شهفهق/ دهمهو شهوهكى یهكشهممه وهل دهرچگن دویا سهرباز ئهمریكى لهخاك عراق وهگوورهى ئهو ریككهفتنه
ك لهساڵ 2008 ئمزا كریا، هویرو ڕاى رووشنهویرى و ئاسایشى دهركهفت لهباوهت چوینیهتى بار ئایندهى وڵات. مهردمانیگ مهترسى لهو جیاوازیهیله دیرن ك كهفتهسه ناونى فراكسیۆنهیل سیاسى و لهیوا هویرهو كهن ك شایهت بووده پرووژهى كووتاییهاتن دهوڵهت عراقى و مهردمانیگیش وتنه: بار ئاسایش وه دهرچگن ئهمریكا ئاساییه ئهگهر ئهو جیاوازیهیله نهشیونیگهى.
حسێن عادلى نویسهر و شیهوكهر سیاى لهگفتوگوویگ ئهرا شهفهق نیوز وتگه: قوناغ ئاینده سهرهتاى كووتاییه ئهرا پرووژهى دهوڵهت ك بهرههمیگ ئهمریكى عراقیه لهوهر قویلایى ئهو جیاوازیهیل سیاسیه لهناونى فراكسیۆنهیل و بیجگه قهیرى مهسهلهى بنهڕهتى ك هیمان چارهسهر نهكریانه.
عادلى زیاتر وتگه: وجوود ئهمریكى هووكار زهمانهت و فشارخستن بوى لهبان بهعزیگ لههیزهیل، ئنجا دهرچگنى كاریگهرى نهێده بان پرووسهى سیاسى، چوینكه وڵاتهیل یهكگرتگ مقهیهتى لهو پرووسه كردیادو ئیسه بووده بهشیگ له ستراتیجیهت كیشمهكیش هیزهیل سیاسى لهعراق.
لهباوهت بار ئابوورى له وڵاتیش، عادلى وتگه: مهسهلهى ئابوورى پهیوهسه وه بار سیاسى وڵاتهگهو لهشوون 2003 خاسییگ وهخوهیهو دیهو ئهگهریش جارجاریگ ڕوى لهكزى كردوید ئهوه بیگومان لهوهر كیشمهكیش وهردهوام سیاسى بویه.
وهل ئهوهیشا دوینیم بهغداى پایتهخت و باقى شارهیل تر و پاریزگایهیل وڵات گیر هاتنه وهدهس كهمى گوزران و خزمهتگوزارى، ك وهجووریگ دهزگایهیل دهوڵهت كهفتنهسه وهر گهناتهكارى دارایى و ئدارى لهگشت ڕوییگهو.
لهلایهن خوهیهو نویسهر و رووژنامهنویس ئهحمهد ئهلئهبیهز له گفتوگوویگ ئهرا شهفهق نیوز وتگه: بایهسه رووشنایى بخهیمنه بان باوهت ئامادهگى سیاسى ك گرنگتره لهئامادهگى ئاسایشى، وهل ئهوهیشا ئیرادهى ناتهواویگ ههس لهناو پرووسهى سیاسى و تائیسهیش باوهڕ وه گفتوگووكردن و لهوهرچهوگرتن ریڕهو دیموكراسى نهیرن لهچارهسهر جیاوازى و كیشهیل ناونیان وهل لایهنهیل تر.
ئهبیهز لهى باوهتهو زیاتر وتگه: ههڵویست لیست عراقیه لهباوهت بهشدارى نهكردن نوێنهرهیلى لهدانیشتنهیل پهرلهمان و لهوهرانوهر ئهوهیش ههڵویست هاوپهیمانى نیشتمانى لهمهسهلهى رویداگهیل جویر داواكارى دامهزرانن ههرێمهیل لهلایهن پاریزگایهیلهو قوناغیگ مهترسیداره ك وڵات لهتى ژیهێدو ههر لهوهر ئهوهیش نهبایهد دهرچگن هیزهیل ئهمریكى بووده كارهساتیگ ئهرا مللهت لهڕى هاتنهوهى مهسهلهى چینایهتى و دهخاڵهتكردن دهس دهرهكى لهوڵات.
لیست عراقیه لهدانیشتنیگ لهماڵ تارق هاشمى بڕیار ئامادهنهوین نوێنهرهیلى دا لهدانیشتنهیل پهرلهمان لهوهر ئهو سیاسهت تهكڕهوى و دویرهوخستنهیله ك خوهى تاریفى ئهكاو لهلایهن حكوومهتهو پهیڕهو كریهێد.
ههر لهوهر ئهوهیش چهودیرهیل سیاسى تهئكید لهوه كردنه ك وهگوورهى ئهو تاوانباركردن ناونى لایهنهیل سیاسیه وهتایبهت لهناونى ئئتلاف دهوڵهت یاسا وه سهرۆكایهتى نورى مالكى و لیست عراقیه وه سهرۆكایهتى ئهیاد عهلاوى خهریكه زیاترهو بوود ههر لهوهخت سهرهتاى دهرچگن هیزهیل ئهمریكى لهخاك عراق.
وهل ئهوهیشا عهلى حهیدهرى شارهزا لهكاروبار ئاسایش لهگفتوگوویگ ئهرا شهفهق نیوز وتگه: بهشهیل دهزگاى ئاسایش زیاتر لهدو ساڵه ئامادهس ئهرا دابینكردن مقهیهتیكهر لهوڵات و مهسهلهى دهرچگن ئهمریكایش كاریگهرى خراویگ نیهخهیگه بان بار ئاسایش لهوڵاتهگه.
حهیدهرى زیاتر ئاشكراى كردگه، ك لایهنهیلیگ دهرهكى ههن وهردهوام كار لهبان دروسكردن ناكووكى سیاسى كهن لهوهر خاتر مقهیهتیكردن بهرژهوهندیهیل خوهیان لهعراق، ك ئى جیاوازى و ناكوكیهیله كاریگهرى داشتنه لهبان بار ئاسایش.
ههر لهوهر ئهوهیش لهلایهن رووشنهویرى و مهردمیهو مهترسى ئهگهر یا ئحتمال خراوبوین و شیویان بار ئاسایشى لهبهغداى پایتهخت و باقى پاریزگایهیل تر كریهێد لهئهنجام وهردهوامى ئهو جیاوازیهیل سیاسى و كیشهیل چارهسهر نهكریاگه لهناونى لایهنهیل عراقى.
| < پێشتر | دواتر > |
|---|
