شهفهق/ وه سهر ئهوهو ك فێشتر سهركردهيل و لايهنهيل سياسی وڵات ئهرا وهپا كردن كۆنگرهی نيشتمانی
له سهرچارهسهركردن ناكووكهيهيل له ناوهين دهوڵهت قانون و عيراقييه( وه تايبهت تاوانبار بوين تارق هاشمی جيگر سهرۆك كۆمار و پهنابردنێ وه ههرێم كوردستان رهسيهيسه ئهوج خوهی) جهخت كهن، وهلی بڕێگ له روخسارهيل سياسی له ئامادهبوين له ئهی كۆنگره وه مهمهرهيل شهخسی نيهتوان بهشداری له تی بكهن.
شهوركهر(راوێژكار) سهرۆك وهزيران عيراق له كاروبار ههرێم كوردستان سێ شهمهێگ چێ له وهپا بوين نيشتنێگ سێ لايانه له ناوهين پارتهيلێگ كابينه حكوومهت پێكهاوردنه ئهرا شييهوكردن كيشهيليان، له نيشتنێ نيشتمانی خهوهر دا ك له گرنگترينيان مهسهلهی نههاتن مالكی وه نوا ئهی نيشتن نيشتمانييهسه ك ئهگهر ئهی كۆنگره له دهيشت بهغدا وهپا بكريهيد.
وه ئهساس سهرچاوهێگ خهوهری شهفهق نيۆز، جهلال تاڵبانی سهرۆك كۆمار رووژ دوشهمهی ههفتهی گوزهيشته هاتهو ئهرا بهغداو هه له تهقلای يهگ نيشتنێگ له ناوهين سی لايهن سهرهكی وڵات وهپا بكا.
شهوركهر سهرۆك وهزيران عيراق(ئادل بهرواری) وه شهفهق نيۆز لهيبارهيهو وهتيه: وهی مهبسه كۆميتهی ئامادهكاری ئهرا لهيكهودان ناكووكيهيل و نزيكتر كردن ڕا و ئهراچينهيل سێ ليست دهوڵهت قانون و هاوپهيمانی كوردستانی و ليست عيراقييه دامزرياس. ئهی كۆميته ئاخرين تهقلای خوهی لهی موودوهو ئهكا، وهلی دهست نيشان كردن جی ئهی نيشتنه له لای سهرۆك كۆمارهو دياری ئهدهی.
ئهوی ئويشێد: فێشتريان دهنگ وه يهدانه ك ئهی نيشتنه له بهغدا وهپا بوود، وهلی ئهياد عهلاوی ئهخۆازێ ئهی نيشتنه له سلێمانی وهپا بكريهيد.
بهرواری ئهخادهو هوير: ئهگهر ئهی نيشتنه له دهيشت بهغدا بوود، شايهد سهرۆك وهزيران(نوری مالكی) لهتی بهشدار نهكهيد.
سهرۆك كۆمار و سهرۆك پهرلهمان(ئۆسامه نۆجهيفی) هانه تهقلای يهگ ئهی نيشتنه له ناوهين تهمام پارتهيل و لايهنهيل سياسی له دويای ئهی كشمهكشهيله دويای تاوانبارن كردن تارق هاشمی يگر سهرۆك كۆمار هاتيهسه دی وه پا بكريهيد ك وه مهمهره دهست داشتن له كارهيل ترۆريستی و تواسن جيگر مالكی(سالهح موتڵهگ) ئهرا لاوردن مالكی و وه ديكتاتور خوهنين مالكی، له رووژهيل ئاينده وهپا بكريهيد تا نوا له گهنترهكهو بوين وهز سياسی وڵات بگرن.
لهی ناوهينيشه، ليست عراقييه ئهرا ئاماده بوين له ئهی نيشتن گێشتييه، مهرج ئهرا ليست دهوڵهت قانون نهێد ك لهوانه پابهندبوين وهدهستور و كارا كردن ئهو رێكهفتنهيلهگ ها له ناوهين ههردولايان.
خانم نۆينهر پارلهمان(ناهيده داينی) سهروه ليست عيراقييه وه شهفهق نيۆز لهی بووتهو وهتيه: ئيمه وهل ئهی نيشتنه هاوڕايمن، چوين ك وه پێشناره ئيمه بويهو ئهی نيشتنيشه ئاخرين ئيزگای چارهسهركردن ناكووكهيهيل له ناوهين لايهنهيل سياسی زانيمه.
