شهفهق/ نویسهر و رووشنهویر ناودار عهرهب عراقى و سهرۆك فراكسیۆن عراقیهى چهرمگ له پهرلهمان
عراق ك له لیست ئهلعراقیهى ئهیاد عهلاوى جیاوه بوى، جاریگ تر باس له دهوڵهت كوردى كرد و جهخت لهبان ئهوه كرد ك ههرێم كوردستان گشت فاكتۆرهیل وه دهوڵهتبوین دیرێد و تهنیا ئهوهى مهندگه ك لهلایهن رێكخریاگ نهتهوهیل یهكگرتگ دگان وهپییا بنریهێد، چوینكه كورد ههق ئهوه دیرێ دهوڵهت كوردى داشتوود و جویر ههر مللهتیگ تر خوهى بووهیده ڕییهو.
حهسهن عهلهوى زویتر لهشار ههولێر و دویاى ئهوهیش لهشار سلێمانى وهئاشكرا باس له دهوڵهت كوردى كردگه وه ئهوهك ههرێم كوردستان ئیسه خاوهن گشت سفهتیگ وه دهوڵهتبوینهو لهى ڕوییهو هویچ گرفتیگ نهیرێد و ئامادهس وه تهواوى ئهرا ئاشكراكردن دهوڵهت، یهیش ههل گونجیاگیگه ئهرا ئهوهك كورد لهههرێم كوردستان ئیجاره وهخت لهدهس نهیهێد و دهوڵهت خوهى ئاشكرا بكا، چوینكه كورد زویتر ههلهیل تاریخى فرهیگ لهدهسداگه. ناوبریاگ ك خاوهن فراكسیۆنیگ ده پهرلهمانتاریه لهپهرلهمان عراق و كهسایهتى و نویسهریگ ناودار عراقیه، ئشارهت وه ئهوه كردگه، ك ئیسه ههرێم كوردستان خاوهن سهرۆكهو خاوهن سهرۆك حكوومهت و سهرۆك پهرلهمانهو گشت ههوهجهیله، ك خواسته ئهرا ئاشكراكردن دهوڵهت، ماناى ئهوهسه وهخت ئهوه هاتگه ئى ههرێمه خاوهن دهوڵهت خوهى بوودو كهمتهرخهمى له ئاشكراكردنى نهكا.
ئهو نویسهر عهرهبه ئویشێد: تهنیا چشتیگ ك مهندوید ئهرا ئاشكراكردن دهوڵهت كوردى له ئیسه، تهنیا دگان وهپیاناین رێكخریاگ نهتهوهیل یهكگرتگه وهو دهوڵهت كوردیه ك ئاشكرا كریهێد، چوینكه گشت ههوهجهیل سهرهكى پهیابوین دهوڵهت لهى ههرێمه وجوود دیرێ بیجگه له دهوڵهت. قسهیل ئى كهسایهتى عهرهب عراقیه لهوهختیگه ك ئیسه لهناونى ماوهیگ و ماوهیگ تر سهركردهیل سیاسى كورد باس له دهوڵهت كوردى و ئاشكراكردنى كهن و لهههمان وهخت وهههق رهواى مللهت زاننهى جویر ههر مللهتیگ تر لهبان ئى گووشهى زهویه، یهیش وه تایبهت لهوهختیگه ك پهیوهندى ناونى بهغداو حكوومهت ههرێم رادهى گونجیاگیگ نهیرێد وهبوونهى ئهو كیشهو گرفتهیله ك وهبى چارهسهر مهندنه.
بیجگه ئهوهیش ئى نویسهر و كهسایهتیه لهكۆنگرهیگ لهههولێر و لهوتاریگ ك ناوهندهیل سیاسى و پهرلهمانى و میدیایى و مهردمیهیل عهرهب و توركمانى عراق لهلى رهسانهو، داوا لهكورد كرد دهوڵهت خوهى ئاشكرا بكاو دى چهوهڕیكردن بهس بوود، چوینكه ئیسه وهخت لهبهرژهوهندى دهوڵهت كوردیهو كورد لهتاریخ ههلهیل فرهیگ لهدهسداگه، وهلى ئیجاره نیهود ههل لهدهس خوهى بیهێد لهى باوهتهو.
لهشوونیگ تر نویسهر و كهسایهتى ناودار عهرهب عراقى قسهى جوانیگ كردگهو لهتى وتگه: كورد بایهسه ئهوه بزانێد و ئاگادار بوود وهرانوهر ئهوهك ناوچهگه خهریك كیشهى ناوخوهیین و بایهسه ئهو ههله وه دهرفهت خاسیگ بزانن ئهرا ئاشكراكردن دهوڵهت كوردى، چوینكه ههر یهك لهئیران و توركیاو سوریا خهریك كیشهى ناوخوهیین و بهغدایش ها لهوهزع لاریگ ، ك یهیش هاوكاریكهر خاسیگه ئهرا ئهوهك كوردیش لهى وهخته ئاشكراى دهوڵهت سهروهخوهى بكا.
تویهنیم بویشیم ئیجاره مهیل كورد لهگشت جاریگ زیاتره ئهرا ئى مهبهسه، وهلى بایهسه بزانێد چوین رهفتار بكاو ئى ههل تاریخییشه جویر ههلهیل تر لهدهس خوهى نهیهێد و نهف لهبار ناتهواو ناوچهیى بكا.
| < پێشتر | دواتر > |
|---|
