شهفهق/ كیشهى كوردهیل فهیلى خاڵهیل گهوراو فرهیگ گریگه خوهى، وهلى گرنگى یا ئههمیهت خواستیگ وهو
خاڵهیله نیهدریهیگ. بیبهختانهیش تویهنیم بویشیم هاوسایهیل سیاسیمان دهرههقمان خراو بوین، وهلى هاوسهیلیمان وهگشتى له مهردمان تر دڵسووز بوین وهلمانا، ئهو زوڵمیشه ك هاته بان كوردهیل فهیلى هووكارهگهى ئهو بڕیارهیل وهردهوامه بوى ك لهدیوان كوشك یا قهسرهیل دهرچى نهك له چهرداخ فهقیرهیل تا لهیوا هویرهو بكهیم ك نههیشتن ئهو زوڵمه جوور وهربهسیگه لهبان ڕیهیل و لاوردنیان ئاسانه. ئى زوڵمهیله پفیلكه یا بڵقیگ نیه لهبان ئاو تا بتهقنیمنهى، چوینكه رژیم ڕمیاگ تهنانهت له داراییش گیرفانمان چووڵ كرد تا كهسیگ لهلیمان بتویهنیگ له وڵاتیگ تریش وهپى بژیهیگ و ماوایگ ئهرا خوهى وهپى دابین بكا، ئهوهیشهك لهلیمان مهندهو هیشتهیان وهفهقیرى و نهدارى بژیهن و لهههمان وهخت بیبهشیان بكا له خهیروبهیر وڵات جویر ئهوهك ئویشن(دارایى له غوربهت وڵاتهو فهقیرییش لهوڵات غهریبیه)، ههر لهوهر ئهوهیش وهگشت ئاسانییگهو ئویشیم: شیواز قسهكردنمان وهل كیشهگهمانا چهواشهى باوهڕمانه.
ئهوهك هیشتهمان ئى قسهیله بكهیم، ئهویش ئهوهسه ك دوینیم و قسهیل فرهیگیش ژنهفیم لهباوهت مهزڵوومیهت كوردهیل فهیلى لهلایهن بڕه كهسهیلیگهو ك گوایا مهسهلهگه گرتنهسه مل، ئنجا كوردهیل فهیلى هویچ رهسانن یا ئعلامیگ نهیرن و یهیش مایهى ناڕهحهتیهو گشت راسییگ شاردیهسهو، چوینكه ههوڵ و تهقلاى دهزگاى شهفهق ئى قسهیله خهیگه دروو، ك ههرچهنى ئهوانهك جیاوازى دیرن وهلمانا له پیشنیارهیل سیاسى و شیواز سهخاوهت لهلایان زاڵه لهبان بهخیلى، ئهوه دگان وهو ههوڵهیل وهردهوام رووژانهمانه نان وهناو فهیلى و لهوهر خاتر خستهنهڕوى كیشهگهى له دڵ پایتهخت فهیلیهیل. چوینكه نهبایهد ئهوانهك باس لهى مهسهله كهن ئنكار وجوود یهكهمین ئیزگهى فهیلیهیل بكهن ك ئهویش رادیۆى (شهفهق)هو متمانه ئهڕایان هاوردهو و هانیاندا لهوهك بژنهفن و یا وه زووان داڵگى خوهیان قسه بكهن. ههر لهوهر ئهوهیش راس نیه ك خوهنهوار و ئهوانهك گهردنه ناو تووڕ ئهنتهرنێتا لهوهر مهسهلهیگ ك پهیوهسه وه زووان و تاریخمان و نهزانن یهكهمین گووڤار ك وهو شیوهزووانه نویسیهیگ گووڤار(گوڵ سوو)هو لقیگه له لقهیل دار شهفهق بهردار، ئنجا دوینید له یهكهمین ئهنجامهیل گهردین لهناو ئهنتهرنێت ماڵپهر شهفهق كهفیگه وهرچهود.
پابهندى ئیمه وه تازهكردن یا تهحدیس رووژانهى وهردهوام سهعات وه سهعات ئهرا ماڵپهڕهیل ئهلكترۆنى شهفهق و وهچوار زووان(كوردى و عهرهبى و ئنگلیزى و فارسى) نیشانهى ههوڵ و تهقلاى خود خوهمانه.
كییه نیهزانیگ یهكهمین پایتهختیگ ك دڵهیل پڕ لهسووز لهتى یهكهو گرن، ئهویش كۆنگرهو دانیشتنهیل (شهفهق)ه؟ئیمه فرهیگ له مهردم هاتنه وهرهو پیمان لهوانهك گهوراو قسهزانن، وهلى نووڕید سهرمایهى ههوڵ وتهقلایان هویچهو ئویشیمنه پیان ئیوه بایهسه له مهلهیل ئاسمانهو هووكاره بوین ك چوین خوسهیان له بهخیلى تیهیگ ، چوینكه ئیوه لههویردان چوود ئهو بهرهیله ك هاوردیمنه دهس لهشوون ئهو ههمگه قوربانیه، ئهوه موڵك گشته، ئنجا حاشاكردن لهوهك شهفهق پیشكهشى كرد لهو داهینان یا ئبداعهیله یا فهرامووشكردنى، بیگومان جویر ئهوهسه وهردهم رووشنایى خوهر وه ویژنگ بگرن، چوینكه وڵات ئهرا ئیمه ئهو كارهیلمانهسه ك له شهفهق ئهنجامى دهیم و باوهڕمان لهیواسه ئهوهك خهیره ئهرا كیشهگهمان ئهنجامى بهیم.
ن: عهلى حسێن فهیلى
| < پێشتر | دواتر > |
|---|