ئهی پارهلهمانتاره ئويشێد: ئهگهر مهرجهيل ئاماده بوين ئهرا ئهی نيشتنه قهبوڵ نهكريهێد، نهتهينا له ئهی نيشتنه بهشداری نيهكهيم له كۆميته شييهوكردن و لهيهكادان ناكووكهيليش خوهمان كيشيمهو.
له وهردهوامی قسيهيلێ ئوشێد: ئيمه له پهرلهمان دايمهو لا وهی مهمهرهگ ئيمه بايهد له قهرارهيل گرنگ ئهراچين و قسيهی خوهمان له سهريان بايهد بكردايم. هويچ كام له خۆازينهيل ئيمه وهرهو پراكتيك نيهچن، ئهگهر ئهی نيشتنه بهرسيده بن بهس، ئمجا ئيمه رێگ ترهك گيرمه وهر.
ليست عيراقييه دورووژ ورجله وهگ پرۆتستۆ نيشتنهيل پهرلهمان بكا، هه له ئهو رووژهگ باديگاردهيل(تارق هاشمی)دگان وه يهيا نان ك وه ئهمر ئهوی دهس كردنسه كارهيل ترۆريستی له تلفزيون بڵاوهوه بوی، له هاوبهش بوين و كاركردن وهل دهوڵهتيگا ك نوری مالكی سهرۆك وهزيرانێ بوود خوهيان كيشانهو.
وهلی هاوپهيمانی كوردستانی رووژ چوارشهمه ئاشكرا كرد: سهرۆك ههريم كوردستان(مهسعود بارزانی) وه مهمهرهيل سياسی و ئهمنی، نيهتيهده ناو ئهی نيشتنه و شهوركهر سهرۆك وهزيران عيراق(نوری شاوهيس) له سهرناو سهروك ههريم و وه نۆينهرايهتی شهخس كاك مهسعود بارزانی لهی نيشتنه بهشداری ئهكا.
يهيشه له هاڵيگه ك فهواد حوسهين وهرپرس ديوان سهرۆكايهتی حكوومهت ههرێم كوردستان رووژ سێ شهمه ئهرا ميديايل وهت: بهشداری نهكردن مهسعود بارزانی له ئهی نيشتنه وه ئهگهر ئهوهسه له بهغدا ئهی كۆنگره بوهسيهيد.
خانم پارلهمانتار كورد ئهشواق جاف سهر وه هاوپهيمان كوردستانی له پهرلهمان عيراق وه شهفهق نيۆز وهت: هاوكارهيل فرهێگ ئهرا بهشداری نهكردن مهسعودبارزانی له ئهی كۆنگره وهمهمر بهسين له بهغدا ههس ك گرنگترينيان بڵوزهكيشان ناكووكهيل لاينهيل سياسی و وهز نهگونجيای ئهمنی بهغدايه.
ئهی پارلهمانتار كورده ئويشێد: ههولێر ميواندار ئهی نيشتنهيله بوی ك كابينهی ئيسه وه ئهساس ئهو رێكهفتنهيلهگ له وهر وه دی له پهی دامهزريا، وه له وهرچهو گرتن ئهی ميواندارييه، بهسين ئهی كۆنگرهو نيشتنهيهل له ههولێر هويچ زيانێگ نهرێد(ههرچهن دهست نيشان نهكردن جی ئهی كۆنگره سياسييه تا ئيسه بويهسه مهمهر رفلكسهيل نگاتيوێگ).
ئهی پارلهمانتاره ئويشێد: ئهگهر ئهی نيشتنه له بهغدا بكريهيد، رووژ نوری شاوهيس وه نۆينهراتی مهسعود بارزانی له ئهی كۆنگره بهشداری ئهكا.
ناكووكهيهل ناوهين دهوڵت قانون و عيراقه ئهو وهخت رهسيه پلهی ئاخر خوهی ك باديگاردهيل تارق هاشمی وه ئهنجامدان چهن كارێگ ترۆريستی ك وه ئهمهر تارق هاشمی بويه دگان ناننهو هاوردنهی زووان، له پهی ئهی دگان نانيشه وه ئهساس ماده چوار ريشهكيش كردن ترۆر،هاشمی تاوانباره و بايهد بچووده دادگا و بی تاوانی خوهی لهوره ساقهو بكادو دهرێ بخاد.
| < پێشتر | دواتر > |
|---|
