگ یا زیاتر لهپاریزگایگ ههق
دیرێد ههرێم دامهزرنێد، ئهویش وهگوورهى دهنگداین و لهبان داواكارى زوورم مهردم ناوچهگهو رهزامهنى سێكووتى نوێنهرهیل و ئهندامهیل ئهنجوومهن ئهو پاریزگا ك توان ئهو كاره ئهنجام بیهن، یهیش ههقیگ ڕهواى دهستوورى و ڕیگهوهپیدریاگه.
بیجگه ئهوهیش ئهو ههرێمه تویهنیگ دهستوور ئهرا خوهى دابنهیگ و مهشق دهسڵات خوهى بكا، وهلى وهمهرجیگ لهچوارچیوهى دهستوور ههمیشهیى وڵات بوودو چهواشهى رینمایهیل دهستوورى نهود.
دیاره مهسهلهى تون و تیژى و چینایهتى و رویداگهیل فره لهى وڵاته بویهسه مایهى ئهوهك متمانه وه دهسڵات مهركهزى نهكریهێد، ههر لهوهر ئهوهیش لهناونى ماوهیگ و ماوهیگ تر ئعلان وهههرێمبوین پاریزگایهیل ژنهفیم لهڕوى ئدارى و ئابووریهو.
ئهگهر تهماشاى ماددهى 121دهستووریش بكهیم، دوینیم دهسڵات ههرێمهیل ههق مهشقكردن دهسڵات بریارداین و جیوهجیكردن و دادوهرییش وهپیان دریهێد، ئهیه بیجگه ئهوهك بهش دیاریكریاى خوهیان دیرن لهبودجهى وڵات ئهڕا وهڕیهوبردن ئهو وهرپرسیاریهتى گهورا ك كهفێده بانیان. دى ئهو ههرێمه حكوومهتیگ سهروهخوهیى و شهرعیهته لهڕوى دهسڵات.
دویاى ئعلان وهههرێمكردن پاریزگاى سهڵاحهدین وه زوورم دهنگ ئهندامهیل ئهنجوومهن پاریزگاگه، مهسهلهگه زیاتر گرنگى وهخوهیهو دى، چوینكه جویر ئهوهك لهسهرهتا ئشارهت وهپى كردیم بار سهخت وڵاتهگهو تون تیژى وهردهوام و ناسهقامگیرى ناوچهیل عراق لهڕوى ئاسایشهو بیجگه مهسهلهى چینایهتى گشت ئهیانه فشار گهورایگ دروس كردنه ئهرا بهشبهشهو بوین دهسڵاتهیل ههرێمایهتى، ههر لهوهر ئهوهیش رووژ 12/12/2011لهلایهن ئهنجوومهن پاریزگاى دیاله وهگوورهى دهنگ زوورم ئهندامهیلى ئعلان وهههرێمبوین ئهو پاریزگا كریاو لهو باوهتهو داواكارى رهسمییگ بهرزهو كریا ئهرا حكوومهت مهركهزى. ئیمه گشتمان زانیم ماددهى 140 دهستوور عراقى هیمان رووژ وهرووژ پهلكیش كریهێد وهرهو دویاخستن زیاتر و هیمان لهڕوى یاساییهو جیوهجى نهویه ك ههرچهنى ههوڵ و تهقلاى فرهیگ ئهڕاى دریا، وهلى تائیسه نهچیهسه قاڵب جیوهجیكردن و حكوومهت بهغدا لهئاست ئى مهسهله گووش خوهى كهڕ كردگه.
ئیسهیش ئهوهسه ئاڵشتكارى تازهیگ هاته وجوود، ك ئهویش ئعلان وهههرێمبوین تازهى پاریزگاى دیاله خاڵیگ تر بوى لهداواكاریهیل وهردهوام بهشیگ لهمللهت عراق، ئنجا جویر ئهوهك ئاشكراس بڕیگ لهخاك ئى پاریزگا لهسهردهم حكوومهتهیل وهرین عراق وهتایبهت لهسهردهم رژیم داگیركهر و دكتاتۆر بهعس لهبان خهریتهى ههرێم كوردستان لاوریاگهو خریاسه بان خاك عهرهب و ههر لهبهدرهو جهسان و زرواتیه بگر تاڕهسێده مهنهلى و خانهقى و قزرهبات...هتد وهكنار زنجیره جهوهڵ حهمرین، گشت ئى ناوچهیله بهشیگن لهخاك ههرێم كوردستان ك ناسریانه وهناوچهیل گهرمهسیر. ئنجا لهیرا پرسیاریگ سهرههڵدهیگ ك ئایا چارهنویس ئى ناوچهیل داوڕیایه دویاى وه ههرێمبوین دیاله چوینه؟
ئیمه زانیم مللهت كورد ئهوهنه ماڵویران و بهدبهخت و چهوسیاگ بویه، تائیسهیش ك ههرچهنى باشوور كوردستان ئازادهو مهشق دیموكراسى و ئازادى ئهكا، وهلى وهل ئهوهیشا هیمان جهنگ خاك ئهكاو ڕوى وهر یا مهساحهى فرهیگ لهخاك كوردستان كهفتهسه ژیر داگیركارى و حكوومهت تازهى دیموكراسى عراقیش ئاماده نیه دگان وهههقا بنهیگ و جوگرافیاى ههرێم كوردستان دهسنیشان بكاو مهردم ئاوارهى ئهو ناوچهیل داوڕیاگه وهزێدوماواى خوهیان شادهو بكا. ئنجا ئایا لهى حاڵهته بهش كورد لهى وهههرێمكردن پاریزگاى دیاله چ زهمانهتیگ دیرێد ك سهد لهسهد جى متمانه بوودو ههق كورد نهفهوتیهى؟ ئایا حكوومهت كوردستان وه جددى هویر لهى مهسهله كردگه ك وهجووریگ دویاخر كیشهو گرفت لهلى نهكهفێدهوهو جهنگ نهوده دو جهنگ ؟ چوینكه تهنیا قهوڵ وهبى ئمزانامهى ڕهسمى هویچ دڵخوهشییگ نهیرێدو نیهوده زهمانهت ئهرا ئایندهى چارهنویس ئهو ناوچهیل كوردنشینه لهمهرز دیاله، ههر لهوهر ئهوهیش ئویشیم: چ گهرهنتییگ ئهرا خاك كورد ههس لهپرووژهى وهههرێمكردن دیاله؟ بیگومان بایهسه ههر لهئیسهو فشار جددى بخریهێده بان لایهن پهیوهندیدار ئهرا ئهوهك ههق چارهنویس ناوچهیل داوڕیاگمان وهتاڵان نهچوود.
جهماڵ ئهركهوازى
| < پێشتر | دواتر > |
|---|
