شهفهق/ فرهچشت ههس لهژیان كوردهواریمان وهختهیل خوهشیگ وهلیا بردیمنهسهر و ههمیشه ئازدهر و
گورجكهر تاقهت و توانایى ئادهمیزاد كورد بوینهو لهههمان وهخت خهملادهر و كهیفبهخش بویه ئهرا چینهیل جیاجیا تاوهخت سهرههڵداین تهكنۆلۆژیا(تهلهفزیۆن و سهتهلایت)، ههڵبهته لهشوون هاتن ئى هووكارهیله كهمه كهمه چشتهیل كویهن ڕوى له كزى و نهمهندن كردن.
مهتهڵ یا چهوچه ئهوسا لهژیان كوردهوارى ههم سهتهلایت و ههم تهلهفزیۆن و رادیۆ بوى له ناو مهردم كومهڵگا، چوینكه شهوانه وهك ئیسه پهیوهندى و هامشووكردن لهناونى قهوم و كهس وكار و خهڵك ئاوایى تا ئى راده كز و بى ئههمیهت نهوى و مهردم ئاوایهیل وه حوكم ئهوهك لهنزیك یهكترى ژیان و بیس چوار سهعات ئاگادار خوهشى و ناخوهشیهیل یهكترى بوین و هووكارهیل تهكنۆلۆژى مهگهر ئاواییگ ماڵیگ یا دووان رادیۆیگ بیاشتان!! وهنا ئهوباقى مهردمهگه شهوانه لهدهور یهكترى جهمهو بویان وهتایبهت شهوهیل زمسان و دهس كردیانه مهتهڵ وتن.
مهتهڵ یهكیگه له هونهرهیل فۆلكلۆر كوردى ك قهدرو قیمهت خوهى داشت لهژیان كورد، چوینكه نهك ههر ئیمهى كورد تاریف هونهر خوهمان كهیم، بهڵكوو قهڵهم بیگانهیلیش وهتایبهت ئهوانهك گهشت وهرهو كوردستان كردنه لهڕوى ئهدهب فۆلكلۆرهو پلهو پایهى بهرزیگ دانهسه كورد، چوینكه فۆلكلۆر ئیمه نهك تهنیا لهناو خود خوهمان، بهڵكوو لهناو مللهتهیل خوهرههڵاتیش وهك تورك و عهرهب و فارس، ئهرمهنى و ئازهرى و ئاسوورى و....هتد پهرش وبڵاوه. وهلى وهداخهو نهتهوهیل پیشكهفتگ جههان لهزانكۆ و شوونهیل تایبهت لهیهكهوداین و شیهوكردن كهن لهبان فۆلكلۆر خوهیان و مللهتهیل دهوروهریان، ك ئیمهیش ئهوهسه تائیسهیش گرنگى یا ئههمیهت خاسیگ وهى لایهنه نهدریاگهو لایهنهیل پهیوهندیدار گام خهسیگ ئهڵنهگرتنه ئهرا جهمهوكردن و ساقهوكردن فۆلكلۆر رهسهنایهتى مللهتهگهمان. مهتهڵ بیجگه ئهوهك هونهریگ فۆلكلۆریه، وهلى وهل ئهوهیشا رادهى ئازایهتى و هویرتیژى ئادهمیزاد دهرخهیگ و بیجگه ئهوهیش جووریگ لهشهرم لهناونى ههرزهكار و مهردم نیهیلیگ . ئنجا ئهرا نموونه: ئیمه وهختى مناڵ بویمن و شهوانه نیشتیایمه لاى ئهوانهك مهتهڵ وتیان، ههر وهختیگ یهكیگ لهو مهردمه مهتهڵیگ بوتاد هس وهئارامى و بهختهوهرى فرهیگیش وهلیا كردیاد و خوهى وه زیرهك و دانایش زانست.
دى وهو جووره تا یهكیگ مهتهڵیگ بخستیاگهڕوى و چهوهڕى بكردیاگ تا لهیهكیهو بیهن و ئهڵیبارن، دوینستید یهكیگ تر لهولاوه مهتهڵیگ تر ئاماده كردیاگ، وهتایبهت لهمانگ موبارهك رهمهزان زیاتر مهردم شهوانه نیشتیان ئهرا مهتهڵ و زهڕهمشتهكى، وهى شیوه مهتهڵ شوون خوهى لهدڵ گشت ئادهمیزاد كورد كردهو.
جهماڵ ئهركهوازى
| < پێشتر | دواتر > |
|---|
