شهفهق/ ڕا و ئهراى چوین عیراقیهیل له باوهت 9 نیسان ههر ساڵیك فره جیاوازهو بوود لهباوهت گرنگى ئى
ڕووژ و ئاست كاریگهرى یا تهئسیرى له بان چارهنویس وڵات ههر له ساڵ 2003 هوه تا ڕووژ ئمڕوومان، بڕیگیان هانهبان ئهو باوهڕه ك ڕمیان ڕژیم وهبى هاتن هێزهیل هاوپهیمان وهسهركردایهتى ولایهتهیل یهكگرتى ئهمریكا ڕیگه نهیاشت، وبڕیگتر ئهوه دوینن ك بایهت بوى خود عیراقیهیل ڕژیم وهرین بڕمانیاتان، و بڕیگتریش ئویشن ك دیموكراسى له عیراق چشت نوویگ ئهراى نههاورد.
نوێنهریگ ئئتلاف فراكسیۆنهیل كوردستانى لهبان ئهوه جهختكرد ك:"مللهت عیراق ئومیدهوار ئهوه بوى ك ڕژیم دیكتاتۆرى وهبى هاتن هێزهیل بیگانه بڕمیاتاد".
موئهیهد تهیب له قسهیلى ئهرا شهفهق وت:" ڕووژ 9 نیسان وهك ڕووژیگ تاریخى مینیدهى له دڵ و دهروین گشت عیراقیهیل و ئاكامهیلیشى گهوران لهبان ئایندهى عیراق".
تهیب ئهوهیشه ڕووشنهوكرد ك:"مللهت عیراق له ساڵ 1991 له كوو 18 پارێزگا له 14 پارێزگا ڕاپهڕینیگ بهرپاكرد، وهلى سهركوتكردن وهحشیانهى ڕژیم وهرین لهسایهى بیدهنگى ناودهوڵهتى ئهو ڕاپهڕینه لهباربرد".
لهئاماژهیگى ئهرا هووكارهیل ڕمیان ڕژیم وهرین وهدهس هێزهیل ئهمریكى، تهیب ئهوهیشه ڕووشنهوكرد ك:"كردهوهیل دوشمنكارانهى ڕژیم وهرین بویه مهترسى گهورایگ لهبان ئاشتى و تهبایى ناوچهگه و یهیشه هیشت ئهمریكا وهشیوهیگ سهربازیانه بڕمنیدهى". و زیاتریش و ك:" یهكیگ له بهرههمهیل ڕمیان ڕژیم، پهیابوین عیراقیگ دیموكراتى و فرهیى بوى، ك كاریگهریهیل ئهرێنى یا ئیجابى داشت له ئهو گۆڕانكارى گهورا خوهى نیشاندا ك لهى وهخته ناوچهى ڕووژههڵات ناوڕاس وهخوهیهو دوینیدهى".
لهلاى خوهیهو شیهوكهر سیاسى عهباس یاسرى له پهیوهندییگى وهل شهفهق ئهوه دوینید ك:"ئهو ئاكامهیل ئهرێنیه ك عیراق وهخوهیهو دیهى له شوون 9 نیسان 2003 ك له ئۆپهراسیۆن سیاسى دیموكراتى و فراوانهو بوین رویوهر ئازادیهیل دیمنهیان، وه شاكاریگ گهورا شمارهكریهید ههرچهنى ك ئۆپهراسیۆنهیل تیرۆریستى فرهیگ هاووهخت بوین وهل گۆڕانكارى دیموكراتى". و زیاتریش وت ك:"ئهو خودنیشانداینهیله ك وهى دویاخره عیراق وهخوهیهو دوینیدهیان بهڵگهى ڕهسین ئهزموون عیراقیه و ئهوه نیشان دهید ك ئى وڵاته وهرهو ڕیگهى ڕاس و دروس ههنگام ئهڵگرى".
یاسرى ئهوهیشه ڕووشنهوكرد ك:"دامهزرانن كوومهڵهى نیشتمانى له سهرهتاى ئۆپهراسیۆن سیاسى و لهشوونیشى دو ههڵوژاردن و ههرلهیوا فراوانهوبوین ڕویوهر ڕا و ئازادى ك له داشتن شمارهى گهورایگ كهناڵهیل ئاسمانى و ڕهسانن خوهى نیشاندا، ئاماژهیگ زینیین ئهرا ڕهسین ئهزموون دیموكراسى له عیراق".
لهباوهت پیشكهفتن هوشیارى سیاسى هاوڵاتى عیراقى له شوون 9 نیسان 2003 یاسرى وت:"هاوڵاتى عیراقى لهوه ڕهسیهسهو ك ههقهیل دهستوورى خوهى چهنى گرنگن و نهخش و دهور چاودیریكردن خوهى دوینید له چوارچیوهى ئهزموونیگ دیموكراتى پیشكهفتى وهگوورهى ئهو ماوهى زهمهنیه ك عیراق له شوون گۆڕانكاریهگه وهسهرى بردیه".
عهباس یاسرى ئومیدهوار ئهوه بوى سیاسهتمهدارهیل عیراق له غهڵهتهیل گوزهیشته خوهیان بیهنهلا، تا بتویهنن ههوهجهیل خزمهتگوزارى و كوومهڵایهتى هاوڵاتیهیل دابین بكهن.
شایان باسه ك ڕووژ 9 نیسان ساڵ 2003 ئهو ڕووژهسه ك حوكم سهدام حوسهین سهرۆك وهرین عیراق و ڕژیمهگهى كووتایى وهپیهات، له شوون ئهوهگ هێزهیل ئهمریكا و هاوپهیمانهیلى تویهنستن بانه ناو خاك عیراق.
كفاح هادى
| < پێشتر | دواتر > |
|---|
